مەدەۋدە اناتوليي بۋكرەيەۆتىڭ ءمۇسىنى ورناتىلدى

مەدەۋ شاتقالىندا كورنەكتى قازاقستاندىق الپينيست اناتوليي بۋكرەيەۆ ءمۇسىنىنىڭ سالتاناتتى اشىلۋى ءوتتى.

سالتاناتتى راسىمگە الماتى اكىمىنىڭ ورىنباسارى ارمان قىرىقبايەۆ، ءمۇسىنشى نۇرلان دالباي، الپينيزمنەن قازاقستان قۇراماسىنىڭ باس جاتتىقتىرۋشىسى، تالىمگەر جانە بۋكرەيەۆتىڭ دوسى ەرۆاند يلينسكيي، جۋرناليست جانە اتى اڭىزعا اينالعان ءالپينيستىڭ كۇندەلىكتەرىنە نەگىزدەلگەن بۋكرەيەۆ تۋرالى «ناد وبلاكامي» كىتابىنىڭ اۆتورى گالينا مۋلەنكوۆا جانە تاعى باسقالار قاتىستى، دەپ حابارلايدى Almaty-akshamy.kz.

ءمۇسىننىڭ اۆتورى – نۇرلان دالباي. ول اناتوليي بۋكرەيەۆتى قۇزعا شىعار الدىندا ءسال دەمالىپ تۇرعان كەيپىندە بەينەلەگەن. ءالپينيستىڭ قولى مۇز شاپقىشقا ءتيىپ تۇر. ءمۇسىن نۇرلان سماعۇلوۆ قورىنىڭ باستاماسىمەن جانە قولداۋىمەن ورناتىلدى.

بۇل - نۇرلان سماعۇلوۆ قورىنىڭ قالا تۇرعىندارىنا بەرگەن ءۇشىنشى ءمۇسىنى. مەسەناتتىڭ جوسپارى بويىنشا، قالامىزدا كورنەكتى الماتىلىقتار مۇسىندەرىنىڭ سەرياسى پايدا بولۋى ءتيىس.

العاشقىسى - شاكەن ايمانوۆتىڭ ءمۇسىنى. ول 2019 جىلى «الماتى» قوناق ءۇيىنىڭ جانىنا ورناتىلعان بولاتىن. بۇل – سول كەزدەگى شىعارماشىلىق زيالى قاۋىم جينالىپ، «تاقيالى پەرىشتە» كينوسى تۇسىرىلگەن جەر.

ەكىنشىسى - گەرولد بەلگەردىڭ ءمۇسىنى 2021 جىلى اشىلدى. ول گەرولد كارلوۆيچ سوڭعى جىلدارى تۇرعان ءۇيدىڭ جانىندا ورنالاسقان. قولا ورىندىق مەتر دەمالىپ وتىرۋدى ۇناتاتىن ورىندىقتى الماستىردى. قازىرگى ۋاقىتتا «سۇيىكتى دارىگەرىمىز» يۋريي پومەرانسيەۆتىڭ ءمۇسىنى دايىندالۋدا. ءمۇسىن بيىل يۋ.م. لەرمونتوۆ اتىنداعى تەاتردىڭ جانىنا ورناتىلادى.

2023 جىلدىڭ 16 قاڭتارىندا بۋكرەيەۆ 65 جاسقا تولار ەدى. اناتوليي نيكولايەۆيچ – بيىك تاۋداعى الپينيست، ەڭبەك سىڭىرگەن سپورت شەبەرى،«قار بارىسى» اتاعىنىڭ يەگەرى، سەگىز مىڭدىق پلانەتانىڭ 14 تاۋىنىڭ 11ء-ىن جانە ءتورت رەت ەۆەرەستى باعىندىرعان.  ونىڭ ەۆەرەستكە كوتەرىلۋىنىڭ ءبىرى بالتازار كورماكۋردىڭ «ەۆەرەست» گولليۆۋدتىق ءفيلمىنىڭ نەگىزى بولدى. اناتوليي بۋكرەيەۆ – «ەرلىگى ءۇشىن» وردەنىنىڭ يەگەرى (1989)، ءوز ومىرىنە ءقاۋىپ تونە تۇرسا دا، تاۋدا ادامداردى قۇتقارعان الپينيستەرگە بەرىلەتىن امەريكاندىق الپينيزم كلۋبىنىڭ ەڭ جوعارى ناگراداسى — ديەۆيد سوۋلس مەدالىنىڭ يەگەرى (1997)، قايتىس بولعاننان كەيىن «ەرلىگى ءۇشىن» قازاقستاندىق مەدالىمەن ماراپاتتالدى (1998).