بۇگىنگىندە پارك اۋماعىندا 2 كومپانيا جولاۋشىلار تاسىمالىمەن اينالىسىپ جاتىر
كاسىپكەرلەرگە ەلەكتر كولىكتەرىمەن تاسىمالداۋدى جۇزەگە اسىرۋ ءۇشىن «مەدەۋ» پاركىمەن كەلىسىم جاساۋ ۇسىنىلدى. بيزنەس وكىلدەرى بۇل باستامانى پروكۋراتۋرامەن بىرلەسىپ، الماتى قالاسىنىڭ كاسىپكەرلەر پالاتاسى الاڭىندا تالقىلادى، دەپ حابارلايدى Almaty-akshamy.kz.
الماتى كاسىپكەرلەر پالاتاسىنىڭ اكىمشىلىك كەدەرگىلەردى ازايتۋ ءبولىمىنىڭ باستىعى نۇربول اشەربەكوۆ جيىندى اشا وتىرىپ، ەلەكتر كارلاردىڭ مەملەكەتتىك ورگاندارمەن ەرەكشە قورعالاتىن اۋماقتىڭ اشىق ايماعىنا كىرۋىن شەكتەۋ ماسەلەسى بىرنەشە رەت تالقىلانعانىنا قاراماستان، ماسەلە ءالى دە اشىق كۇيىندە قالىپ وتىرعانىن اتاپ ءوتتى.
«تاراپتاردىڭ بىرنەشە رەت كەلىسسوزدەرىنەن كەيىن پروكۋراتۋرا، «مەدەۋ» پاركى جانە الماتى كاسىپكەرلەر پالاتاسىنىڭ وكىلدەرى مەموراندۋمعا قول قويۋ تۋرالى شەشىم قابىلدادى»، – دەدى سپيكەر.
بۇل كەلىسىم ەرىكتى جانە كاسىپكەرلەردىڭ قۇقىعى مەن مىندەتتەرىن قامتيدى. پروكۋراتۋرا وكىلى مەموراندۋم بارلىق كاسىپكەرلەرمەن جاسالاتىنىن اتاپ ءوتتى.
«پارك باسشىلىعىنىڭ اۋماققا كىرۋگە قاتىستى زاڭسىز ارەكەتتەرىنىڭ بولعانىن راستايمىز. ءبىز جاسىل ەكونوميكا باسقارماسىمەن، «مەدەۋ» پاركىنىڭ باسشىلىعىمەن كەلىسسوز جۇرگىزدىك جانە بۇل مەموراندۋم ىنتا بىلدىرگەن بارلىق كاسىپكەرمەن جاسالادى دەگەن كەلىسىمگە كەلدىك»، – دەدى پروكۋراتۋرا وكىلى سۆەتلانا كيم.
قۇجاتتى ازىرلەۋشىلەر مەملەكەتتىك ورگانداردڭ تاراپىنان كاسىپكەرلەردىڭ قىزمەتىنە ارالاسۋ بولمايتىنىن ايتتى. بۇل باستاما پاركككە كىرەتىن ماشينالارعا قاتىستى ۇسىنىلدى:
«ەشكىم پارك اۋماعىنا كىرۋ ۋاقىتىن جانە پارككە اكەلىنگەن ادامداردىڭ سانىن بەلگىلەمەيدى. «ەرەكشە قورعالاتىن تابيعي اۋماقتار تۋرالى» زاڭ بار، وعان سايكەس كاسىپكەرلەر، مىسالى، تاستالعان قوقىس، رۇقسات ەتىلمەگەن اۆتوتۇراقتار ءۇشىن جاۋاپ بەرەدى»، – دەپ ءتۇسىندىردى پروكۋراتۋرا وكىلى.
بۇگىنگى تاڭدا پارك اۋماعىندا 2 كومپانيا جولاۋشىلار تاسىمالىمەن اينالىسىپ جاتىر، تاعى 5 كومپانيا مەموراندۋمعا قول قويىپ، جاقىن ارادا جۇمىسىن باستايدى.
تاسىمالداۋشىلار بولسا مەموراندۋم كەدەرگى بولادى دەپ سانايدى. ويتكەنى پارك جەتەكشىلىگى اۆتوتۇراق ورىندارىن باقىلاي المايدى.
«الماتىدا ءقازىر ەلەكتر ماشينالارعا ترەند ءجۇرىپ جاتىر. بۇگىندە «مەدەۋ» پاركىندە تىركەلگەن كولىك سانى 600-عا جۋىق. بىلتىر عانا بۇل كورسەتكىش 60 ماشينا اينالىسىندا بولعان. ەكى جىلدان كەيىن كورسەتكىش 10 مىڭ بىرلىككە دەيىن جەتۋى مۇمكىن. وسىنداي اعىندى پارك قالاي باقىلاي الادى؟»، – دەپ سۇراق قويدى Blu Sky ج ش س تاسىمالداۋشى كومپانيانىڭ وكىلى.
«مەدەۋ» ۇلتتىق پاركى ديرەكتورىنىڭ ورىنباسارى الماس اتتاپحانوۆ اۋماقتا تۇراق ورىندارىنىڭ سانى شەكتەۋلى ەكەنىن راستادى. ەلەكتروموبيلدەردىڭ ءبىر بولىگى «مەدەۋ» پاركى ارقىلى «شىمبۇلاق» تاۋ شاڭعى كۋرورتىنىڭ مەيرامحانالارىنا ترانزيتپەن وتەدى.
«ەگەر دەمالىس كۇندەرى بارلىعى جاپپاي كىرسە، وندا كولىكتەردى جۇپ جانە تاق ساندار بويىنشا كىرگىزۋ تۋرالى ويلانۋ كەرەك شىعار؟ ءقازىر مۇنداي ماسەلە تۇرعان جوق. ويتكەنى مۇنداي اعىن ازىرگە جوق. كەلەر شاقتا بۇل ماسەلەگە قايتا ورالۋىمىز كەرەك»، – دەدى نۇربول اشەربەكوۆ.