ق ر وقۋ-اعارتۋ ءمينيسترى عاني بەيسەمبايەۆ مەكتەپكە دەيىنگى وقۋ مەن تاربيە سالاسىنداعى تاربيەشىلەردىڭ الەۋمەتتىك مارتەبەسىن كوتەرۋ شارالارىن باياندادى.
ءوز سوزىندە مينيستر ەلدەگى 3،7 ملن بالانىڭ ساپالى ءبىلىمى مەن سانالى تاربيەسىن جانە ءومىر قاۋىپسىزدىگىن قامتاماسىز ەتۋ مىندەتتەرىن ەسكە سالدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«بىرىنشىدەن، مەكتەپكە دەيىنگى وقۋ مەن تاربيە سالاسىندا تاربيەشىنىڭ الەۋمەتتىك مارتەبەسىن ارتتىرۋ، بىلىكتىلىك پەن كاسىبي دامۋدىڭ جاڭا فورمالارىن ەنگىزۋ ارقىلى كادرلىق الەۋەتتى كۇشەيتۋ؛ جالاقىنى ورتا ەسەپپەن 30%-عا ارتتىرۋ؛ مۇمكىندىگى شەكتەۋلى بالالارعا ينكليۋزيۆتى ورتادا ءبىلىم الۋعا مۇمكىندىك بەرۋ ماقساتىندا «پەداگوگ كومەكشىسى» شتاتىن ەنگىزۋ باعىتىنداعى جۇمىستى جالعاستىرامىز»، - دەدى عاني بەيسەمبايەۆ ەلوردادا وتكەن مينيسترلىكتىڭ القا وتىرىسىندا.
سونىمەن بىرگە، ءمينيستردىڭ ايتۋىنشا، الەۋمەتتىك وسال وتباسىلاردان شىققان مەكتەپ جاسىنا دەيىنگى بالالاردى بالاباقشادا تەگىن تاماقپەن قامتۋ قولعا الىنادى.
ايتا كەتەيىك، ەلوردادا كازگيۋۋ ۋنيۆەرسيتەتىندە وقۋ-اعارتۋ مينيسترلىگىنىڭ 2022 جىلى اتقارىلعان جۇمىس قورىتىندىلارى جانە 2023 جىلعا جوسپارلانعان مىندەتتەر بويىنشا كەڭەيتىلگەن القا وتىرىسى وتۋدە.
القا وتىرىسىنا ق ر پرەمەر-مينيسترىنىڭ ورىنباسارى التاي كولگىنوۆ، وقۋ-اعارتۋ ءمينيسترى عاني بەيسەمبايەۆ، مينيسترلىك وكىلدەرى، پەداگوگتەر قاتىسىپ وتىر.