الەۋمەتتىك جەلىدە ءوزىنىڭ مەكتەپ ءبىتىرۋ كەشىنە جيناعان اقشاسىن دزيۋدودان جارىسقا جۇمساپ، ازيا كۋبوگىندە قازاقستان نامىسىن قورعاعان بوزبالانىڭ وقيعاسى كوپشىلىكتىڭ جۇرەگىن جىلىتتى. Aqshamnews.kz ءتىلشىسى جاس سپورتشىمەن تىلدەسىپ، وقيعا جايلى تەرەڭىرەك ءبىلدى.
ءسان-سالتاناتتى كەشتەن باس تارتىپ، ەل نامىسىن قورعاۋعا تاشكەنتتەگى جارىسقا اتتانعان بالانىڭ ەسىمى - ەراسىل بولاتبەك. الماتى قالاسى، №5 مەكتەپ-گيمنازياسىنىڭ تۇلەگى. دزيۋدومەن 10 جاسىنان بەرى اينالىسادى. جەلىدە تاراعان ۆيدەونى ەراسىلدىڭ جاتتىقتىرۋشىسى جاريالاعان.
"شەشىمىم ءۇشىن ەش وكىنبەيمىن"
ەراسىل وتباسىنىڭ تۇڭعىشى. وزىنەن كەيىن ءىنىسى مەن ەكى قارىنداسى بار. سپورتقا قىزىعۋشىلىعى اتا-اناسىنىڭ باعىت بەرۋىمەن ويانعان. ول "مەكتەپ ءبىتىرۋ كەشىنە جۇمسايسىڭ" دەپ بەرگەن اتا-اناسىنىڭ اقشاسىن جارىسقا جۇمساپ جىبەرگەنىنە ەش وكىنبەيتىنىن ايتتى. ول تاشكەنتتە وتكەن ازيا كۋبوگىندە قول جۇلدە يەلەنگەن.
"بۇل سپورتقا اتا-انامنىڭ جول سىلتەۋىمەن بەت بۇرعان ەدىم. ءقازىر بۇل مەنىڭ ومىرلىك جولىما اينالدى. مەكتەپ ءبىتىرۋ كەشىنە ارنالعان اقشانى اتا-انام بەرگەن. ونى جارىسقا بارۋعا جۇمسادىم. بۇل مەن ءۇشىن ماڭىزدىراق بولدى. سولايشا قولا جۇلدە يەلەندىم. بۇل شەشىمىمە ەش وكىنبەيمىن"، – دەيدى جاس سپورتشى.
17 جاستاعى ەراسىلدىڭ جەتىستىكتەرى دە از ەمەس. ول 2023 جىلى وسكەمەندە وتكەن قازاقستان چەمپيوناتىنىڭ قولا جۇلدەگەرى، 2025 جىلى ورالدا وتكەن قازاقستان چەمپيوناتىنىڭ جەڭىمپازى، تاشكەنتتە وتكەن ازيا كۋبوگىنىڭ قولا جۇلدەگەرى.
"ماقساتىم - وليمپيادا چەمپيونى بولۋ"
ءقازىر ەراسىل گرۋزيادا تاجىريبە الماسۋعا باعىتتالعان وقۋ-جاتتىعۋ جيىنىنا قاتىسىپ جاتىر. جاس سپورتشىنىڭ باستى ماقساتى – وليمپياداعا قاتىسىپ، ەل نامىسىن ابىرويمەن قورعاۋ.
"سپورتتى سوڭىنا دەيىن قۋىپ، وليمپيادا چەمپيونى بولعىم كەلەدى. ال بوس ۋاقىتتا سەرۋەندەگەندى، جاڭا ەلدەرگە ساياحاتتاعاندى، تاجىريبە جيناۋدى جاقسى كورەمىن"، – دەيدى ەراسىل.
جۇرت جۇلدەگە كورىمدىك جىبەرگەن
كوپشىلىكتىڭ ەرەكشە ىقىلاسىنا بولەنگەن ەراسىل الەۋمەتتىك جەلىدە تاراپ كەتكەن ۆيدەودان كەيىن ەل قولداۋىن ايقىن سەزىنگەن. ءبىراق ەشكىمنەن كومەك سۇراماعانىن ايتادى.
"مەن ەشقانداي قارجىلاي كومەك سۇراعان جوقپىن. ءبىراق ادامدار وزدەرى كورىمدىك دەپ بانك كارتاما اقشا اۋدارىپ، تىلەكتەرىن ءبىلدىرىپ جاتتى. بۇل مەن ءۇشىن ۇلكەن قولداۋ"، – دەيدى سپورتشى.
ايتا كەتەيىك، مەكتەپ ءبىتىرۋ كەشىنە ارنالعان قارجىنى ەراسىلعا اتا-اناسى بەرگەن. الايدا ول بۇل كەشكە بارمايتىنىن الدىن الا بىلگەن.
"مەكتەپ ءبىتىرۋ كەشىنە ءبارىبىر قاتىسا المايمىن. سەبەبى ءدال سول ۋاقىتتا ۇلتتىق قۇرامادا وقۋ-جاتتىعۋ جيىنى وتەدى. اقشا ماسەلەسىنەن ەمەس، سپورت مەن ءۇشىن ءبىرىنشى ورىندا"، – دەيدى ول.