فرانسيا قۇراماسىنىڭ شابۋىلشىسى كيليان مباپپە ەۋروپا چەمپيوناتىنىڭ العاشقى تۋرىنىڭ اۆستريامەن وتكەن ماچىندا جاراقات الىپ قالدى، دەپ حابارلايدى اlmaty-akshamy.kz.
ازىرگە ەۋرو فرانسۋز جۇلدىزى ءۇشىن كۇردەلى تۋرنير بولىپ تۇر. الەم چەمپيوناتتارىنداعى 14 ماچتا 12 گولمەن كوزگە تۇسكەن مباپپە ەۋروپا بىرىنشىلىگىندە مەرگەندىك تانىتا الماي-اق قويدى. قۇراماسىنىڭ العاشقى ويىنىندا دا كيليانعا ارتىلعان ءۇمىت زور بولدى. ءبىراق بۇل جولى دا ساتتىلىك جولداس بولمادى. قارسىلاس قاقپاشىسىمەن جەكە دارا قالعان ونىڭ سوققىسى قاقپادان قيىس كەتتى.
ءيا، بۇل ماچتا فرانسيا جەڭگەنىمەن، ونىڭ وزىندە جالعىز گولدى اۆستريا فۋتبولشىسى ماكسيميلليان يوبەر ءوز قاقپاسىنا باعىتتاپ الدى.
تابلوداعى ءبىر گول ايىرماشىلىعى ەكى كومانداعا دا ۇلكەن جاۋاپكەرشىلىك جۇكتەگەندەي. سوندىقتان ويىندا فۋتبولشىلاردىڭ قاقتىعىسىنا كوپ كۋا بولدىق. بىردە باۋمگارتنەر قاقپاشى ميك مەنياننىڭ بەتىنە بۋتسىمەن تەبە جازداعانى ءۇشىن سارى قاعاز السا، تاعى بىردە انتۋان گريزمانن جارناما باعانىنا وڭباي سوعىلىپ، ماڭدايى جارىلدى.
جانكۇيەرلەردىڭ جانىن ۇشىرعان ءسات، ارينە، كوشباسشى مباپپەنىڭ تۇمسىعىنىڭ بۇزىلۋى. اۆستريالىق قورعاۋشى كيەۆين دانزومەن دوپقا تالاستا مباپپە ونىڭ يىعىنا مۇرنىمەن سوعىلىپ، كوپشىلىك شابۋىلشىنىڭ مۇرنىنان قان كەتكەنىن كوردى. باستاپقىدا ونىڭ جاراقاتى كۇردەلى، وپەراسيا قاجەت، سوندىقتان كيليان الداعى ويىندارعا قاتىسا الماۋى مۇمكىن دەگەن اقپارات تاراعان. ونىڭ ۇستىنە فۋتبولشىنى اۋرۋحاناعا جەدەل جاردەممەن الىپ كەتتى. ءبىراق مەديسينالىق تەكسەرىستەن كەيىن مباپپەگە وپەراسيا قاجەت ەمەستىگى انىقتالدى. ەندى ول جۇما كۇنى نيدەرلاند قۇراماسىنا قارسى ماچتا الاڭعا شىعۋى مۇمكىن.