دەنساۋلىق ساقتاۋ مينيسترلىگى ەلدەگى 4 ملن مەكتەپ وقۋشىسىنا ءقاۋىپسىز جانە سالاۋاتتى ورتا قالىپتاستىرۋ ءۇشىن جاڭا وقۋ جىلىنا ورتا ءبىلىم بەرۋ ۇيىمدارىنداعى مەديسينالىق پۋنكتتەردىڭ دايىندىعىنا مونيتورينگ جۇرگىزدى، دەپ حابارلايدى aqshamnews.kz
5619 مەديسينالىق پۋنكتتە جوندەۋ جۇمىستارى اياقتالىپ، قاجەتتى دارىلىك زاتتار مەن شۇعىل كومەك كورسەتۋگە ارنالعان مەديسينالىق جابدىقتار ساتىپ الىندى، سونداي-اق جيھازدار مەن تەحنيكا جاڭارتىلدى.
مينيسترلىك سونىمەن قاتار مەكتەپ كەستەسىمەن سينحروندالعان مەديسينالىق پۋنكتتەردىڭ جۇمىس كەستەسى جانە شاعىن شتات قۇرامى، ماتەريالدىق-تەحنيكالىق جاراقتاندىرۋ نورماتيۆتەرىن انىقتايتىن مەكتەپ مەديسيناسى ستاندارتىن بەكىتتى. بۇل رەسۋرتاردى مەيلىنشە ءتيىمدى پايدالانۋعا جانە وقۋشىلاردىڭ مەديسينالىق كومەككە قولجەتىمدىلىگىن قامتاماسىز ەتۋگە سەپتىك ەتەدى.
قازىرگى تاڭدا مەكتەپتەگى مەديسينالىق پۋنكتتەردە 6،9 مىڭنان استام مامان جۇمىس ىستەيدى، ولار سالانى كادرلارمەن 97% قامتيدى. وڭىرلەردە مەدبيكەلەر ترەنينگ ورتالىقتارىندا شۇعىل كومەك كورسەتۋ بويىنشا وقۋدان ءوتتى، سونداي-اق اپۆ پروفيلاكتيكاسى مەن يممۋنداۋ پروفيلاكتيكاسى بويىنشا سەمينارلارعا قاتىستى.
سوعان قوسا دەنساۋلىق ساقتاۋ جانە وقۋ-اعارتۋ مينيسترلىكتەرىنىڭ بىرلەسكەن بۇيرىعىمەن ق ر مەكتەپ جاسىنداعى بالالاردىڭ دەنساۋلىعىن نىعايتۋ بويىنشا ءىس-شارالاردىڭ 2024-2026 جىلدارعا ارنالعان جوسپارى بەكىتىلدى.
ق ر دەنساۋلىق ساقتاۋ مينيسترلىگى مەكتەپتەرگە بالالاردىڭ دەنە بەلسەندىلىگىنە باعىتتالعان ءىس-شارالاردى ءجيى ۇيىمداستىرىپ، وقۋشىلاردىڭ بوس ۋاقىتىن دۇرىس جانە بەلسەندى وتكىزۋىنە ىقپال ەتەتىن ۇيىرمەلەر مەن ساباقتان تىس باعدارلامالاردى دامىتۋعا كەڭەس بەردى.