مەدەۋ مۇز ايدىنىندا «جاس Energy» جاپپاي سىرعاناۋ شاراسى ءوتتى
قالالىق پوليسيا دەپارتامەنتى مەن جاستار ساياساتىن دامىتۋ مەملەكەتتىك قورى ۇيىمداستىرعان جيىنعا الماتىنىڭ بەلسەندى ستۋدەنتتەرى قاتىسىپ، تەگىن كونكي تەپتى، دەپ حابارلايدى Almaty-akshamy.kz
تاۋەلسىزدىكتىڭ 30 جىلدىعى قارساڭىندا وتكەن دەمالىس شاراسىندا پاتريوتتىق اندەر شىرقالىپ، ءتۇرلى كورىنىستەر ساحنالاندى.
«وسىنداي ءىس-شارالار جاستاردىڭ الەۋەتىن كوتەرەدى دەگەن ويدامىن. تەك قانا سپورتتىق ەمەس، دەنساۋلىق، كوڭىل كوتەرۋ تۇرعىسىنان تاماشا شارا بولىپ جاتىر»، – دەيدى ستۋدەنت ارمان تاسقالييەۆ.
ودان بولەك، ءتارتىپ ساقشىلارى جاستارعا سالاۋاتتى ءومىر سالتىن ناسيحاتتاۋ ماقساتىندا ەسىرتكىگە قارسى ءتۇسىندىرۋ جۇمىستارىن جۇرگىزىپ، زياندى زاتتاردان اۋلاق بولۋعا شاقىردى. ال ۇيىمداستىرۋشىلار مۇنداي شارالاردى الداعى ۋاقىتتا دا وتكىزۋدى جوسپارلاپ وتىر.
«جاستارعا ايتايىن دەگەنىم، ءبىزدىڭ ۇرانىمىز – سالاۋاتتى ءومىر سالتىن ءسۇرۋ. سپورتپەن اينالىسىڭدار، ءبىز ەسىرتكىگە قارسىمىز»، – دەدى پد ەسىرتكىگە قارسى ءىس-قيمىل باسقارماسى باسشىسىنىڭ ورىنباسارى ساعىندىق اياعانوۆ.
«ءبىز مۇنداي شارالاردى ۇنەمى ۇيىمداستىرىپ وتىرامىز. جاستار قاشاندا بەلسەندى بولۋ كەرەك. قالا جاستارىنا ايتارىم، مۇنداي دەمالىستاردان تىس قالماي، ءبىزدىڭ قاتارىمىزعا قوسىلىڭىزدار»، – دەيدى ۇيىمداستىرۋشى الەكساندرا مارتىنچيك.