قازاقستاندىقتاردىڭ كوڭىلى قانداي سالالارعا تولمايدى
ساۋدا جانە ينتەگراسيا مينيسترلىگى تۇتىنۋشىلاردىڭ قۇقىعىن قورعاۋ كوميتەتىنىڭ ءتوراعاسى اسقار تىنىسبەكوۆ قازاقستاندىقتار قاناعاتتانبايتىن سالالار مەن ونىڭ سەبەبىن ايتىپ بەردى، دەپ حابارلايدى قازاقپارات ءتىلشىسى.
«قازاقستاندىق تۇتىنۋشىلار ەڭ الدىمەن مەديسينالىق قىزمەتتەرگە (9،3%) قاناعاتتانبايتىن بولىپ شىقتى. ناقتىراق ايتقاندا، مەديسينالىق پەرسونالدىڭ دورەكىلىگى، ۇزىنسونار كەزەك جانە ساپاسىز كورسەتىلگەن مەديسينالىق قىزمەتتەرگە كوڭىلى تولمايدى. ەكىنشى ورىندا - بايلانىس، ونىڭ ىشىندە ينتەرنەت (33،3%). ياعني ابونەنتتىك تولەماقىنى زاڭسىز ءوسىرۋ، ساپاسىز ينتەرنەت، سول سياقتى تاريفتىك جوسپاردىڭ قۇنىن ۇلعايتۋ جانە وزگەرتۋگە قاتىستى»، - دەدى اسقار تىنىسبەكوۆ ورتالىق كوممۋنيكاسيالار قىزمەتى الاڭىندا وتكەن باسپا ءسوز ءماسليحاتىندا.
ونىڭ ايتۋىنشا، وتانداستارىمىز قاناعاتتانبايتىن كەلەسى سالا - قوعامدىق كولىك جۇمىسى (30،7%).
«اتاپ ايتقاندا، جولاۋشى تاسىمالداۋ ەرەجەسىنىڭ بۇزىلۋى، پەرسونالدىڭ دورەكىلىگى، جولاقىسىن قولما-قول جانە ونلاين ەسەپ ايىرىسۋداعى باعا ايىرماشىلىعى. كەلەسى - قوعامدىق ورىندا تاماقتانۋ قىزمەتى (24،4%). ول جەردە دە دورەكىلىك جانە ساپالى قىزمەت كورسەتپەۋ، بۇلىنگەن تاماق جانە سانيتارلىق-گيگيەنالىق نورمالاردىڭ ساقتالماۋى»، - دەيدى ول.