ءۇندىستاننىڭ حالىق كوپ شوعىرلانعان ەكى شتاتىندا سوڭعى بىرنەشە كۇندە كەم دەگەندە 96 ادام قازا تاپتى. ءقازىر بۇكىل ەل اپتاپ ىستىقتان زارداپ شەگىپ وتىر. ۋتتار-پرادەش پەن بيحار شتاتتارىندا اۋا تەمپەراتۋراسى 45°C-قا دەيىن كوتەرىلدى، دەپ حابارلايدى Almaty-akshamy.kz.
ءولىم-جىتىم اسىرەسە سولتۇستىك ۋتتار-پرادەش شتاتى مەن شىعىس بيحار شتاتىندا كوپ كەزدەسەدى. بيلىك وسى شتاتتارداعى 60 جاستان اسقان تۇرعىندارعا جانە ءارتۇرلى اۋرۋلاردان زارداپ شەگەتىن باسقا ادامدارعا كۇندىز ۇيدەن شىقپاۋ تۋرالى ەسكەرتتى، دەپ جازدى The Guardian.
ۋتتار-پرادەش شتاتىنىڭ بالليا اۋدانىندا 54 ادام قايتىس بولدى. بيلىك قايتىس بولعانداردىڭ كوبىنىڭ جاسى 60-تان اسقانىن جانە قاتتى ىستىقتان اسقىنۋى مۇمكىن سىرقاتتارى بار ەكەنىن انىقتادى.
بالليا اۋدانىنىڭ مەديسينا قىزمەتكەرى س.ك.ياداۆ سوڭعى ءۇش كۇندە اۋداندىق اۋرۋحاناعا اپتاپ ىستىقتان بۇرىننان بار دەرتى اسقىنعان 300-گە جۋىق ناۋقاس تۇسكەنىن ايتتى.
اۋىر جاعدايعا بايلانىستى بيلىك جەدەل جاردەم بولىمەندەگى توسەك سانىن كوبەيتتى.
پاتاك ەسىمدى بالليا تۇرعىنى 17 ماۋسىمدا اكەسىنەن ايىرىلعان.
«بالليادا مۇنداي جاعداي بولعان ەمەس. ىستىقتان مۇنشالىقتى كوپ ادام قايتىس بولعانداردى كورگەن ەمەسپىن. ادامدار كوشەگە شىعۋعا قورقىپ وتىر. جولدار مەن بازارلار قاڭىراپ بوس قالدى»، -دەيدى پاتاك
جەكسەنبى كۇنى بالليا وكرۋگىندە ەڭ جوعارى تەمپەراتۋرا 43°C بولدى. بۇل ادەتتەگى نورمادان 5°C-قا اسىپ كەتتى. اۋانىڭ سالىستىرمالى ىلعالدىلىعى 25% دەڭگەيىندە بەكىتىلدى، بۇل جىلۋ اسەرىن ارتتىردى.