بۇل – ەشقانداي تالقىلاۋدى قاجەت ەتپەيتىن ادىلەتتى تالاپ.
ءماجىلىس دەپۋتاتى امانجول ءالتاي 31 مامىر – ساياسي قۋعىن-سۇرگىن قۇرباندارىن ەسكە الۋ كۇنى بولعاندىقتان، مەكتەپتەردەگى سوڭعى قوڭىراۋ كۇنىن باسقا كۇنگە اۋىستىرۋدى تالاپ ەتتى، دەپ حابارلايدى Almaty-akshamy.kz
ماجىلىسمەننىڭ ساۋالىنا وقۋ-اعارتۋ ءمينيسترىنىڭ 2022 جىلعى 12 تامىزداعى 363 بۇيرىعىنا سايكەس، ورتا ءبىلىم بەرەتىن مەكتەپتەردەگى سوڭعى قوڭىراۋ كۇنىنىڭ 31 مامىر بولىپ بەكىتىلۋى سەبەپ بولعان.
امانجول ءالتاي قازاقستاندا 31 مامىر - اشارشىلىق جانە ساياسي قۋعىن-سۇرگىن قۇرباندارىن ەسكە الۋ كۇنى بولىپ بەلگىلەنگەنىن ەسكە سالدى.
«الاش ارىستارىنىڭ مۇراتىن جالعاستىرىپ، اماناتىن ۇرپاق ساناسىنا سىڭىرۋگە ءتيىستى مينيسترلىكتىڭ 31 مامىر كۇنىنىڭ ماڭىزىنا ءمان بەرمەگەنى قانداي وكىنىشتى! ارىستارىمىزدىڭ رۋحىنا ءبىر كۇندى دە قيماي، اپىل-عۇپىل ازا تۇتقانسىپ، ىلە-شالا توي تويلاپ، دۋمانداتىپ كەتە بەرەتىن بولساق، ەلدىگىمىز قايسى؟! سوندىقتان مەكتەپتەردەگى سوڭعى قوڭىراۋ كۇنىن 30 مامىرعا، نە بولماسا 1 ماۋسىمعا اۋىستىرۋ كەرەك. بۇل – ەشقانداي تالقىلاۋدى قاجەت ەتپەيتىن ادىلەتتى تالاپ»، - دەدى ءالتاي پرەمەر-مينيستردىڭ ورىنباسارى التاي كولگىنوۆكە جولداعان دەپۋتاتتىق ساۋالىندا.
سونداي-اق دەپۋتات 31 مامىر كۇنى ادامداردى الەۋمەتتىك جەلىلەردەگى ەلدىڭ بىرلىگىنە، مادەنيەتىنە نۇقسان كەلتىرەتىن تەرىس ادەتتەردەن تىيىلۋعا شاقىردى.
«31 مامىر – ازاتتىق ءۇشىن ارپالىسىپ وتكەن، مەملەكەت قۇرۋ جولىندا مەرت بولعان، ۇلت ءۇشىن اتىلعان، ۇرپاق باقىتى ءۇشىن ازاپ شەككەن اسىل بابالار الدىنداعى پارىزىمىزدى پايىمدايتىن، الاش اماناتىنا ادال بولۋعا قۇلشىناتىن كۇن. ۇكىمەت وسى كۇننىڭ ءمان-ماڭىزىنا لايىقتى شارالاردى ىسكە اسىرۋى ءتيىس»، - دەدى دەپۋتات.
وسىعان بايلانىستى امانجول ءالتاي ۇكىمەتكە مىناداي شارالار قابىلداۋدى سۇرادى:
- «جالپى حالىقتىق ءۇنسىز ەسكە الۋ مينۋتى» شاراسىن ءداستۇرلى تۇردە وتكىزۋى كەرەك. سول ساتتە ەل اۋماعىنداعى بۇكىل كولىك قوزعالىسى توقتاتىلىپ، ءبىر مينۋتتىق ۇنسىزدىك ارقىلى ساياسي قۋعىن-سۇرگىن جانە اشارشىلىق قۇرباندارىن ەسكە الۋ قاجەت؛
- مەكتەپتەردەگى سوڭعى قوڭىراۋ كۇنى 31 مامىردان باسقا كۇنگە اۋىستىرىلسىن؛
- تەلەارنالاردا ءازىل-قالجىڭ، شوۋ باعدارلامالار، ەسترادالىق كونسەرتتەر توقتاتىلىپ، ونىڭ ورنىنا ەل تاريحىنداعى قاسىرەتتى كۇندەردى جاس ۇرپاقتىڭ تۇسىنۋىنە جول اشاتىن مازمۇندى باعدارلامالار كورسەتىلۋى ءتيىس؛
- اقپاراتتىق قۇرالداردا اتاۋلى كۇننىڭ تاريحي سالماعىن، تاعىلىمدىق ماعىناسىن جان-جاقتى جەتكىزەتىن ماقالالار جاريالانسىن. سول كۇنى مەيرامحانالاردا توي وتكىزۋگە تىيىم سالىنسىن؛
- 31 مامىر كۇنى ءار اتا-انا وتباسىنداعى ءتالىمدى اڭگىمەسىن، ۇستاز ساباعىن، ءدىن وكىلدەرى ۋاعىزىن، مينيسترلىكتەر مەن اكىمدىكتەر، مەملەكتتىك مەكەمەلەر جۇمىس كۇنىنىڭ باسىن اشارشىلىق پەن قۋعىن-سۇرگىن قۇرباندارىن ەسكە الۋمەن باستاعانى دۇرىس؛
- بالاباقشالار مەن مەكتەپتەردە، جوعارعى وقۋ ورىندارىندا بالالار مەن جاستارعا ارناۋلى دارىستەر، پىكىرلەسۋ ساعاتتارىن، زيالى قاۋىم وكىلدەرىمەن كەزدەسۋ كەشتەرى وتكىزىلسىن.