2022 جىلى ءاربىر گرانتقا 3 ملن تەڭگەدەن 30 گرانت بەرىلەتىن بولادى
اقپارات جانە قوعامدىق دامۋ مينيسترلىگى مەملەكەت باسشىسى تاعايىنداعان «تاۋەلسىزدىك ۇرپاقتارى» گرانتىن ۇسىنۋ جونىندەگى كونكۋرستىڭ باستالعانى تۋرالى حابارلايدى.
گرانت بەرۋدىڭ ماقساتى بەلسەندى شىعارماشىل جاستار قاۋىمداستىعىن قالىپتاستىرۋعا باعىتتالعان جاستاردىڭ جاڭا جانە قولدانىستاعى باستامالارىن مەملەكەتتىك قولداۋ بولىپ تابىلادى.
كونكۋرستىق وتىنىمدەردى قابىلداۋ اياقتالعان كەزدە جاسى 14-تەن كەم ەمەس جانە 29-دان اسپايتىن، كونكۋرسقا قاتىسۋعا ءوتىنىم بەرگەن قازاقستان رەسپۋبليكاسىنىڭ كەز كەلگەن ازاماتى ۇمىتكەر بولا الادى.
گرانتتار قازاقستان رەسپۋبليكاسىنىڭ ازاماتىنا جاڭا يدەيالار مەن باستامالاردى ىسكە اسىرۋ ءۇشىن كونكۋرستىق نەگىزدە مىناداي باعىتتار بويىنشا بەرىلەدى:
«عىلىم» – عىلىمنىڭ باسىم سەكتورلارىندا جاڭا عىلىمي جوبالاردى جانە زەرتتەۋلەردى ىسكە اسىرۋعا ارنالعان؛
«مادەنيەت» – قازاقستاننىڭ مادەني مۇراسىن تانىمال ەتۋگە، حالىقتىق مادەني داستۇرلەر مەن ونەردى ىلگەرىلەتۋگە باعىتتالعان جوبالاردى ىسكە اسىرۋعا ارنالعان؛
«اقپاراتتىق تەحنولوگيالار» – جاڭا IT شەشىمدەر مەن جوبالاردى، ونىڭ ىشىندە جاڭادان باستالعان ستارتاپ جوبالاردى ىسكە اسىرۋعا جانە دايىنداۋعا ارنالعان؛
«بيزنەس» – ەكونوميكانىڭ باسىم سەكتورلارىندا جاڭا بيزنەس-يدەيالاردى ىسكە اسىرۋعا ارنالعان؛
«مەديا» – جاڭا مەديا جوبالاردى، ونىڭ ىشىندە جاستار ءۇشىن تانىمدىق، پايدالى، قىزىقتى كونتەنت قۇرۋ جونىندەگى جوبالاردى ىسكە اسىرۋعا ارنالعان.
ۇمىتكەرلەردىڭ كونكۋرستىق وتىنىمدەرى (قاعاز نۇسقادا) اعىمداعى جىلعى 14 تامىزعا دەيىن مىنا مەكەنجاي بويىنشا قابىلدانادى: نۇر-سۇلتان قالاسى، ماڭگىلىك ەل داڭعىلى، 8، «مينيسترلىكتەر ءۇيى» اكىمشىلىك عيماراتى (14-كىرەبەرىس)؛ بايلانىس نومىرلەرى: 8(7172)74-12-78، 8(702-000-88-12)، (ەلەكتروندىق نۇسقاسى) generation.kaz@gmail.com پوشتاسىنا قابىلدانادى.
كونكۋرستىق وتىنىمدەر مەملەكەتتىك جانە (نەمەسە) ورىس تىلدەرىندە قابىلدانادى جانە:
1) نىسان بويىنشا جوبانىڭ سيپاتتاماسى؛
2) جوبانىڭ بەينە-تانىستىرىلىمى (60 سەكۋندتان اسپايدى)؛
3) شىعىستار سمەتاسىنىڭ جوباسى؛
4) زياتكەرلىك مەنشىك تۋرالى مالىمەتتەر (بار بولسا) قامتىلۋى ءتيىس.
ايتا كەتەيىك، 2021 جىلى تاۋەلسىزدىك كۇنى قارساڭىندا مەملەكەت باسشىسى ق.ك. توقايەۆ ەلىمىزدىڭ 30 جاس ازاماتىنا «تاۋەلسىزدىك ۇرپاقتارى» گرانتىن تابىس ەتتى. ونىڭ ىشىندە 5 جاس ادام «مادەنيەت» باعىتى بويىنشا، 6 ادام - «عىلىم»، 5 ادام - «اقپاراتتىق تەحنولوگيالار»، 5 ادام - «مەديا»، 9 ادام - «بيزنەس». ق ر مەملەكەتتىك حاتشىسىنىڭ 2022 جىلعى 25 اقپانداعى №2 وكىمىمەن گرانت الۋشىلار نامۋرادين ايسانا مەن ناۋموۆا دينارا ق ر پرەزيدەنتىنىڭ جانىنداعى جاستار ساياساتى جونىندەگى كەڭەستىڭ قۇرامىنا كىردى.