جۋرناليستەر مەدەۋ اۋدانىنداعى №33 مەكتەپكە بارىپ، ونداعى جوندەۋ جۇمىسىن كوردى. جاڭارعان عيمارات اۋداننىڭ ءبىلىم بەرۋ ينفراقۇرىلىمىن كەڭەيتىپ، جاڭعىرتۋدى كوزدەيتىن باعدارلامانىڭ ءبىر بولىگىنە اينالدى، دەپ حابارلايدى aqshamnews.kz
«اۋداندا ءبىلىم بەرۋ سالاسىندا 48 مەكەمە جۇمىس ىستەيدى، ولاردىڭ 28ء-ى مەملەكەتتىك تە، 20-سى – جەكە مەنشىك. ءقازىر بۇلاردا شامامەن 36 مىڭ وقۋشى ءبىلىم الىپ جاتىر. ءالى دە 4 500 وقۋشى ورنى جەتىسپەي تۇر. وسى تاپشىلىقتى كەزەڭ-كەزەڭمەن ازايتۋ ماقساتىندا جاڭا مەكتەپ سالىپ، بار مەكەمەلەرگە قوسىمشا قۇرىلىس سالۋدى قولعا الىپ جاتىرمىز»، - دەدى مەدەۋ اۋدانى اكىمىنىڭ ورىنباسارى اسقار نۇرلىبايەۆ.
ءقازىر ەكى مەكتەپتە كۇدەلى جوندەۋ جۇمىس ءجۇرىپ جاتىر. №161 مەكتەپتەگىسى وقۋ جىلىنىڭ باسىنا دەيىن اياقتالماق. سونداي-اق، سامال شاعىن اۋدانىنداعى №30 مەكتەپ «كاسىپكەرلىك مەكتەبى» جوباسىمەن بىرىگىپ، قوسىمشا 400 ورىن پايدا بولادى. قۇرىلىس جۇمىس 2026 جىلدىڭ قىركۇيەك ايىندا اياقتالسا، ءبىلىم بەرۋ جوباسى 2025 جىلدىڭ سوڭىنا دەيىن بىتپەك.
وسى جىلدىڭ قىركۇيەگىنە دەيىن قۇلجا تاس جولىنىڭ وڭتۇستىگىندە 2 000 ورىندىق جاڭا مەكتەپ سالىنىپ بىتەدى. 599 ورىندىق جەكە مەكتەپتىڭ قۇرىلىسى دا ءجۇرىپ جاتىر. «دۋمان» شاعىن اۋدانىندا 1 200 ورىندىق مەنە حاليۋللين كوشەسىندە 300 ورىندىق تاعى ەكى جەكە مەكتەپتىڭ قۇرىلىسى باستالماق. وسىلايشا، كەلەر جىلدىڭ سوڭىنا دەيىن اۋداندا 4 099 جاڭا وقۋشى ورنى پايدا بولماق.
جاڭا عيماراتتاردان بولەك، قولدانىستاعى مەكتەپتەردى كەڭەيتۋ جۇمىستارى دا جۇرگىزىلىپ جاتىر. بيىلدىڭ سوڭىنا دەيىن №35، №99 مەكتەپ پەن نزم-دەگى قوسىمشا قۇرىلىس جۇمىسى اياقتالىپ، بۇل 870 جاڭا ورىن جاساۋعا مۇمكىندىك بەرەدى. قاراشا ايىندا №131 مەكتەپكە قوسىمشا قۇرىلىس باستالادى، ونىڭ اياقتالۋى 2026 جىلعا جوسپارلانعان. سونىمەن قاتار، №168 مەكتەپكە 300 ورىندىق قوسىمشا قۇرىلىس سالاتىن جوبا قۇجاتتاماسى ازىرلەنىپ جاتىر.
مەكتەپكە دەيىنگى ءبىلىم بەرۋ سالاسى دا كەزەڭ-كەزەڭىمەن دامىپ كەلەدى. 2024 جىلدان باستاپ اۋداندا 738 ورىندىق 14 جەكە بالاباقشا اشىلدى. 2025 جىلدىڭ سوڭىنا دەيىن تاعى 500 ورىندىق 10 بالاباقشا اشىلماق. تامىز ايىندا №195 بالاباقشانىڭ كۇردەلى جوندەۋى اياقتالىپ، ونىڭ سىيىمدىلىعى 140 ورىنعا ارتقالى وتىر. №110، 157، 166 مەن 196 بالاباقشا جوندەۋدەن ءوتىپ جاتىر، ول جۇمىس 2025 جىلدىڭ تامىز ايىندا اياقتالادى.