پارلامەنت پالاتالارىنىڭ بىرلەسكەن وتىرىسىندا دەپۋتاتتار ۇكىمەتتىڭ 2022 جىلعى بيۋدجەت ەسەبىن تالقىلاپ جاتىر، دەپ حابارلايدى Almaty-akshamy.kz.
دەپۋتات اناس باققوجايەۆ ۇكىمەت باسشىسى ءاليحان سمايىلوۆقا مەملەكەتتىك قارىز بويىنشا سۇراق قويدى، دەپ جازدى Azattyq Ruhy.
«ءاليحان اسحان ۇلى، مەملەكەتتىك بورىشتىڭ كولەمىن ازايتۋ ءۇشىن قانداي شارالاردى قولدانىپ جاتىرسىزدار؟ سونداي-اق مەملەكەتتىك بورىشقا بايلانىستى ورتاشا جانە ۇزاق مەرزىمدەگى پەرسپەكتيۆالار بويىنشا بولجام قانداي؟»، - دەدى ول.
پرەمەر-مينيستر ءاليحان سمايىلوۆ مەملەكەتتىك بورىشتى ازايتۋ ماسەلەسى ۇكىمەتتىڭ تۇراقتى نارازارىندا ەكەنىن ايتتى.
«وسى سالاداعى جۇمىس حالىقارالىق تاجىريبەگە سايكەس كەلەدى. ءقازىر بورىش ءقاۋىپسىز دەڭگەيىندە قالىپتاسىپ وتىر. ول جالپى ىشكى ءونىمنىڭ 24،7% قۇرايدى. مەملەكەتتىك بورىشتى ازايتۋ جانە وعان بايلانىستى بيۋدجەت شىعىستارىن ازايتۋ ماسەلەسىن شەشۋ ءۇشىن ۇكىمەت ءبىرقاتار شارا قابىلداپ جاتىر. بىرىنشىدەن، رەسپۋبليكالىق بيۋدجەتتىڭ تاپشىلىعىن جالپى ىشكى ونىمگە 2،7%-دان كەزەڭ-كەزەڭىمەن ءارى قاراي تومەندەتۋ. ول جاڭا قارىزداردى الۋعا جانە شىعىستاردىڭ ءوسۋىن شەكتەۋگە مۇمكىندىك بەرەدى. ەكىنشىدەن، بيۋدجەتتىڭ ءوز كىرىسىن ۇلعايتۋ. ول ءۇشىن سالىقتىق جانە كەدەندىك اكىمشىلەندىرۋ جەتىلدىرىلەدى، سيفرلاندىرۋ جالعاسادى»، - دەدى سمايىلوۆ.
ونىڭ ايتۋىنشا، وتكەن جىلدىڭ قورىتىندىسى بويىنشا رەسپۋبليكالىق بيۋدجەتتىڭ ءوز كىرىسى 42% ءوستى.
«بيىلعى ءوسىم 40% بولادى دەپ جوسپارلاپ وتىرمىز. وسىنداي جوعارى قارقىندى ءارى قاراي قامتاماسىز ەتۋىمىز كەرەك. ۇشىنشىدەن، قارىزدى نەگىزىنەن ىشكى نارىقتان تەڭگەمەن الۋعا باسىمدىق بەرىپ وتىرمىز. ول ۆاليۋتالىق تاۋەكەلدى ازايتۋعا مۇمكىندىك بەرەدى. تورتىنشىدەن، مەملەكەتتىك باعالى قاعازداردى حالىقارالىق يندەكستەرگە ەنگىزۋ. سونىڭ نەگىزىندە حالىقارالىق دەپوزيتارييلەردى تارتۋ. ول بىزگە شەتەلدىك ينۆەستورلاردى كەڭىنەن ىشكى قور نارىعىنا تارتۋعا مۇمكىندىك بەرەدى جانە قارىز الۋدىڭ قۇنىن تومەندەتەدى. جالپى الداعى 5 جىلدا مەملەكەتتىك بورىش ءقاۋىپسىز دەڭگەيدە قالىپتاسادى. جالپى ىشكى ءونىمنىڭ 25%-نان اسپايدى دەپ بولجاپ وتىرمىز»، - دەدى ءاليحان سمايىلوۆ.