اقتوبەلىك وقۋشى ءقاۋىپ تونگەن كەزدە جاقىنىنا جەدەل حابار بەرەتىن قوسىمشا جاسادى.
ۇيالى تەلەفونعا ارنالعان باعدارلاما SOS دابىلىمەن قاتار كومەك سۇراۋشىنىڭ تۇرعان ورنىن دا انىقتايدى، دەپ حابارلايدى Almaty-akshamy.kz
قوسىمشا اۆتورى - نازاربايەۆ زياتكەرلىك مەكتەبىنىڭ وقۋشىسى ايان قايىربەك. كارانتين كەزىندە تۇرمىستىق زورلىق-زومبىلىق تۋرالى ءجيى ەستىگەن ول وسى جوبانى قولعا العان.
دارىندى بالا قوسىمشانى كەز كەلگەن جاستاعى ادام قولدانا الاتىنداي، ىڭعايلى ەتىپ جاسادى. تەلەفونعا جۇكتەپ العاننان كەيىن سەنىمدى ءۇش ادامنىڭ ءنومىرىن ەنگىزۋ قاجەت. ۇيالى قوسىمشادا ەل توڭىرەگىندەگى داعدارىس ورتالىقتارى مەن قۇقىق قورعاۋشىلار جانە مەديسينالىق مەكەمەلەر تۋرالى اقپارات تا بار.
«102 جانە 112 نومىرلەرىنە تىكەلەي حابارلاما جولداۋ ءۇشىن ىشكى ىستەر جانە توتەنشە جاعدايلار مينيسترلىكتەرىنە حابارلاستىم. ءبىراق ازىرگە مۇنداي مۇمكىندىك جوق ەكەن. بولاشاقتا قۇتقارۋ قىزمەتتەرىنىڭ كولل-ورتالىقتارى سمس-حابارلاما قابىلدايتىن بولسا، قوسىمشانى جاڭارتىپ، جەدەل اقپارات جولدايتىنداي ەتەمىن»، – دەيدى وقۋشى ايان قايىربەك.