ماتەماتيكاعا جاڭا فورمۋلا رەتىندە ەنگىزىلگەن كەستە جاسالدى

ونى قىزىلوردالىق وقۋشى روزا سادىق ويلاپ تاپقان.

بۇل جاڭالىق «زەردە» رەسپۋبليكالىق عىلىمي زەرتتەۋ جوبالارى كونكۋرسىنىڭ رەسپۋبليكالىق كەزەڭىندە ۇزدىك دەپ تانىلدى، دەپ حابارلايدى Almaty-akshamy.kz

قىزىلوردا قالاسى ي.ۆ.پانفيلوۆ اتىنداعى №5 مەكتەپ-ليسەيىندە ءبىلىم الاتىن وقۋشىنىڭ بۇل كەستەسىن كورىپ، عالىمدار دا تاڭدانىسىن جاسىرماپتى. ناتيجەسىندە اتالمىش بايقاۋدا گران-پري يەگەرى اتاندى.

قىزىلوردالىق وقۋشى روزا سادىق ماتەماتيكانى وقىتۋدىڭ ادىستەمەسىن جەتىلدىرەتىن جاڭا ماتەماتيكالىق كەستە ويلاپ تاپتى. زەرتتەۋ جۇمىسىنىڭ جۇرگىزىلۋ ناتيجەسىندە ۇلتتىق زياتكەرلىك مەنشىك ينستيتۋتى تالابىنا ساي جاس اۆتور روزا مەن جەتەكشىسى عابيدەن تولەبايۇلىنا ساندىق كۋالىك بەرىلدى. كەستە "روزا – ولشەم بىرلىكتەر كەستەسى" دەپ رەسمي اتالدى.

"جوبانىڭ باستى جاڭالىعى - ماتەماتيكالىق ولشەم بىرلىكتەردى جۇمىس ىستەۋدىڭ ادىستەمەلىك كەستەسىن ەسەپتەر شىعارۋ بارىسىندا قولدانۋ. ماتەماتيكانى وقىتۋدىڭ ادىستەمەسىن جەتىلدىرەتىن بۇل جاڭا كەستە بۇگىندە ءبىلىم بەرۋ ۇيىمدارىندا ساباق پروسەسىندە قولدانىلىپ كەلەدى"، – دەدى جەتەكشىسى عابيدەن تولەباي ۇلى.

ايتا كەتەيىك، ءبىلىم باسەكەسىندە 600-گە جۋىق قاتىسۋشىنىڭ اراسىنان دارا شىققان قىزىلوردالىق وقۋشىنىڭ بۇل ەڭبەگى ماتەماتيكا ىلىمىنە تاعى ءبىر جاڭا فورمۋلا رەتىندە ەنگىزىلىپ وتىر.