شىمكەنتتە بالالارعا جاۋىزدىق تانىتقان ەمشىنىڭ قىلمىستىق وتكەن شاعى انىقتالدى
قامقورلىعىنا جانە اسىراپ العان بالالارىنا جاۋىزدىق تانىتقان ەمشىنىڭ بۇعان دەيىن ادام ولتىرگەنى جانە پسيحيكالىق اۋىتقۋمەن ەسەپتە تۇرعانى رەسمي تۇردە راستالدى.
ەمشىگە قاتىستى سوت پروسەسى جابىق ەسىك جاعدايىندا ءوتىپ جاتىر. قالالىق ءبىلىم باسقارماسىنىڭ قورعانشىلىق جانە قامقورشىلىق ءبولىمىنىڭ مامانى جادىرا توعىسبەكوۆا سوت وتىرىسىنا كەلگەن كەزدە تىلشىلەرگە بەرگەن سۇحباتىندا، ەر كىسى بالا اسىراپ الماس بۇرىن جۇبايى ەكەۋى بالا اسىراپ الۋ بويىنشا ارنايى كۋرستان وتكەنىن جانە بىرنەشە قۇجات ۇسىنعانىن ايتتى.
«بۇل قۇجاتتار ىشىندە ەمشىنىڭ ءبىرقاتار مەديسينالىق انىقتامادا دەنى ساۋ ەكەنى جانە بۇرىن سوتتالماعانى كورسەتىلگەن. باسقارماداعىلار بيىل مامىردىڭ 27-سىندە پروكۋراتۋراعا سۇرانىس جىبەرگەن»، - دەدى جادىرا توعىسبەكوۆا.
ق ر باس پروكۋراتۋراسىنىڭ قۇقىقتىق ستاتيستيكا كوميتەتى «اقپاراتتىق قىزمەت» جۇيەسى جاساعان قۇجاتتا ەمشىنىڭ 1993 جىلى «ابايسىزدا ادام ءولتىرۋ» بابىمەن ءىستى بولعانى جانە پسيحيكالىق اۋىتقۋىنا بايلانىستى قىلمىستىق ءىس توقتاتىلىپ، ماجبۇرلەۋ ەمدەۋگە جىبەرىلگەنى كورسەتىلگەن.
وسى دەرەكتەردى ەسكەرە وتىرىپ، ەمشىنىڭ بالالارعا جاساعان جاۋىزدىق ارەكەتتەرى تەك قۇقىق قورعاۋ ورگاندارى عانا ەمەس، قوعامنىڭ دا نازارىندا بولۋى ءتيىس. قازىرگى تاڭدا سوت پروسەسى جالعاسۋدا، ال كىنالى دەپ تانىلعان جاعدايدا، ەمشى زاڭ الدىندا جاۋاپ بەرەدى.