بۇل بيىلعى جىلى «ارسەلورميتتال تەمىرتاۋ» كاسىپورىندارىنداعى العاشقى جازاتايىم وقيعا ەمەس
«ارسەلورميتتال تەمىرتاۋ» اق مەتاللۋرگيا كومبيناتىندا زارداپ شەككەن جۇمىسكەردىڭ جاعدايى جاقساردى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«شۇعىل ءىس-شارالار ناتيجەسىندە ناۋقاس شوك كۇيدەن شىعارىلدى. ءقازىر ونىڭ جاعدايى ورتاشا اۋىر دەپ باعالانۋدا جانە وڭ ديناميكا بايقالادى»، - دەدى تەمىرتاۋ قالاسىنىڭ ورتالىق اۋرۋحاناسى ديرەكتورىنىڭ م.ا. ۋليانا بازاروۆا.
سونداي-اق قازا تاپقان 4 قىزمەتكەر جايلى مالىمەتتەر بەلگىلى بولدى. كوز جۇمعاندار 34-58 – جاستاعى ەر ادامدار.
جانىبەك ءابدىراسىلوۆ وتباسىنداعى جالعىز اسىراۋشى بولعان. تۋىستارىنىڭ ايتۋىنشا، جانىبەك جازاتايىم وقيعاعا دەيىن كاسىپورىندا ءبىر اي عانا جۇمىس ىستەگەن. ول نەبارى 40 جاستا ەدى.
«كىشكەنتاي بالالار اكەسىز قالدى. بىزگە كومپانيا مەن اكىمدىك وكىلدەرى كەلدى، ءبىز ولارعا ءوز تالاپتارىمىزدى ايتتىق. جانىبەكتىڭ يپوتەكاسى بار. سونداي-اق بولاشاقتا بالالارعا تۇرعىن ءۇي بەرۋ تۋرالى ماسەلە كوتەرىلدى»، - دەيدى مارقۇمنىڭ تۋىسى بەيسەن ەسبولوۆ.
«ارسەلورميتتال تەمىرتاۋ» كومپانياسى قازا تاپقانداردىڭ وتباسىلارىنا ۇجىمدىق شارتقا سايكەس كومەك كورسەتىلەدى دەپ ۋادە بەرۋدە.
ايتا كەتۋ كەرەك، بۇل بيىلعى جىلى «ارسەلورميتتال تەمىرتاۋ» كاسىپورىندارىنداعى العاشقى جازاتايىم وقيعا ەمەس.
وبلىستىق ەڭبەك ينسپەكسياسى باسقارماسىنىڭ مالىمەتىنشە، وسى جىلى 6 ادام زارداپ شەككەن، ولاردىڭ ەكەۋى قازا تاپتى. وتكەن جىلى ونەركاسىپتىك الىپتىڭ وندىرىستەرىندە 42 ادام جاراقات الىپ، 9 ادام كوز جۇمعان.
وسى ۋاقىتتا ارنايى كوميسسيا مۇشەلەرى ءتيىستى جۇمىس جۇرگىزۋدە. كوميسسيا قۇرامىنا ەڭبەك ينسپەكسياسى جانە مەملەكەتتىك ساۋلەت-قۇرىلىس باقىلاۋى باسقارماسىنىڭ، تەمىرتاۋ اكىمدىگىنىڭ، ونەركاسىپتىك قاۋىپسىزدىك دەپارتامەنتىنىڭ بارلىق ۋاكىلەتتى ۆەدومستۆولارىنىڭ باسشىلارى، سونداي-اق «ارسەلورميتتال تەمىرتاۋ» كومپانياسىنىڭ باسشىلىعى جانە «جاقتاۋ» مەتاللۋرگتەر كاسىپوداعىنىڭ ءتوراعاسى كىردى.
«بۇل ماسەلە بويىنشا تاۋەلسىز ساراپتامالىق كوميسسيا تەكسەرۋ جۇمىستارىنا تارتىلدى. بۇگىن وسى عيماراتتى، پەشتىڭ ءوزىن تەكسەرۋ بويىنشا جۇمىسقا كىرىستى. تەكسەرۋ ناتيجەلەرى بويىنشا 3 تاۋەلسىز ۇيىم ءوزىنىڭ ساراپتامالىق قورىتىندىسىن بەرەدى»، - دەپ ءتۇسىندىردى قاراعاندى وبلىسىنىڭ ەڭبەك ينسپەكسياسى باسقارماسىنىڭ باسشىسى يرينا ليۋبارسكايا.
ارنايى كوميسسيا كاسىپورىندا 10 كۇن جۇمىس ىستەيدى. سونىمەن قاتار «ەكى جانە ودان دا كوپ ادامنىڭ ولىمىنە اكەپ سوققان قۇرىلىس جۇمىستارىن جۇرگىزۋ كەزىندە قاۋىپسىزدىك ەرەجەلەرىن بۇزۋ» بابى بويىنشا قىلمىستىق ءىس تەرگەلۋدە.
ەستەرىڭىزگە سالا كەتەيىك، «قۇرىلىسمەت»« ج ش س اۋماعىندا «ارسەلورميتتال تەمىرتاۋ» اق قىزمەتكەرلەرى قايعىلى جاعدايعا ۇشىراعان بولاتىن. وتقا ءتوزىمدى قۇرىلىستى بولشەكتەۋ كەزىندە سەحتىڭ جۇمىس ىستەمەيتىن №9 تەرميالىق پەشىنىڭ توبەسى قۇلادى. ءۇيىندى استىندا بەس ادام قالىپ قويدى.
ونىڭ تورتەۋى قايتىس بولدى، 1994 جىلى تۋعان تاعى ءبىر جۇمىسكەر اۋرۋحاناعا جەتكىزىلدى.