بۇل تۋرالى وقۋ-اعارتۋ ءمينيسترى اسحات ايماعامبەتوۆ ءوزىنىڭ تelegram ارناسىندا حابارلادى.
مەكتەپتە وقۋشىلاردى تاماقتاندىرۋدى ۇيىمداستىرۋ ەرەجەسىنە وزگەرىستەر ەنگىزىلدى، دەپ حابارلايدى Almaty-akshamy.kz
ول بۇعان دەيىن مەكتەپ اسحانالارىنداعى تاماق ونىمدەرىنىڭ قىمباتتاپ جاتقانى تۋرالى جازعان ەدى. مينيستر بۋفەت ونىمدەرىنىڭ باعاسى كورشى دۇكەنگە قاراعاندا ەكى ەسە قىمباتتاپ كەتكەنىن، وسىعان بايلانىستى ءتيىستى مامانداردىڭ قاتىسۋىمەن جۇمىس توبى قۇرىلىپ، قاجەتتى تۇزەتۋلەر ازىرلەنگەنىن ايتقان بولاتىن. ەندى اسحات ايماعامبەتوۆ وسى ماسەلەنىڭ تولىعىمەن شەشىلگەنىن حابارلادى.
«قانداي وزگەرىس ەنگىزىلدى؟ ەندى قىزمەتتەردى جەتكىزۋشىلەرمەن ازىق-تۇلىكپەن قامتاماسىز ەتۋ تۋرالى جاڭا شارتتار جاسالعاننان كەيىن مەكتەپ اسحانالارىنداعى باعالار، ونىڭ ىشىندە بۋفەت ونىمدەرى، سۋسىندار مەن باسقا دا قىزمەت كورسەتۋشىلەردىڭ قالاۋى بويىنشا ەمەس، ورتاشا نارىقتىق باعالاردى ەسكەرە وتىرىپ قالىپتاستىرىلادى. سونداي-اق مەملەكەتتىك ساتىپ الۋ پورتالىنداعى دەرەكتەر بازاسى مەن ستاتيستيكا ورگاندارىنىڭ اقپاراتى نەگىزگە الىنادى. بۇل اسحانالاردا باعانىڭ كوتەرىلۋىنە جول بەرمەيدى. ەندى جەتكىزۋشىلەر تەندەردى ۇيىمداستىرۋشىنىڭ كونكۋرس قۇجاتتاماسىندا كورسەتكەن اس ءمازىرى مەن باعالارعا سايكەس قاتاڭ جۇمىس ىستەيدى. بۇل تىيىم سالىنعان ونىمدەردى ءوندىرۋ جانە وتكىزۋ تاۋەكەلدەرىن جويۋ، سونىمەن بىرگە بۋفەت ونىمدەرىنىڭ باعاسىن بەلگىلەۋ ءۇشىن قاجەت. سونىمەن بىرگە اتا-انالاردى تاماقتانۋ تۋرالى حاباردار ەتۋ نەمەسە ونىڭ ساپاسىن باعالاي الۋى ءۇشىن ءبىلىم رەسۋرسىنا كەزەڭ-كەزەڭىمەن نورما ەنگىزىلەدى. ول - پايدالانۋشىلارعا قىزمەت كورسەتۋ جانە قولما-قول اقشاسىز تولەمدەر ساپاسىن باعالاۋعا مۇمكىندىك بەرەتىن تاعامداردىڭ، اس ءمازىرىنىڭ، باعالاردىڭ فوتوسۋرەتتەرىن جاريالاۋ نورماسى. بۇدان باسقا بالاباقشالاردا، بالالار ۇيلەرىندە بالالاردى ۇزدىكسىز تاماقپەن قامتاماسىز ەتۋ ءۇشىن جەرگىلىكتى اتقارۋشى ورگانداردىڭ ينفلياسيا دەڭگەيىن ەسكەرە وتىرىپ، ازىق-تۇلىك باعاسىنىڭ وزگەرۋى بولىگىندە ساتىپ الۋ تۋرالى شارتتارعا وزگەرىستەر ەنگىزۋ مۇمكىندىگى كوزدەلگەن»، – دەدى ول.
ونىڭ ايتۋىنشا، بۇل مىنا نارسەگە قاتىستى قاجەت بولعان. ياعني، ازىق-تۇلىك باعاسىنىڭ وسۋىنە بايلانىستى قاڭتار ايىندا مەملەكەتتىك ساتىپ الۋ قورىتىندىسى بويىنشا، مىسالى، كارتوپ 100 تەڭگە تۇراتىن كەلىسىمشارت جاسالعان جاعدايلار ءجيى كەزدەسەدى. كەيىن بىرنەشە اي وتكەن سوڭ جەتكىزۋشى تاۋاردى جەتكىزۋدەن باس تارتىپ، ناتيجەسىندە ۇيىم ازىق-تۇلىكسىز قالادى. سوت پروسەدۋراسىنا ەنگىزىلگەن جوسىقسىز جەتكىزۋشىلەردىڭ ءتىزىمى بار ەكەنى تۇسىنىكتى، ءبىراق كوپتەگەن جەتكىزۋشى مۇنى ەلەمەيدى، ءسويتىپ جاڭا ۇيىم اشىلىپ، جۇمىسىن جالعاستىرا بەرەدى. ءبىراق بۇل ۋاقىتتا بالاباقشا بۇلدىرشىندەردى تاماقپەن قامتاماسىز ەتە الماي وتىرادى. ەندى جاڭا نورما بويىنشا اكىمدىكتەر مۇنداي جاعدايلاردا وسى ونىمدەردىڭ ورتاشا باعاسىنا سايكەس ۇيىمداردى ۇزدىكسىز قامتاماسىز ەتۋ ءۇشىن قوسىمشا كەلىسىم جاسايدى.
بۇل ەرەجەلەر كەلەسى جىلدان باستاپ قىزمەت كورسەتۋشىلەرمەن جاڭا كەلىسىمشارتتار جاسالعاننان كەيىن قولدانىسقا ەنگىزىلەدى.
وسى ورايدا مينيستر الماتىدا مەكتەپتە تاماقتاندىرۋدى ۇيىمداستىرۋ بويىنشا سەرپىندى جوبانىڭ باستالعانىن، ءقازىر تاماقتانۋدى ۇيىمداستىرۋ پروسەسىن وڭتايلاندىرۋعا جانە جەدەلدەتۋگە باعىتتالعان پيلوتتىق جوبانىڭ قالانىڭ ءۇش مەكتەبىندە ىسكە قوسىلعانىن، مەكتەپتە اس ءمازىرىن قالىپتاستىرۋ تاسىلدەرىن جاڭارتۋ جۇمىستارىنىڭ دا باستالىپ كەتكەنىن ايتتى.