فۋتبولشىلاردى ن.نازاربايەۆ حالىقارالىق اۋەجايىنان سالتاناتتى قارسى الۋ راسىمىنە تۋريزم جانە سپورت ءمينيسترى ەرمەك مارجىقپايەۆ، استانا قالاسىنىڭ اكىمى جەڭىس قاسىمبەك، فۋتبولشىلاردىڭ تۋعان-تۋىستارى، دوستارى جانە جانكۇيەرلەر قاتىستى، دەپ حابارلايدى اlmaty-akshamy.kz.
ءىس-شارا بارىسىندا ەرمەك مارجىقپايەۆ قۇتتىقتاۋ ءسوز سويلەپ، بۇكىل كومانداعا جاسىل الاڭداعى جانكەشتى ويىنى ءۇشىن العىسىن ءبىلدىردى:
«سىزدەر بۇكىل قازاق حالقىنا، ءتىپتى فۋتبولدان، جالپى سپورتتان الىس جاندارعا ەستەن كەتپەس ەرەكشە اسەر، ەموسيا سىيلادىڭىزدار. ءوز ويىندارىڭىز ارقىلى جانكۇيەرلەردىڭ وتاندىق فۋتبولعا دەگەن سەنىمىن قايتارىپ، ەلىمىزدىڭ حالىقارالىق ارەناداعى ءيميدجىن كوتەردىڭىزدەر. كەشە تۇندە بۇكىل ەل ۇيىقتاماي، سىزدەر ءۇشىن تەلەديدار الدىندا تاقىم قىسىپ، جانكۇيەر بولدى. سىزدەر بۇل دودادا ۇلكەن ەرلىك جاساپ، قازاق حالقىن ءبىر ماقسات اياسىنا ۇيىستىرا الدىڭىزدار. بۇل ەرلىكتەرىڭىز كوپكە ۇلگى، مىڭداعان جاس بالا سىزدەر سياقتى بولۋدى، بولاشاقتا ۇلتتىق قۇراما ساپىندا ويناۋدى ارماندايدى. قازاق حالقىنا ۇلكەن قۋانىش سىيلاعاندارىڭىزعا كوپ راحمەت، جىگىتتەر!»، - دەدى مينيستر.
فۋتبولشىلاردى قارسى الۋعا جانكۇيەرلەر دە ەرەكشە دايىندىقپەن كەلدى. ولار جىگىتتەرگە جىگەر بەرەتىن سوزدەر جازىلعان باننەرلەردى ۇستاپ، قۇرمەت رەتىندە جاندى ءدالىز جاساپ، ساپ تۇزەدى. سونىمەن قاتار فۋتبولشىلار مەن جاتتىقتىرۋشىلار شتابى بارلىق جانكۇيەرگە ىرىكتەۋ كەزەڭىندەگى ويىندار بويى قولداۋ بىلدىرگەنى ءۇشىن العىس ءبىلدىردى. كوماندا توپتاعى شەشۋشى ماچتى سىرت الاڭدا وتكىزگەنىنە قاراماستان، فۋتبولشىلار وسى ءتۇنى بۇكىل ەلدىڭ قولداۋىن سەزگەنىن اتاپ ءوتتى. جەرلەستەرىمىز كەشە ەۋرو-2024 ىرىكتەۋ ءتۋرنيرى اياسىندا سلوۆەنيا فۋتبولشىلارىمەن كەزدەسىپ، اسا تارتىستى وتكەن ويىندا قارسىلاستارىنا 2:1 ەسەبىمەن جول بەردى. ءبىزدىڭ قۇراما ەۋروپا چەمپيوناتىنىڭ فينالدىق كەزەڭىنە ىرىكتەۋ سايىستارى ارقىلى تىكەلەي جولداما الا الماسا دا، قارت قۇرلىق دوداسىنا شىعۋ مۇمكىندىگىن ساقتاپ قالدى. ەندى جەرلەستەرىمىز ۇلتتار ليگاسىنىڭ پلەي-وفف كەزەڭى ارقىلى ەۋروعا شىعۋ ءۇشىن تاعى ءبىر مارتە تالپىنىپ كورەدى. بۇل سىندا ءبىزدىڭ جىگىتتەردى 2004 جىلعى ەۋروپا چەمپيوندارى – گرەكيا قۇراماسى كۇتىپ تۇر. ماچ 2024 جىلدىڭ ناۋرىز ايىندا افينادا وتەدى دەپ جوسپارلانعان.
