بيىلعى جىلى مەكتەپ جاسىنا دەيىنگى بالانىڭ جەكە دامۋ كارتاسى اۆتوماتتاندىرىلدى، دەپ حابارلايدى aqshamnews.kz.
ول بالالاردىڭ داعدىلارىنىڭ دامۋى مەن قالىپتاسۋىن باقىلاۋعا مۇمكىندىك بەرەدى. بۇل تۋرالى بۇگىن وكق الاڭىندا وقۋ-اعارتۋ مينيسترلىگىنىڭ وكىلدەرى حابارلادى.
«مەكتەپ جاسىنا دەيىنگى بالانىڭ جەكە دامۋ كارتاسى بىزگە ءار بالانىڭ قاجەتتىلىكتەرىن تەرەڭىرەك تۇسىنۋگە جانە مەكتەپتە وقۋدى ءساتتى باستاۋعا دايىنداۋعا مۇمكىندىك بەرەدى. كارتادا دامۋدىڭ بارلىق ماڭىزدى اسپەكتىلەرى كورسەتىلگەن: تيپتىك وقۋ باعدارلاماسىن يگەرۋ بارىسىندا قالىپتاساتىن فيزيكالىق جاعداي، كوممۋنيكاتيۆتى، تانىمدىق، ينتەللەكتۋالدى، شىعارماشىلىق، زەرتتەۋ جانە الەۋمەتتىك-ەموسيونالدى داعدىلار. مۇنداي جۇيەلى ءتاسىل ساپالى ءبىلىم بەرۋدى قامتاماسىز ەتەدى جانە بالالاردىڭ باستاۋىش مەكتەپتە تابىستى بەيىمدەلۋىنە ىقپال ەتەدى»، – دەپ اتاپ ءوتتى ق ر وقۋ-اعارتۋ مينيسترلىگىنىڭ مەكتەپكە دەيىنگى ءبىلىم دەپارتامەنتىنىڭ ديرەكتورى مانار اداموۆا.
كارتا سيفرلىق فورماتقا اۋىستىرىلدى جانە ۇلتتىق ءبىلىم بەرۋ دەرەكقورىمەن ينتەگراسيالاندى، بۇل اقپاراتتى مەكتەپتەرگە جولداۋعا مۇمكىندىك بەرەدى جانە مەكتەپكە دەيىنگى ءبىلىم بەرۋ مەن باستاۋىش ءبىلىم بەرۋ اراسىنداعى ۇزدىكسىز ساباقتاستىقتى قامتاماسىز ەتەدى.