وقۋ جىلىنىڭ قارساڭىندا شاھاردا «مەكتەپكە جول» رەسپۋبليكالىق اكسياسى بەلسەندى تۇردە وتۋدە.
قايىرىمدىلىق جوباسىنىڭ ماقساتى – از قامتىلعان جانە كوپ بالالى وتباسىلاردان شىققان وقۋشىلارعا قولداۋ كورسەتۋ، اتا-اناسىنىڭ قامقورلىعىنسىز قالعان بالالارعا ناقتى كومەك كورسەتۋ بولىپ تابىلادى. اكسياعا قالا كاسىپكەرلەرى، ءماسليحات دەپۋتاتتار، قايىرىمدىلىق قورلارى كومەك قولىن سوزۋدا. الماتى قالاسى ءماسليحاتىنىڭ دەپۋتاتى ەربولات قاسىموۆ تا بۇل شارادان شەت قالماي، وقۋشىلارعا قاجەتتى قۇرالداردى تابىس ەتتى. ءىس-شارا Nur Otan پارتياسىنىڭ قالالىق فيليالىندا ءوتتى. وندا كومەككە مۇقتاج وقۋشىلارعا مەكتەپكە قاجەتتى قۇرالدار تابىستالدى.
«ءبىز ريۋكزاكتار مەن كەڭسە تاۋارلارىنان باسقا، وقۋشىلارعا وتاندىق وندىرۋشىدەن مەكتەپ فورماسىن ساتىپ الۋعا سەرتيفيكاتتار ۇسىندىق. ەگەر ءبىز تابىستاعان فورمالار مىندەتتى بولىپ تابىلماسا، ولار كەلەسى جىلدىڭ سوڭىنا دەيىن جارامدى بولادى»، – دەيدى ءماسليحات دەپۋتاتى ەربولات قاسىموۆ.
ونىڭ ايتۋىنشا، بيىل كومەككە جۇگىنگەن بالالاردىڭ جالپى سانى – 114. ولاردىڭ بارلىعىنا دەرلىك كومەك كورسەتىلدى. كارانتيندىك شەكتەۋلەرگە بايلانىستى بۇل راسىمگە تەك 16 بالا قاتىسقان. دەگەنمەن قالعاندارى وقۋ جىلىنىڭ باسىندا، ياعني تامىز ايىنىڭ اياعىنا دەيىن قاجەتتىنىڭ ءبارىن الا الادى دەدى. اتا-انالار دەپۋتاتتارعا وسىنداي قامقورلىق ءۇشىن ريزاشىلىعىن ءبىلدىردى، ويتكەنى ولاردىڭ كوپشىلىگى ءوز بەتىنشە بالالارىنىڭ قاجەتتىلىكتەرىن وتەي المايتىندىعىن ايتتى. سەبەبى، ءبىر وتباسىندا كەمىندە 3 بالانىڭ مەكتەپكە باراتىنىن، ءارقايسىسىنا جابدىقتار الۋ قوماقتى قارجىنى تالاپ ەتەتىنىن ايتىپ اعىنان جارىلدى.
– مەن بۇل اكسيانى ۇيىمداستىرعاندارعا جانە وعان قاتىساتىنداردىڭ بارلىعىنا العىس ايتامىن. ءبىز، اتا-انالار، شىنىمەن دە وسىنداي كومەككە مۇقتاجبىز. ۇلىم جاڭا وقۋ قۇرالدارىنا وتە ريزا جانە وقۋ جىلىنىڭ باستالۋىن اسىعا كۇتۋدە، – دەپ قۋانىشىمەن ءبولىستى الماتىلىق دينارا قاسىمجان.
ۇيىمداستىرۋشىلارعا ەلەنا گوگۋلينا دا ەرەكشە ريزاشىلىعىن ءبىلدىردى.
– شىنىمدى ايتسام، مەن پارتيادان باسقا ماسەلە بويىنشا كومەك سۇرادىم، ءبىراق مەنىڭ وتباسىلىق جاعدايىمدى بىلگەننەن كەيىن ولار ماعان وقۋ قۇرالدارىن ساتىپ الۋعا كومەكتەستى، سول ءۇشىن بارىنە ۇلكەن راحمەت، – دەيدى ەلەنا گوگۋلينا.