بولگاريانىڭ مينيسترلەر كابينەتى ەپيدەميالىق جاعدايعا بايلانىستى توتەنشە جاعداي رەجيمىن ءۇش ايعا ۇزارتتى. ەلدە كوروناۆيرۋس جۇقتىرعاندار سانى كۇرت ءوسىپ، اۋرۋحاناعا جاتقىزىلعان ناۋقاستار سانى ارتتى.
COVID-19 تارالۋىنا جول بەرمەۋ جونىندەگى ۆاك الەمنىڭ كوۆيدتىك احۋالىنا شولۋ جاسايدى، دەپ حابارلايدى Almaty-akshamy.kz
ۆەتنامدا COVID-19-دان ەمدەلىپ شىققان ناۋقاستار اۋرۋحانالاردا جۇمىس ىستەۋگە شاقىرىلدى. جوبا حوشيمين قالاسىندا جۇزەگە اسىرىلۋدا: ۆيرۋستىڭ ورشۋىنە بايلانىستى دارىگەرلەردىڭ جۇكتەمەسى ارتىپ، ماماندار ۇلگەرمەي جاتىر. سونىمەن قاتار، بۇگىندە ۆەتنامدا كوروناۆيرۋسپەن سىرقاتتانعاندار بويىنشا تاۋلىكتىك انتيرەكورد – 12 096 جاعداي تىركەلدى.
امەريكالىق Delta Air Lines اۆياكومپانياسى ءار ۆاكسينالانباعان قىزمەتكەرىنەن اي سايىن 200 دوللاردان اقى الا باستايدى. تاسىمالداۋشى ءوز قىزمەتكەرلەرىن COVID-19 ۆاكسيناسياسىنا يتەرمەلەۋ ءۇشىن ايىپپۇل سالعان العاشقى ءىرى امەريكالىق كومپانيا بولدى. شارا مەديسينالىق ساقتاندىرۋمەن قامتىلعان جانە 2021 جىلعى 1 قاراشاعا دەيىن ەكپە الماعان قىزمەتكەرلەرگە قولدانىلادى.
جاپونيا ۇكىمەتى كوروناۆيرۋستىڭ تارالۋىنا بايلانىستى كارانتيندىك شەكتەۋ ەرەجەلەرىن قاتاڭداتۋعا ءماجبۇر، ەلدىڭ تاعى سەگىز ايماعىندا توتەنشە جاعداي رەجيمى ەنگىزىلەدى. بۇل شەكتەۋلەر قوسىمشا حيروسيما، حوككايدو، مياگي، ايچي، گيفۋ، ميە، وكاياما جانە سيگا پرەفەكتۋرالارىن قامتيدى. اتالعان اۋماقتاردا توتەنشە جاعداي 27 تامىزدان باستاپ ەنگىزىلەدى جانە 12 قىركۇيەككە دەيىن جالعاسادى. شەكتەۋ شارالارى جاپونيانىڭ 47 پرەفەكتۋراسىنىڭ 21-ىنە تارالادى.
يندونەزيادا بيلىك ياۆا مەن بالي ارالدارىنداعى كوروناۆيرۋسقا قارسى شارالاردىڭ 30 تامىزعا دەيىن ۇزارتىلعانىن حابارلادى.
قىزمەت كورسەتۋ سالاسىنداعى مەكەمەلەر مەن قوعامدىق تاماقتانۋ نىساندارىنىڭ جۇمىسى ازداعان شەكتەۋلەرمەن جۇزەگە اسىرىلاتىن بولادى، سونداي-اق كومپانيا قىزمەتكەرلەرىنىڭ 30-50%-ى ءۇشىن قاشىقتان جۇمىس فورماتى قولدانىلاتىن بولادى.