مەكتەپتە قازاق ءتىلىنىڭ گرامماتيكاسى قايتا وقىتىلاتىن بولدى. بۇل تۋرالى ءبىلىم جانە عىلىم ءمينيسترى اسحات ايماعامبەتوۆ ءوزىنىڭ فەيسبۋك جەلىسىندەگى پاراقشاسىندا جاريالادى، دەپ حابارلايدى almaty-akshamy.kz
2016 جىلدان باستاپ ەلىمىزدەگى مەكتەپتەر جاڭارتىلعان ءبىلىم مازمۇنىنا كوشتى. سايكەسىنشە، ءار سىنىپتىڭ وقۋ باعدارلامالارى، وقۋلىقتارى جاڭارا باستادى. وسى جاڭاشىلدىق اياسىندا ءتىپتى وقۋشىلاردى باعالاۋ جۇيەسى وزگەرىپ، ءداستۇرلى 5-تىك جۇيەسىنىڭ ورنىنا كريتەرييلى باعالاۋ ەنگىزىلدى. بىرنەشە جاڭا پاندەر دە وقىتىلا باستادى.
اتا-انالار، مۇعالىمدەر مەن قوعام تاراپىنان بۇل باستاما ءارتۇرلى قابىلداندى. ءبىراق ءتىل جاناشىرلارىنىڭ باستى مۇڭى قازاق ءتىلىنىڭ گرامماتيكاسىنا قاتىستى بولدى. گرامماتيكانى وقۋعا بولىنەتىن ساعات سانى ازايىپ، ونىڭ ورنىنا تىلدىك داعدىلاردى دامىتۋعا كوڭىل بولىنگەن. بۇل ماسەلەنى قازاق ءتىلىنىڭ ماماندارى ءجيى كوتەرىپ، باعدارلاماعا وزگەرىس كەرەكتىگىن ايتقان ەدى. بۇگىن ەلىمىزدىڭ باس ۇستازى وسى ماسەلەگە قاتىستى مينيسترلىكتىڭ ۇستانىمىن جەتكىزدى.
ءمينيستردىڭ ايتۋىنشا، جۋىردا ورتا بىلىمدەگى قازاق ءتىلى ءپانىن وقىتۋ باعدارلاماسى ءبىرشاما وزگەرمەك.
«الداعى ۋاقىتتا گرامماتيكانى وقىتۋعا بولىنەتىن ساعات سانى ارتادى. وقۋشىنىڭ دۇرىس جازۋى مەن سويلەۋى ءۇشىن، ويىن تياناقتى جانە ساۋاتتى جەتكىزۋدەگى گرامماتيكانىڭ ورنى ەرەكشە»، - دەيدى اسحات ايماعامبەتوۆ
اسحات قانات ۇلى گرامماتيكانى وقىتۋدا لينگۆيست عالىم احمەت بايتۇرسىن ۇلىنىڭ ەڭبەكتەرى باسشىلىققا الىناتىندىعىن دا جەتكىزدى.
ايتا كەتەيىك، بيىل جاڭارتىلعان ءبىلىم بەرۋ مازمۇنىنا 11-سىنىپتار دا كوشتى. ولار ءۇشىن جاڭادان وقۋلىقتار جارىق كوردى. دەمەك، بيىلعى مەكتەپ تۇلەكتەرى ۇلتتىق ءبىرىڭعاي تەستىلەۋدى جاڭا باعدارلاما بويىنشا تاپسىرادى.