الماتى قالاسىنىڭ ءماسليحاتىنىڭ كەزەكتەن تىس XXV سەسسياسىندا دەپۋتاتتار 2025–2027 جىلدارعا ارنالعان قالا بيۋدجەتىن قولداپ، بەكىتتى. سەسسيا جۇمىسىنا قالا اكىمى ەربولات دوسايەۆ، دەپۋتاتتار جانە جەرگىلىكتى اتقارۋشى ورگانداردىڭ باسشىلارى قاتىستى، دەپ حابارلايدى aqshamnews.kz
مەگاپوليس باسشىسى ەربولات دوسايەۆ بيۋدجەت جوباسى مەملەكەت باسشىسىنىڭ تاپسىرمالارىن ورىنداۋعا جانە قالانىڭ دامۋ باعدارلاماسى مەن باس جوسپارىنىڭ باسىمدىقتارىن جۇزەگە اسىرۋعا باعىتتالعانىن اتاپ ءوتتى.
«2025 جىلعا ارنالعان بيۋدجەت الماتىنى بۇكىل ەل ءۇشىن ۇلگى رەتىندە تۇراقتى دامۋشى قالا رەتىندە كورسەتەدى. بۇل بيۋدجەت قازىرگى زامانعا ساي، جايلى قالا قۇرۋعا باعىتتالعان، وندا ءاربىر تۇرعىن ومىرىندەگى وڭ وزگەرىستەردى سەزىنە الادى. بۇل ءماسليحات پەن اكىمدىك اراسىنداعى بىرلەسكەن جۇمىستىڭ نەگىزگى مىندەتتەردى ءتيىمدى شەشۋگە مۇمكىندىك بەرەتىنىن كورسەتەتىن مىسال»، – دەءدى ەربولات دوسايەۆ.
ماسەلەن، الماتىنىڭ 2025 جىلعا ارنالعان بيۋدجەتى 2 ترلن 177 ملرد تەڭگە دەڭگەيىندە جوسپارلانعان، بۇل 2022 جىلدىڭ باسىنداعى كورسەتكىشتەن (1 ترلن 70 ملرد تەڭگە) ەكى ەسە كوپ. نەگىزگى قارجىلاندىرۋ باعىتتارى كولىك جانە ينجەنەرلىك ينفراقۇرىلىمدى دامىتۋعا، الەۋمەتتىك باعدارلامالاردى جۇزەگە اسىرۋعا جانە قالانىڭ ەكولوگيالىق جاعدايىن جاقسارتۋعا باعىتتالعان. الەۋمەتتىك سالا باسىمدىق بولىپ قالا بەرەدى، ونىڭ قارجىلاندىرۋى 15%-عا (110،6 ملرد تەڭگەگە) ۇلعايىپ، 851،9 ملرد تەڭگەگە نەمەسە جالپى بيۋدجەتتىڭ 39،1%-ىنا جەتتى.
بيۋدجەتتە دامۋ جوبالارىنا ەرەكشە نازار اۋدارىلعان. دامۋ بيۋدجەتىنىڭ كولەمى 2022 جىلعى 207 ملرد تەڭگەدەن 2025 جىلى 455،9 ملرد تەڭگەگە دەيىن 2،2 ەسەدەن استام ۇلعايادى. بۇل جول جانە ينجەنەرلىك ينفراقۇرىلىمدى جاڭعىرتۋ، قالانى كورىكتەندىرۋ جانە قالا ورتاسىن جاقسارتۋ بويىنشا ءىرى جوبالاردى ىسكە قوسۋعا مۇمكىندىك بەرەدى. سونىمەن قاتار، مەگاپوليستى كورىكتەندىرۋ جانە كوگالداندىرۋعا باعىتتالعان «تازا قازاقستان» باعدارلاماسىن بەلسەندى تۇردە جۇزەگە اسىرۋ جالعاسۋدا.
الماتى ەكونوميكاسىنىڭ دامىتۋدىڭ نەگىزگى قوزعاۋشى كۇشى شاعىن جانە ورتا بيزنەس (شوب) بولىپ قالا بەرەدى، ول قالانىڭ جالپى وڭىرلىك ءونىمىنىڭ 60%-دان استامى. 2025 جىلى كاسىپكەرلىكتى قولداۋعا 71 ملرد تەڭگە بولىنەدى، بۇل 4 مىڭنان استام جاڭا جوبانىڭ دامۋىن قامتاماسىز ەتەدى. 2030 جىلعا قاراي شوب-تىڭ قالا ەكونوميكاسىنا قوساتىن ۇلەسى 70%-عا جەتۋگە ءتيىس.
سەسسيا اياسىندا دەپۋتاتتار الماتى قالاسىن دامىتۋدىڭ 2021-2025 جىلدارعا ارنالعان تۇزەتىلگەن جوسپارىن قابىلدادى. وزگەرىستەر قر-نىڭ 2029 جىلعا دەيىنگى جاڭا ۇلتتىق دامۋ جوسپارىمەن ءۇيلەستىرۋگە بايلانىستى ەنگىزىلدى. جاڭارتىلعان جوسپاردا جايلى قالالىق ورتا، تۇراقتى ەكونوميكالىق ءوسۋ، جاسىل الماتى، ۋربانيزاسيانى باسقارۋ، قاۋىپسىزدىك جانە سيفرلىق تەحنولوگيالاردى دامىتۋ سياقتى باعىتتار كوزدەلگەن.