م.اۋەزوۆ اتىنداعى قازاق ۇلتتىق دراما تەاترىنىڭ كىشى زالىندا كامەرالىق سپەكتاكلدەر شەرۋى باستالدى.
قويىلىمداردىڭ شىمىلدىعىن جانسەرىك سەرىكبايدىڭ رەجيسسەرلىگىمەن قويىلعان “ءجۇز” پسيحولوگيالىق دراماسى اشتى. سونداي-اق سپەكتاكلدەر شەرۋىنىڭ العاشقى كۇنىندە ەرالحان مىرزاحمەتتىڭ رەجيسسەرلىگىمەن “كوبەلەكتىڭ ءانى” دراماسى ساحنالاندى.
م.اۋەزوۆ اتىنداعى قازاق ۇلتتىق دراما تەاترىنىڭ ديرەكتورى ەركىن جۋاسبەك كامەرالىق سپەكتاكلدەر اپتالىعى ناتيجەسىندە جاس 4 رەجيسسەردىڭ بىرەۋى تەاترعا جۇمىسقا الىناتىنىن ايتتى.
«بىزگە بىلتىر جاس دراماتۋرگتاردان 10 پەسا تۇسكەن. سول پەسسالاردى سپەكتالگە اينالدىرۋدى ويعا الدىق. سوندىقتان ءبىز جاس رەجيسسەرلەردى شاقىرىپ، ولارمەن كامەرالىق سپەكتالدەردى قويىڭىزدار دەپ، تەاتردا مۇمكىندىك بەردىك. باسىندا جەتەۋ ەدى، ەندى مىنە تورتەۋى ناتيجەگە جەتىپ وتىر. ەندى مىنە ءبىز 4 بالانىڭ ىشىنەن بىرەۋىن تاڭداپ، تەاترعا الساق دەگەن ويىمىز بار. ول ءۇشىن ەكى كۇننىڭ ىشىندە 4 سپەكتال كورسەتىلىپ، سپەكتالدىڭ تالقىلاۋى وتكىزىلەدى»، - دەدى م.اۋەزوۆ اتىنداعى قازاق ۇلتتىق دراما تەاترىنىڭ ديرەكتورى ەركىن جۋاسبەك.
ايتا كەتەيىك، بۇگىن “ماحابباتقا قىزمەت” (رەج. الىبەك قوسۋباق) جانە “ۇزىلگەن ءۇمىت” (اقىلبەك حاميتوۆ) درامالارى تەاتردىڭ كىشى زالىندا ساحنالادى. كىرۋ تەگىن.
«ءجۇز» مەن رەجيسسەر رەتىندە ۇلكەن ساحناعا شىعارعان العاشقى قويىلىم. پەسسانىڭ اتى - “ادىلەت”، اۆتورى - مادينا وماروۆا. العاشقى ون شاقتى پەسسانى قاتار وقىپ، وزىمە ۇناعانى وسى بولدى. سپەكتاكلدى قويۋ بارىسىندا اۆتورمەن بايلانىستا بولدىق جانە كەي شەشىمدەردى وزگەرتىپ وتىردىق. مىسالى ويلاسا وتىرىپ اتىن “ءجۇز” دەپ وزگەرتتىك. بۇل قويىلىم تاجىريبە رەتىندە قالسا دا، تەاتردىڭ رەپەرتۋارىنا قوسىلسا دا قۋانامىن. ويىمىزداعى، ىشىمىزدەگى ايتقىمىز كەلگەن نارسەنى ساحنا ارقىلى جەتكىزۋگە تىرىستىق. ال ءارى قاراي سپەكتاكل تاعدىرىن تەاتر مەن كورەرمەندەر شەشەدى»، - دەدى جاس رەجيسسەر، ت.جۇرگەنوۆ اتىنداعى ونەر اكادەمياسىنىڭ ماگيسترانتى جانسەرىك سەرىكباي.