وڭىرلىك كوممۋنيكاسيالار قىزمەتى ۇيىمداستىرعان باسپا ءسوز تۋرى «مۇزتاۋ» شاعىن اۋدانىنداعى سۋمەن جابدىقتايتىن قۇرىلىس الاڭىندا ءوتتى. مەدەۋ اۋدانىنىڭ اكىمى ەركەبۇلان ورازالين جۋرناليستەرگە ينجەنەرلىك ينفراقۇرىلىمنىڭ ەڭ ءىرى جوبالارىنىڭ ىسكە اسىرىلۋ بارىسىمەن تانىستىردى، بۇل جوبالار 65 مىڭنان استام تۇرعىندى قامتىماق، دەپ حابارلايدى aqshamnews.kz
«بالقاش» تازا سۋ قويماسىنان «مۇزتاۋ» شاعىن اۋدانىنا دەيىن جالعاساتىن مەدەۋ اۋدانىنداعى 2،2 شاقىرىمدىق قوسالقى ماگيسترالدىڭ قۇرىلىسى اياقتالىپ قالدى. 2024 جىلدىڭ قازان ايىندا باستالعان جوبا 2 000-نان استام تۇرعىندى ساپالى سۋمەن قامتاماسىز ەتۋدى جوسپارلاپ وتىر. جۇمىس 2025 جىلدىڭ قىركۇيەك ايىنىڭ سوڭىنا دەيىن اياقتالماق.
سۋدى ۇزبەي بەرىپ، كارىز جۇيەسىمەن قامتاماسىز ەتەتىن «مۇزتاۋ» شاعىن اۋدانىنداعى قۇرىلىس جۇمىسى ۇلكەن باعدارلامانىڭ ءبىر بولىگى عانا ەكەنىن ايتادى مەدەۋ اۋدانىنىڭ اكىمى ەركەبۇلان ورازالين.
«ءبىز نەگىزگى جۇمىستاردى اياقتاپ قالدىق. ءقازىر اسفالت جابىنىن قالپىنا كەلتىرىپ جاتىرمىز. ودان سوڭ اباتتاندىرۋعا كىرىسەمىز. بارلىق جۇمىستى قىركۇيەك ايىنا دەيىن، گيدراۆليكالىق سىناقتارمەن بىرگە اياقتاپ، نىساندا سول كەزدە ىسكە قوسامىز»، – دەدى اۋدان اكىمى.
2023-2024 جىلدارى «كامەنسكوە پلاتو»، «كولساي»، «يۋبيلەينىي» شاعىن اۋداندارى مەن حاليۋللين كوشەسىندە 11،6 شاقىرىمنان اساتىن سۋ جەلىلەرى سالىندى، بۇل 13 مىڭنان استام ادامدى سۋمەن قامتاماسىز ەتتى. «كامەنسكوە پلاتو» اۋدانىندا بۇرىن سۋ تاپشى ەدى، ەندى ول ماسەلە شەشىلدى.
«2024 جىلى ءبىز ءىرى سۋ جەتكىزۋ نىسانىن پايدالانۋعا بەرەتىنىمىزدى ايتقانبىز. ول سكۆاجينامەن، رەزەرۆۋارلارمەن جابدىقتالادى. بۇل مىندەتىمىزدى ورىندادىق: 12 ۇڭعىمانى بۇرعىلاپ، ءارقايسىسى 6 مىڭ تەكشە مەتر بولاتىن ەكى ۇلكەن رەزەرۆۋار سالىندى وسى جولى»، – دەدى ەركەبۇلان ورازالين.
سونداي-اق، وتكەن جىلى دا سۋ جەتپەگەن شاعىن اۋداندارعا سۋ قوسىلدى:
«بۇرىن سۋدى بۇلاقتان الىپ كەلگەن ايماقتارعا دا سۋ قۇبىرى تارتىلدى. «كولساي» مەن «يۋبيلەينىي» شاعىن اۋدانىنا، مىسالى»، – دەپ قوستى اكىم.
2024 جىلى جوبا «كەڭساي»، «دۋمان» شاعىن اۋداندارىندا، جەكە سەكتوردا، س. نۇرماعامبەتوۆ، ر. باعلانوۆا، ماڭعىستاۋ مەن باسقا كوشەلەردى دە قامتىدى. جاڭا جەلىلەردىڭ جالپى ۇزىندىعى 67،6 شاقىرمعا جەتتى، بۇل 22،7 مىڭ ادامدى قامتىدى. تاۋلى ايماقتاردا سۋمەن جابدىقتاۋعا، كارىز جۇيەسىنە ەرەكشە كوڭىل بولىنگەن:
«تاۋلى ايماقتارداعى تۇرعىندار سەپتيكتى پايدالانادى، بۇل ءقاۋىپتى. ىلعالدانعاننان كەيىن جەر سىرعىپ كەتۋى مۇمكىن. سوندىقتان ءبىز وعان جاعالاستىرىپ كارىز جۇيەسىن دە سالىپ جاتىرمىز»، – دەيدى اۋدان اكىمى.
بيىل «الاتاۋ»، «كامەنسكوە پلاتو»، «گورنىي گيگانت» شاعىن اۋدانىندا، رىسقۇلوۆ، قۇلجا تاس جولى، شىعىس اينالما جولى مەن تايىروۆ كوشەسىندە 116 شاقىرىم بولاتىن جاڭا ينجەنەرلىك جەلى سالىنادى. قولعا الىنىپ جاتقان بۇل جۇمىس 19 مىڭ تۇرعىننىڭ ءومىرىن جاقسارتۋعا ىقپال ەتپەك.
2026 جىلى «اسقارتاۋ» مەن «يۋبيلەينىي» شاعىن اۋدانىندا جۇمىس جالعاسادى. «كەڭساي»، «الاتاۋ»، «زەلەنستروي» جق، «رادۋگا» مەن «ميچۋرينەس» اۋماقتارىنىڭ دا جوبالىق-سمەتالىق قۇجاتى ازىرلەنىپ جاتىر.
اكىمنىڭ ايتۋىنشا، بارلىق جوبا اياقتالعاننان كەيىن اۋداندى سۋ مەن كارىز جۇيەلەرىمەن قامتاماسىز ەتۋ جاعى 100%-عا جۋىقتاماق:
«وسى جوبالار ساتىمەن ىسكە اسسا، 2-3 جىل ىشىندە مەدەۋ اۋدانىنىڭ تۇرعىندارىن ورتالىقتاندىرىلعان سۋمەن، كارىز جۇيەسىمەن 98%-عا قامتاماسىز ەتەمىز»، – دەپ سەندىردى ەركەبۇلان ورازالين.
مەدەۋ اۋدانىنداعى ينجەنەرلىك ينفراقۇرىلىمدى دامىتۋ بارىسىندا بۇرىننان كەلە جاتقان ماسەلەلەردى شەشىمىن تاۋىپ، تاۋلى اۋدانداعى تۇرعىنداردى تازا اۋىزسۋ مەن ءقاۋىپسىز كارىز جۇيەسىنە قوسۋعا مۇمكىندىك بەردى.