بۇل شارا 25 جەلتوقسانعا بەلگىلەنگەن.
الماتىداعى «مەدەۋ» بيىك تاۋلى سپورت كەشەنىنىڭ 50 جىلدىعىنا وراي مۇز ايدىنى اۋماعىندا سالتاناتتى مەرەكە وتەدى، دەپ حابارلايدى Almaty-akshamy.kz
الماتىلىقتار مەن قالا قوناقتارى مانەرلەپ سىرعاناۋدان تانىمال سپورت جۇلدىزدارى رومان كوستوماروۆ، ەۆگەنيا مەدۆەديەۆا، تاتيانا توتميانينا، ماكسيم مارينين، وكسانا دومنينا، ماكسيم شابالين جانە موريس كۆيتەلاشۆيليدىڭ قاتىسۋىمەن بولاتىن شوۋدى تاماشالايدى.
مۇز ايدىنى اۋماعىندا ءبىرقاتار كوڭىل كوتەرەتىن ينتەراكتيۆتى الاڭدار مەن تاريحي ايماقتار بولادى.
مەرەكە كورنەكتى قازاق سپورتشىلارى مەن جاتتىقتىرۋشىلارىنىڭ شەرۋىمەن اشىلادى. سونداي-اق مۇز ايدىنىندا ءوزىنىڭ ەرەكشە باعدارلاماسىمەن قازاقستاندىق مانەرلەپ سىرعاناۋشى، 2019 جىلعى الەم چەمپيوناتىنىڭ كۇمىس جۇلدەگەرى، 2019 جىلعى قىسقى ۋنيۆەرسيادانىڭ كۇمىس جۇلدەگەرى جانە II قىسقى جاسوسپىرىمدەر وليمپياداسىنىڭ قولا جۇلدەگەرى ەليزابەت تۇرسىنبايەۆا ونەر كورسەتەدى.
مەرەكە اياسىندا اناستاسيا يگناتيەۆانىڭ ديريجەرلىك ەتۋىمەن اتى اڭىزعا اينالعان «مۇزدى سيمفونيا» مۇز بالەتى مەن يليا وۆەربۋحتىڭ «جۇرەك تە جانىپ تۇر» گالا-شوۋى وتەدى. سونداي-اق، قوناقتار قازاقتىڭ تۇڭعىش مۇز شوۋى «Olumpic Show» قويىلىمىن تاماشالاي الادى.
مەرەكەنىڭ شارىقتاۋ شەگى -قازاقستاندىق ءارتىس ءارى ءانشى مولدانازاردىڭ كەشكى كونسەرتى. «مەدەۋ» بيىك تاۋلى سپورت كەشەنىنىڭ سالتاناتى مەرەكەلىك تۇنگى وتشاشۋمەن اياقتالادى.
وتەتىن كۇنى مەن ۋاقىتى: 25 جەلتوقسان كۇنى ساعات 13:30-دا باسپا ءسوز ءماسليحاتى بولادى، مەرەكەلىك باعدارلاما ساعات 15:00-دە باستالادى.