قازاقستان قىزدار قۇراماسى «داۋلەت» تەننيس ورتالىعىندا 12 جاسقا دەيىنگىلەر اراسىندا مارەگە جەتكەن ازيا كوماندالىق بىرىنشىلىگىنىڭ (ITF Asian 12&Under Team Championships 2021) چەمپيونى اتاندى، دەپ Almaty-akshamy.kz
قازاقستان تەننيس فەدەراسياسى ءمالىم ەتكەنىندەي، ءمادينا ءراحيمنىڭ شاكىرتتەرى فينالدا ءۇندىستان قۇراماسىن 2:0 ەسەبىمەن ۇتتى. الدىمەن ەۆەلينا بالاگانسكايا كورتقا شىقتى.
ءبىرىنشى پارتيادا قارسىلاسىنا 2:6 ەسەبىمەن ەسە جىبەرگەنىمەن، سودان كەيىن جينالا ءبىلدى – 6:2، 7:5. ەكىنشى كەزدەسۋدە ەۆا كورىشيەۆا ماچتى قارقىندى باستاپ، ءبىرىنشى سەتتە ەسەپتى 4:0-گە جەتكىزدى. كەلەسى گەيمدە قارسىلاسى باسەكەنى جالعاستىرۋدان باس تارتتى.
قازاقستان قۇراماسىنىڭ كاپيتانى ءمادينا راحيم شاكىرتتەرىنىڭ جەڭىس ءۇشىن بار كۇشتەرىن جۇمساعانىن جەتكىزدى. وكىنىشكە قاراي، قازاقستاندىق ۇلدار فينالدا پاكىستان كومانداسىنان جەڭىلىپ قالدى.
شەشۋشى باسەكەدە جۇپتىق سىندا ماديار تاعىبەكوۆ پەن ياروسلاۆ پشەنيچنىي سۋپەر تاي-برەيكتە ۇتىلدى – 4:6، 7:6 (7:5)، 10:12.