مەديسينا قىزمەتتەرىنىڭ باسىم بولىگى اۆتوماتتاندىرىلدى

ەلوردادا مەديسينا سالاسىنداعى 19 مەملەكەتتىك قىزمەتتىڭ اراسىندا 18ء-ى اۆتوماتتاندىرىلعان

بۇل تۋرالى قالاداعى قوعامدىق دەنساۋلىق ساقتاۋ باسقارماسىنىڭ باسشىسى تيمۋر مۇراتوۆ ءمالىم ەتتى، دەپ حابارلايدى Almaty-akshamy.kz قازاقپارات-قا سىلتەمە جاساپ. 

«مەملەكەتتىك قىزمەتتەردى ەلەكتروندى تۇردە جۇرگىزۋ تۇرعىسىندا جاقسى جەتىستىكتەر بار. 2022 جىلدىڭ ءبىرىنشى توقسانىنىڭ قورىتىندىسى بويىنشا 2 967 507 قىزمەت كورسەتىلسە، سونىڭ 361 584ء-ى (12،2 پايىز) قاعاز نۇسقادا، ال 2 605 923ء-ى (87،8 پايىز) ەلەكتروندى تارتىپتە اتقارىلدى. 2021 جىلدىڭ وسى كەزەڭىمەن سالىستىرعاندا، كورسەتىلگەن قىزمەتتەردىڭ جالپى سانى 14،2 پايىزعا ءوستى. وسى ورايدا ەلەكتروندى نۇسقاداعى مەملەكەتتىك قىزمەت 11،6 پايىزعا ارتقان»، - دەدى ت. مۇراتوۆ قالا ءماسليحاتىندا وتكەن تالقىلاۋلار كەزىندە.

ونىڭ ايتۋىنشا، 2022 جىلدىڭ باسىنان بەرى باسقارما قىزمەتتەردى كورسەتۋ ساپاسىن مەملەكەتتىك قاداعالاۋ بويىنشا جۇمىستارعا كىرىستى. بۇعان دەيىن وسى قىزمەت اكىم اپپاراتىنىڭ قۇزىرىندا بولدى. بەكىتىلگەن جوسپار بويىنشا 12 ۇيىمدى قامتۋ ەسكەرىلگەن. قازىرگى كەزدە ەكى مەديسينا ۇيىمى تەكسەرۋدەن وتسە، تاعى بىرەۋىندە ءتيىستى ءىس-شارالار جۇرگىزىلىپ جاتىر. 

«انىقتالعان كەمشىلىكتەردى تۇزەتۋ بويىنشا جۇمىستاردى جالعاستىرىپ جاتىرمىز. دەنساۋلىق ساقتاۋ سالاسىنداعى مەملەكەتتىك قىزمەت كورسەتۋ بولىگىندە وزەكتى ماسەلەلەردىڭ ءبىرى رەتىندە العاشقى كومەك كورسەتەتىن مەديسينالىق ۇيىمعا تىركەۋ ءتارتىبىن ايتۋعا بولادى»، - دەدى ت. مۇراتوۆ.