2019 جىلى ەنگىزىلگەن بۇل شەكتەۋ 6 اي سايىن ۇزارتىلىپ كەلەدى.
رەسمي ستاتيستيكا بويىنشا، بيىل ەلىمىزدەن شەت مەملەكەتتەرگە ورمان اعاشى شىعارىلعان جوق، دەپ حابارلايدى Almaty-akshamy.kz يندۋستريا جانە ينفراقۇرىلىمدىق دامۋ مينيسترلىگىنە سىلتەمە جاساپ.
9 جەلتوقساننان باستاپ قازاقستان اۋماعىنان اعاش ماتەريالدارىنىڭ جەكەلەگەن ءتۇرىن اكەتۋگە تىيىم سالىندى.
تىيىم وتاندىق تاۋار وندىرۋشىلەردى، اعاش وڭدەۋشىلەردى جانە جيھاز ونەركاسىبىمەن اينالىساتىن كاسىپورىنداردى قولداۋ جانە ورمان قورىن ساقتاۋ ماقساتىندا ەنگىزىلىپ وتىر.
«ەگەر دە ورمان قورى قازاقستان اۋماعىنىڭ شامامەن 15%-ىن الىپ جاتقانىن ەسكەرسەك، وڭدەۋگە تەك 4-5%-ى عانا بەرىلەتىنىن ۇمىتپاۋ قاجەت. بۇل ورايدا قورشاعان ورتانى قورعاپ، ورماندى القاپتى ۇلعايتۋ ءۇشىن ەلىمىزدەن اعاش ماتەريالدارىن اكەتۋگە تىيىم سالىناتىنىن ەسكەرتەمىز. رەسمي ستاتيستيكا بويىنشا، بيىل ەلىمىزدەن شەت مەملەكەتتەرگە ورمان اعاشى شىعارىلعان جوق»، - دەدى يندۋستريالىق دامۋ كوميتەتىنىڭ قۇرىلىس يندۋسترياسى جانە اعاش وڭدەۋ ونەركاسىبى باسقارماسىنىڭ باسشىسى مۇحامەد انداكوۆ.
بۇل بۇيرىقتا تەمىرجول نەمەسە ترامۆاي جولدارىنا ارنالىپ، قىلقان جاپىراقتى تۇقىمداردان جاسالعان اعاش شپالدار ەسەپكە الىنبايدى.