حالىقارالىق تاسىمالداۋشىلار شاعىمى.
«قازاتو» قازاقستان رەسپۋبليكاسىنىڭ حالىقارالىق اۆتوموبيل تاسىمالداۋشىلار وداعى ەلىمىزدىڭ حالىقارالىق باعىتتارىندا جۇك تاسىمالداۋشى كومپانيالاردىڭ وسى سالاداعى شەتەلدىك ارىپتەستەرىنىڭ سالدارىنان كورىپ وتىرعان قيىندىقتارى تۋرالى جۋرناليستەرگە ارناپ وتكىزگەن باسپا ءسوز كونفەرەنسياسىندا ايتتى، دەپ حابارلايدى Almaty-akshamy.kz
«قازاتو» قازاقستان رەسپۋبليكاسىنىڭ حالىقارالىق اۆتوموبيل تاسىمالداۋشىلار وداعى قازىرگى تاڭدا قازاقستان رەسپۋبليكاسىندا قازاقستاندىق اۆتوكولىكپەن جۇك تاسىمالدايتىن بەلارۋسيالىق جۇرگىزۋشىلەردىڭ كوبەيىپ كەتكەنىن مالىمدەپ وتىر. وداق باسشىسى ماحسات ساقتاعانوۆتىڭ ايتۋىنشا، ەلىمىزگە بەلارۋسسيادان كەلەتىن جۇك كولىكتەرىنىڭ زاڭعا قايشى ارەكەتتەرى مەن جەمقورلىق سحەمالارى ايقىندالىپ وتىر.
ولار بۇگىندە بۇل سالادا دا بارماق باستىلىق پەن كوز قىستىلىق قالماي كەلە جاتقانىن ايتۋدا. سەبەبى سالاداعى زاڭ تالاپتارىنىڭ ساقتالماۋىنان، شەتەلدىك جۇمىس كۇشىنىڭ كوپتەپ اعىلۋىنان وتاندىق جۇك تاسىمالداۋشىلار بۇگىندە جۇمىستان قاعىلىپ، شەتەلدىك كومپانيالارعا ورىن بەرىپ، نارىقتان ىعىسۋعا ءماجبۇر بولىپ وتىرمىز دەيدى.
جۇرگىزۋشىلەردىڭ ەڭبەگى مەن پەن تىنىعۋىن ءۇيىمداستىرۋ، سونداي-اق تاحوگرافتاردى قولدانۋ قاعيدالارىنا سايكەس، حالىقارالىق جۇك تاسىمالىن جاسايتىن بارلىق جۇك كولىكتەرى تاحوگرافپەن جابدىقتالۋى ءتيىس.
جالپى حالىقارالىق تاسىمالداردى جۇزەگە اسىرۋ ءۇشىن جۇرگىزۋشىلەرگە قاجەت قۇجاتتاردىڭ نەگىزگىلەرى كەلەسىدەي:
جۇرگىزۋشىنىڭ ءتولقۇجاتى، جۇرگىزۋشىنىڭ حالىقارالىق جۇرگىزۋ كۋالىگى، جۇرگىزۋشى كارتاسى، تاۋار-جۇك قۇجاتى، جۇك جونەلتۋشىنىڭ سىرتقى نومەنكلاتۋراسى كورسەتىلگەن جۇككە ارنالعان جۇك قۇجاتتارى، شەتەلدىك رۇقسات بلانكى، اتس تەحنيكالىق پاسپورت.
جۇرگىزۋشىنىڭ جەكە باسىن ايقىنداۋ ءۇشىن جانە ونىڭ جۇمىس ۋاقىتى مەن دەمالعان كەزى تۋرالى مالىمەتتى ساقتايتىن جۇرگىزۋشى كارتوچكاسى بەرىلەدى. سونداي-اق، جۇرگىزۋشى كارتوچكاسى قازاقستان رەسپۋبليكاسىنىڭ ازاماتتارىنا، قازاقستان رەسپۋبليكاسىنىڭ اۋماعىندا ءبىر كۇنتىزبەلىك جىلدا 185 كۇننەن كەم ەمەس ءومىر سۇرەتىن جانە ق ر ۋاقىتشا نەمەسە تۇراقتى تۇرۋعا رۇقساتى بار شەتەل ازاماتتارىنا نەمەسە ازاماتتىعى جوق تۇلعالارعا عانا بەرىلەدى.
الايدا، قازىرگى ساتتە قازاقستان كولىك كومپانيالارىندا جۇمىس ىستەيتىن بەلارۋس جۇرگىزۋشىلەرى وسى جۇرگىزۋشى كارتوچكاسىنسىز-اق ەمىن-ەركىن كولىك ايداپ ءجۇر. بۇل حالىقارالىق كولىك تاسىمالىن جاسايتىن ترانسپورت ەكيپاجدارىنىڭ جۇمىسىنا قاتىستى 1970 جىلعى ەۋروپالىق كەلىسىمدى بۇزۋ بولىپ سانالادى. بۇل كەلىسىم قازاقستان رەسپۋبليكاسىنىڭ پرەزيدەنتىنىڭ 1995 جىلدىڭ 12 مامىرىنداعى №2272-جارلىعىمەن راتيفيكاسيالانعان.
ياعني، جالعان قۇجاتپەن ءجۇرۋ فاكتىلەرى بۇل سالادا دا تىيىلماي تۇر. سالا ماماندارىنىڭ حالىقارالىق كولىك تاسىمالىن جاساۋ بارىسىندا، «قازاقستان-قىتاي»، «قىتاي-قازاقستان»، «قازاقستان-رەسەي» جانە «رەسەي-قازاقستان» باعىتتارىنداعى مەملەكەتتىك شەكاراداعى وتكىزۋ پۋنكتتەرىندە بەلارۋس پەن رەسەي جۇرگىزۋشىلەرى «جالعان قۇجاتتاردى» ياعني قازاقستان ازاماتتارىنىڭ كارتالارىن كورسەتىپ ءجۇر.
«قازاتو» حالىقارالىق اۆتوموبيل تاسىمالداۋشىلار وداعى مەملەكەتتىك قۇزىرلى ورگان وكىلدەرى نەگە بۇعان كوز جۇما قارايدى دەگەن جانايقايلارىن ايتىپ وتىر.
«جۇرگىزۋشىلەردىڭ جۇمىس ۋاقىتى مەن دەمالعان كەزىن ۇيلەستىرۋ جونىندەگى ەرەجە تالاپتارىن ورىنداۋعا دەگەن باقىلاۋدى كۇشەيتۋ ماقساتىندا، قازاقستان رەسپۋبليكاسىنىڭ حالىقارالىق اۆتوموبيل تاسىمالداۋشىلارىنىڭ وداعى جاعدايدى رەتتەپ، بۇل جۇرگىزۋشىلەر مەن ولاردىڭ جۇمىس بەرۋشىلەرىن جاۋاپقا تارتۋدى سۇرايدى. ياعني، وتاندىق حالىقارالىق كولىك تاسىمالى كومپانيالارىن قازاقستان رەسپۋبليكاسىنىڭ 2014 جىلدىڭ 5 شىلدەسىندە قابىلدانعان №235-V زرك «اكىمشىلىك قۇقىق بۇزۋشىلىق تۋرالى» كودەكستىڭ 572 بابىنىڭ 1 تارماعى بويىنشا اكىمشىلىك جاۋاپقا تارتىپ، ولاردىڭ بولاشاقتا حالىقارالىق جۇك تاسىمالىن جاسايتىڭ كولىكتى ايداۋىنا تىيىم سالىنۋى كەرەك»، - دەپ ەسەپتەيدى وداقتاعىلار.
«وكىنىشكە قاراي، ءدال وسى اكىمشىلىك قۇقىق بۇزۋشىلىق بابى بويىنشا جۇرگىزۋشىلەر، شاعىن، ورتا جانە ءىرى كاسىپورىن سۋبەكتىلەرى جاۋاپقا تارتپاي كەلەدى. بۇل باپ بويىنشا شاعىن كاسىپ يەلەرى - ون، ورتا كاسىپ يەلەرى – جيىرما، ءىرى كاسىپ يەلەرى – ەلۋ ايلىق ەسەپتىك كورسەتكىش كولەمىندە ايىپپۇل تولەۋى ءتيىس. قۇقىق بۇزۋشىلاردان تولەنەتىن ايىپپۇل بيۋدجەتكە تۇسپەيدى»، - دەيدى قازاتو پرەزيدەنتى ماحسات ساقتاعانوۆ.
باسپا ءسوز كونفەرەنسياسىنا ەلىمىزدىڭ وزگە قالالارىنداعى حالىقارالىق كولىك تاسىمالىمەن اينالىساتىن ماماندار دا ونلاين قاتىستى. پەتروپاۆل قالاسىنداعى "NK-CARGO Ltd" كومپانياسىنىڭ ديرەكتورى وماري حاربەديا دا جەڭىلتەلىگەن ليزينگپەن ءوز ەلدەرىندە وسى كاسىپتى باستاعاندار ەشبىر سالىق تولمەي، ءبىزدىڭ نانىمىزعا ورتاقتاسىپ وتىر دەپ قىنجىلادى.
«حالىقارالىق تاسىمالداۋعا قاتىستى ءقازىر عالامتوردى اشىپ قالساڭ، قىتايدان مينسكىگە دەيىن تاۋاردى 5 كۇندە جەتكىزىپ بەرەمىز دەگەن حابارلاندىرۋ كوبەيىپ كەتكەن. ءبىر ەلدەن ەكىنشى ەلگە نەبارى بەس كۇن ىشىندە جەتكىزىپ بەرەمىز دەۋدىڭ ءوزى وسى سالاداعى ورەسكەل بۇزۋشىلىق»، - دەيدى ول.
سەبەبى، حالىقارالىق تاسىمالداۋدا جۇرگىزۋشىلەردىڭ جولدا دەمالۋ قاعيدالارى بويىنشا، ءاربىر 400 شاقىرىم جۇرگەننەن كەيىن، جۇك كولىگى 4 ساعاتقا توقتاپ، ونىڭ جۇرگىزۋشىسى 4 ساعات دەمالۋى كەرەك. ال ەگەر ەكى جۇرگىزۋشى بولسا، 800 شاقىرىم جۇرە الادى ەكەن. ياعني جوعارىدا كەلتىرىلگەن حابارلاندىرۋدى نەگىزگە الساق، قىتايدان مينسكىگە جۇكتى جەتكىزۋ ءۇشىن كەمىندە 10 كۇن كەرەك ەكەن.
قازاتو ق ر يندۋستريا جانە ينفراقۇرىلىمدى دامىتۋ مينيسترلىگىنە 2022 جىلدىڭ 13 جەلتوقسانىنداعى №715 بۇيرىققا تولىقتىرۋلار مەن وزگەرتۋلەر ەنگىزۋدى ۇسىندى. وندا ەگەر «اكىمشىلىك قۇقىقبۇزۋشىلىق تۋرالى» كودەكستىڭ 572- بابىنىڭ 1-تارماعى بۇزىلعاندىعى انىقتالسا، وتاندىق حالىقارالىق كولىك تاسىمالىن جاسايتىن تاسىمالداۋشىلاردىڭ ليسەنزياسىن ون ەكى ايعا توقتاتا تۇرۋ كوزدەلگەن.
