دوستىق كوشەسى - 109 مەكەنجايىنداعى بۇل اۋلا بيىل جوندەلەتىن 60 اۋلانىڭ تىزىمىنە كىرگەن. اۋدان اكىمدىگى مەن وڭىرلىك كوممۋنيكاسيالار قىزمەتى ۇيىمداستىرعان پرەسس-تۋر كەزىندە جۋرناليستەر وسىنداعى جوندەۋ جۇمىسىمەن تانىستى.
مەدەۋ اۋدانىندا 536 اۋلا بار، ونىڭ 414ء-ى مەملەكەتتىك تۇرعىن ءۇي قورىنا جاتادى. سولاردىڭ اراسىنداعى ەڭ كوبىرەك توزعانىنا كۇردەلى جوندەۋ جۇرگىزىلىپ جاتىر. جۇمىس مامىر ايىندا باستالعان. جوبا اياسىندا بالالار مەن سپورت الاڭى سالىنىپ، جارىق قويىلىپ، كوگالداندىرۋ جاعى قولعا الىنىپ، دەمالۋ ءۇشىن قولايلى ايماقتار جاسالا باستادى. بارلىق جۇمىستى كۇزدىڭ سوڭىنا دەيىن اياقتاماق ويدا. جوباعا 2،6 ميلليارد تەڭگە بولىنگەن.
سونىمەن قاتار، اۋدان بويىنشا «حالىق قاتىساتىن بيۋدجەت» باعدارلاماسى اياسىندا 34 جوبا جۇزەگە اسىپ جاتىر. 650-دەن استام تۇرعىننىڭ ۇسىنىسى قارالىپ، وسى ماقساتقا 2 ميلليارد تەڭگە ءبولىنىپتى. 2025 جىلدىڭ مامىرىنان قىركۇيەك ايىنا دەيىن باعدارلاما بويىنشا 22 اۋلانى جوندەپ شىقپاق.
«اۋدان اۋماعىندا اۋلالاردى كۇردەلى جوندەۋ مەن اعىمداعى جوندەۋ جۇمىستارى كەزەڭ-كەزەڭىمەن جۇرگىزىلىپ جاتىر. حقب اياسىندا 22 اۋلا جاڭارتىلدى. ونىڭ ىشىندە جابىنداردى اۋىستىرۋ، سىرتقى جارىقتاندىرۋ مەن كىشى ارحيتەكتۋرالىق نىسانداردى ورناتۋ بار»، - دەدى مەدەۋ اۋدانى اكىمىنىڭ ورىنباسارى ازات كاكەتايەۆ.
اكىمدىكتەگىلەر اتاپ وتكەندەي، 2023 جىلى 80 اۋلادا اعىمداعى جوندەۋ جۇمىس جۇرگىزىلىپ، حقب باعدارلاماسى بويىنشا 27 اۋلانى اباتتاندىرىپ شىققان. 2024 جىلى 13 اۋلانى جوندەپ، 46 اۋلاعا حقب باعدارلاماسى بويىنشا اباتتاندىرۋ جۇمىسى جۇرگىزىلدى. 2026 جىلعا دەيىن تاعى 31 اۋلانى كۇردەلى جوندەۋدەن وتكىزۋ جوسپارلانىپ وتىر.
مەدەۋ اۋدانىندا اۋلا اۋماقتارىن جاڭارتۋ جۇمىستارىن تۇرعىنداردىڭ پىكىرىن ەسكەرە وتىرىپ قولعا الىپ جاتىر. مۇنداي جوبالار اۋداننىڭ كوككە ورانىپ، قولايلى جەرگە اينالۋىنا سەپ بولماق.