ماماندار كەمشىلىكتەردى دەر كەزىندە جويۋعا مۇددەلى.
جىل باسىنان بەرى مەديسينالىق ساقتاندىرۋ قورىنا الماتىلىقتاردان 1 018 شاعىم ءتۇستى. بۇل تۋرالى قوردىڭ الماتى قالالىق فيليالىنىڭ ديرەكتورى تىلەۋحان ابىلدايەۆ ءمالىم ەتتى، دەپ حابارلايدى Almaty-akshamy.kz.
ونىڭ ايتۋىنشا، تۇسكەن ءوتىنىشتىڭ باسىم بولىگى مەديسينالىق كومەكتىڭ ساپاسى مەن كونسۋلتاسيالىق-دياگنوستيكالىق قىزمەتتى كۇتۋ مەرزىمىنىڭ ۇزاقتىعىنا، كومەك كورسەتۋدەن باس تارتۋ ماسەلەسىنە قاتىستى.
شاعىمدار قوردىڭ fms.kz رەسمي سايتى، 1406 بايلانىس ورتالىعى، Qoldau 24/7 ءموبيلدى قوسىمشاسى ارقىلى تۇسكەن.
«پاسيەنتتەردى قولداۋ جانە ىشكى اۋديت قىزمەتى باس دارىگەرگە باعىنادى. ونىڭ مىندەتى - قىزمەت كورسەتۋ ساپاسىن جاقسارتۋ. سول سەبەپتى اۋديت قىزمەتى مەديسينالىق كومەكتىڭ پاسيەنتتەرگە تولىققاندى ءارى ساپالى كورسەتىلۋىن قامتاماسىز ەتۋگە، كەمشىلىكتەردى انىقتاپ، دەر كەزىندە جويۋعا مۇددەلى»، - دەيدى فيليال باسشىسى تىلەۋحان ابىلدايەۆ.
ول قانداي جاعدايدا پاسيەنتتەردى قولداۋ قىزمەتىنىڭ كومەگىنە جۇگىنۋگە بولاتىنىن دا اتاپ ءوتتى. مىسالى، شۇعىل كومەك كورسەتۋ ءۇشىن ساقتاندىرىلعان ستاتۋسىن تالاپ ەتسە، ساقتاندىرىلماعاندىقتان ۋچاسكەلىك دارىگەردىڭ قابىلداۋىنا جازۋدان باس تارتسا، ەمحاناعا تيەسىلى اۋماقتا تۇرساڭىز دا ۋچاسكەلىك دارىگەر ۇيگە كەلىپ قاراۋعا كەلىسپەسە، سالالىق ماماننىڭ جوقتىعىنا بايلانىستى نەمەسە الداعى ءبىر ايدا ورىن جوق دەگەن جەلەۋمەن دارىگەردىڭ قابىلداۋىنا جازباسا، ءتيىستى دياگنوستيكالىق تەكسەرۋلەر مەن زەرتحانالىق قىزمەتتەرگە جولداما بەرىلمەسە، دارىگەر قابىلداعان كەزدە دورەكىلىك تانىتسا، مەديسينالىق كومەكتىڭ ساپاسى كوڭىلدەن شىقپاسا، قويىلعان دياگنوز بەن تاعايىندالعان ەمنىڭ دۇرىستىعىنا كۇماندانعان جاعدايدا، مەديسينالىق دەرەكتەردەن قاتە كەتسە نەمەسە كورسەتىلمەگەن قىزمەت «كورسەتىلدى» دەپ جازىلسا، جالپى، مەديسينا قىزمەتىنە كوڭىلىڭىز تولماسا جانە تاعى دا باسقا جاعدايلاردا ىشكى اۋديت قىزمەتىنە جۇگىنۋگە بولادى.