سەنات ءتوراعاسى ماۋلەن اشىمبايەۆ پرەزيدەنتتىڭ ساياسي رەفورمالارىن "سينگۋليار نۇكتە" دەپ اتاپ، ءبىر پالاتالى پارلامەنت قۇرۋ باستاماسىنىڭ تاريحي ماڭىزىن ءتۇسىندىردى. ونىڭ ايتۋىنشا، بۇل ۇسىنىس - ورتالىقسىزداندىرۋ ۇدەرىسىن جەدەلدەتىپ، وكىلدى بيلىكتى كۇشەيتۋدىڭ جانە ادىلەتتى ساياسي جۇيە قالىپتاستىرۋدىڭ قيسىندى جالعاسى.
قازاقستان پارلامەنتىنە 30 جىل تولۋىنا وراي سەنات ءتوراعاسى ماۋلەن اشىمبايەۆ كولەمدى تالدامالىق ماقالا جاريالادى. وندا ول مەملەكەت باسشىسى قاسىم-جومارت توقايەۆتىڭ ەلدى جاڭعىرتۋ ساياساتى مەن جاڭا فورماتتاعى پارلامەنت قۇرۋ باستاماسىن ەگجەي-تەگجەيلى تالدادى.
ماۋلەن اشىمبايەۆ پرەزيدەنت ۇسىنعان ءبىر پالاتالى پارلامەنت تۇجىرىمداماسىن "ادىلەتتى قازاقستان" قۇرۋ جولىنداعى جاڭا كەزەڭ دەپ اتادى. ونىڭ پىكىرىنشە، بۇل قادام وكىلدى ينستيتۋتتاردى كۇشەيتىپ، بيلىكتىڭ جەكە تۇلعالاردىڭ قولىندا شوعىرلانۋ ءقاۋپىن ازايتادى جانە ساياسي پليۋراليزم كەڭىستىگىن كەڭەيتەدى.
"پرەزيدەنتتىڭ باستاماسى شامادان تىس ورتالىقتانعان باسقارۋ جۇيەسىن بىرتىندەپ جويىپ، قوعام مۇددەسى ەسكەرىلەتىن تەڭگەرىمدى باسەكەلى جۇيە قۇرۋدى كوزدەيدى"، – دەدى سەنات ءتوراعاسى.
ماقالادا ول ءبىر پالاتالى پارلامەنت تەك تەحنيكالىق وزگەرىس ەمەس، "كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت" قاعيداتىنا نەگىزدەلگەن رەفورمالاردىڭ جالعاسى ەكەنىن اتاپ ءوتتى.
اشىمبايەۆ سونداي-اق پارلامەنتتىڭ 30 جىل ىشىندەگى ءرولىن، سەناتتىڭ ەل تۇراقتىلىعىن قامتاماسىز ەتۋدەگى ميسسياسىن جانە سيفرلىق دەموكراتيا داۋىرىندە وكىلدى بيلىكتىڭ جاڭا فورماتتا جۇمىس ىستەۋ قاجەتتىگىن ەرەكشە اتاپ ءوتتى.
"ەلەكتروندىق ۇكىمەتتەن ەلەكتروندىق پارلامەنتكە دەيىن ءبىر-اق قادام. جاساندى ينتەللەكت پەن سيفرلىق تەحنولوگيالار زاڭ شىعارۋ پروسەسىنىڭ اشىقتىعىن جانە تيىمدىلىگىن ارتتىرادى"، – دەدى ول.
سەنات ءتوراعاسىنىڭ ايتۋىنشا، رەفورمانىڭ تۇپكى ماقساتى – ىقپالدى، كوپ پارتيالى، جوعارى تەحنولوگيالىق جانە حالىق ۇنىنە قۇلاق اساتىن جاڭا پارلامەنت قۇرۋ.
ماۋلەن اشىمبايەۆتىڭ ماقالاسى - پرەزيدەنتتىك رەفورمالاردىڭ يدەولوگيالىق ءارى ينستيتۋسيونالدىق تۇسىندىرمەسى، وندا ول قازاقستان پارلامەنتاريزمىنىڭ ەۆوليۋسياسىن، سەناتتىڭ تاريحي ءرولىن جانە بولاشاق سيفرلىق پارلامەنت مودەلىن تۇتاس قاراستىرادى.