مەملەكەت باسشىسىنىڭ تاپسىرماسى بويىنشا مەكتەپكە دەيىنگى ءبىلىم بەرۋدى دامىتۋ جونىندەگى كەشەندى شارالاردى ىسكە اسىرۋ شەڭبەرىندە ەلىمىزدە بيىلعى جىلدىڭ باسىنان باستاپ مەكتەپكە دەيىنگى ۇيىمداردا 40 مىڭعا جۋىق جاڭا ورىن اشىلدى.
بۇل تۋرالى وكق-دە وتكەن باسپا ءسوز ءماسليحاتىندا ق ر وقۋ-اعارتۋ مينيسترلىگىنىڭ مەكتەپكە دەيىنگى ءبىلىم دەپارتامەنتىنىڭ ديرەكتورى مانار اداموۆا مالىمدەدى، دەپ حابارلايدى aqshamnews.kz وقۋ-اعارتۋ مينيسترلىگىنە سىلتەمە جاساپ.
بالالاردى مەكتەپكە دەيىنگى تاربيەمەن جانە وقىتۋمەن قامتۋدى ارتتىرۋ ماقساتىندا 2023-2027 جىلدارعا ارنالعان مەكتەپكە دەيىنگى ۇيىمداردى ىسكە قوسۋدىڭ قادامدىق جوسپارى ازىرلەندى، وسىلايشا بالالاردى مەكتەپكە دەيىنگى ساپالى بىلىممەن قامتۋ دەڭگەيى 91،5%-عا جەتتى.
«جاڭا ورىنداردى اشۋ جۇمىس ىستەپ تۇرعان مەكتەپكە دەيىنگى ۇيىمداردى رەكونسترۋكسيالاۋ، جاڭادان سالۋ، شاعىن ورتالىقتار جەلىسىن كەڭەيتۋ، سونداي-اق جەكەمەنشىك مەكتەپكە دەيىنگى ۇيىمداردا مەملەكەتتىك ءبىلىم بەرۋ تاپسىرىسىن ورنالاستىرۋ ەسەبىنەن جوسپارلانۋدا. بۇگىنگى تاڭدا پاۆلودار وبلىسىندا بالالاردى قامتۋدىڭ ەڭ جوعارى كورسەتكىشىنە قول جەتكىزىلدى»، – دەپ اتاپ ءوتتى مانار اداموۆا.
ەستەرىڭىزگە سالا كەتەيىك، ەلىمىزدە بارلىعى 11،5 مىڭنان استام مەكتەپكە دەيىنگى ۇيىم جۇمىس ىستەيدى جانە مۇندا 1 ميلليونعا جۋىق بالا تاربيەلەنۋدە. بيىل 2 جاستان 6 جاسقا دەيىنگى بالالاردى مەكتەپكە دەيىنگى وقىتۋمەن جانە تاربيەمەن قامتۋدى 92،5%-عا دەيىن ارتتىرۋ جوسپارلانىپ وتىر.