قازاقستان رەسپۋبليكاسى پارلامەنتى سەناتىنىڭ سپيكەرى ماۋلەن اشىمبايەۆ وزبەكستان رەسپۋبليكاسى وليي ءماجليسى سەناتىنىڭ ءتوراعاسى تانزيلا ناربايەۆامەن كەزدەستى، دەپ حابارلايدى Almaty-akshamy.kz.
ءوز سوزىندە ماۋلەن اشىمبايەۆ پارلامەنتارالىق بايلانىستى ودان ءارى دامىتۋعا مۇددەلى ەكەنىن ايتتى. سونداي-اق ول ەكى ەلدىڭ مەملەكەت باسشىلارى دەڭگەيىندەگى ءوزارا سەنىمگە نەگىزدەلگەن ساياسي ديالوگتىڭ قارقىنىنا نازار اۋدارىپ، زاڭ شىعارۋ ورگاندارى اراسىنداعى ىنتىماقتاستىقتىڭ ماڭىزدىلىعىنا توقتالعانى تۋرالى جازدى قازاقپارات.
«ءبىزدىڭ ەلدەرىمىز – وداقتاس جانە ستراتەگيالىق سەرىكتەس مەملەكەتتەر. قازاقستان مەن وزبەكستان اراسىنداعى ىنتىماقتاستىق باۋىرلاستىققا، ءوزارا دوستىق پەن تاتۋ كورشىلىككە، عاسىرلار بويى قالىپتاسقان تاريحي جانە مادەني بايلانىستارعا تابان تىرەيدى. سونداي-اق ەكىجاقتى قارىم-قاتىناس ءبىزدىڭ پالاتالار اراسىنداعى ىنتىماقتاستىق جونىندەگى كوميسسيا ارقىلى دا بەلسەندى دامىپ كەلەدى. بۇل كوميسسيا – زاڭ شىعارۋ قىزمەتىندە تاجىريبە الماسۋعا جانە ءوزارا ديالوگتى دامىتۋعا مۇمكىندىك بەرەتىن ءتيىمدى الاڭ. سونىمەن قاتار ءبىز الداعى ۋاقىتتا ارال ماسەلەسى بويىنشا دا وزبەك ارىپتەستەرىمىزبەن بەلسەندى ءىس-قيمىلدى جالعاستىرامىز دەپ ۇمىتتەنەمىز»، – دەدى ماۋلەن اشىمبايەۆ.
كەزدەسۋ بارىسىندا وڭىرلىك ىنتىماقتاستىقتى ودان ءارى كەڭەيتۋ ماسەلەسى دە تالقىلاندى.
سونىمەن قاتار سەنات ءتوراعاسى ارىپتەسىن وزبەكستاننىڭ بۇكىلحالىقتىق رەفەرەندۋمدى ءساتتى وتكىزۋىمەن قۇتتىقتادى. سونداي-اق قازاقستاندا مەملەكەت باسشىسى قاسىم-جومارت توقايەۆتىڭ باستاماسىمەن قولعا الىنعان رەفورمالاردى ىسكە اسىرۋدى زاڭنامالىق تۇرعىدان قامتاماسىز ەتۋ ءۇشىن جۇرگىزىلگەن جۇمىستار جونىندە ايتتى.
ءوز كەزەگىندە، تانزيلا ناربايەۆا قازاقستاندا جۇرگىزىلىپ جاتقان ساياسي وزگەرىستەردى جوعارى باعالادى جانە ەكى ەل پارلامەنتتەرى دەپۋتاتتارىنىڭ بىرلەسكەن سىندارلى جۇمىسى قازاقستان مەن وزبەكستاننىڭ ستراتەگيالىق ءوزارا ءىس-قيمىلىن نىعايتۋعا ىقپال ەتەتىنىنە سەنىم ءبىلدىردى.