اققالا ولاف، اق ايۋ، كينگ-كونگ، «شرەك» مۋلتفيلمىندەگى ءزىمبىر ادام، جاڭا جىلدىڭ سيمۆولى — شىرشا، سونداي-اق، الماتىنىڭ سيمۆولى – قار بارىسى بالالاردى كەلە جاتقان مەرەكەمەن قۇتتىقتادى.
بۇل ماسكوتتار 20 جەلتوقسان كۇنى باستالعان «الماتىنىڭ 8 كەرەمەتى: وتباسىلىق مەرەكە — تاڭعاجايىپ جاڭا جىل» اتتى اۋقىمدى مەرەكەلىك باعدارلاما اياسىندا ارنايى جاسالعان، دەپ حابارلايدى aqshamnews.kz.
ەرتەگىلەر مەن مۋلتفيلم كەيىپكەرلەرى بالالارمەن بىرگە استانا الاڭىندا، اباي الاڭىندا، تۇڭعىش پرەزيدەنت ساياباعىندا، ارباتتا، پانفيلوۆ كوشەسىندە جانە «نۇرلى تاۋ» بيزنەس ورتالىعىنىڭ الدىنداعى الاڭدا وتكەن شەبەرلىك دارىستەرى مەن ويىندارعا قاتىستى.
بالالار اعاشتان جاسالعان شىرشا ويىنشىقتارىن بوياپ، ىدىستاردى سۋرەتتەرمەن بەزەندىردى، مۋزىكالىق قوبديشالاردى اشەكەيلەپ، گيپستەن جاسالعان مۇسىنشەلەرگە جان ءبىتىردى. ولارعا تاجىريبەلى قولونەرشىلەر باعىت-باعدار بەرىپ، كومەكتەسىپ وتىردى. ءار قاتىسۋشىعا الجاپقىشتار، قولعاپتار مەن كرافت سومكەلەر بەرىلدى. ۋاقىتىن قىزىقتى ءارى پايدالى وتكىزگەن بالاقايلار ءوز قولدارىمەن جاساعان كادەسىيلاردى ەستەلىك رەتىندە ۇيلەرىنە الىپ كەتتى.
شەبەرلىك دارىستەرىن قولونەرشىلەر عانا ەمەس، سونىمەن قاتار سيرك جانە قۋىرشاق تەاترىنىڭ ارتيستەرى دە وتكىزدى. بالالار دوپپەن جونگلەرلىك ونەردى ۇيرەندى، ارنايى تاقتايدا تەپە-تەڭدىكتى ساقتاۋدى مەڭگەرىپ، حۋلا-حۋپپەن قىزىقتى ويىندارعا قاتىستى. سونىمەن قاتار، الماتىداعى الاڭداردا اياز اتا مەن اقشاقاردىڭ، ەكۆيليبريستتەردىڭ، جونگلەرلەردىڭ قويىلىمدارى، سۇيىق ازوتتىڭ اسەرىمەن وتكىزىلگەن عىلىمي شوۋ جانە ۇيرەتىلگەن يتتەردىڭ نومىرلەرى ۇسىنىلدى. اشىق اسپان استىندا قۋىرشاق تەاترىنىڭ ارتيستەرى قويىلىمدارىن پاش ەتسە، «الاتاۋ» تەاترىنىڭ جانە «الماتى اۋەندەرىنىڭ» انشىلەرى كونسەرتتەرىن وتكىزدى.
ايتا كەتەيىك، 30 جەلتوقسان كۇنى استانا الاڭىندا ساعات 17:00-دەن 18:30-عا دەيىن تاڭعاجايىپ سيرك شوۋى وتەدى. ەكۆيليبريستەر تاماشا تريۋكتەرىمەن تاڭعالدىرسا، جونگلەرلەر دوپتاردى، ۇرشىق پەن ساقينالاردى شەبەر مەڭگەرگەنىن كورسەتەدى. اتلەتتەر وزدەرىنىڭ كۇش-قۋاتى مەن توزىمدىلىگىن تانىتسا، سايقىمازاق ينتەراكتيۆتى ويىندار مەن قويىلىمدار ارقىلى كورەرمەندەرگە قۋانىش سىيلايدى.
باعدارلامانىڭ شارىقتاۋ شەگى – فاەر-شوۋ بولادى. وندا ارتيستەر وتپەن جاسالاتىن ەرەكشە تريۋكتەر كورسەتىپ، حالىقتى تاڭقالدىرماق. ودان كەيىن ساعات 18:30-دان 20:00-گە دەيىن ساحنادا «ۇلىتاۋ» ايگىلى ەتنو-روك توبى جانە «الاتاۋ» ءداستۇرلى ونەر تەاترىنىڭ ارتيستەرى ونەر كورسەتەدى. ولار كورەرمەندەرگە اسەرلى كومپوزيسيالار مەن ۇمىتىلماس كوڭىل-كۇي سىيلايدى.
سونداي-اق، 30 جەلتوقساندا ساعات 18:30-دان 20:00-گە دەيىن اباي الاڭىندا مەملەكەتتىك قۋىرشاق تەاترىنىڭ ارتيستەرى جارقىن ەموسيالار مەن جاڭا جىلدىق سيقىرعا تولى مەرەكەلىك باعدارلاما ۇسىنادى. كەشتىڭ باستى كەيىپكەرلەرى اياز اتا، اقشاقار، كوڭىلدى قار ادامدارى جانە قوناقتاردى قىزىقتى ويىندارعا، بيلەرگە جانە فلەشموبتارعا تارتاتىن قۋىرشاقتار بولادى.
31 جەلتوقسان كۇنى الماتىدا ەسترادا جۇلدىزداردىڭ قاتىسۋىمەن ەكى ۇلكەن كونسەرت وتەدى.
اباي الاڭىندا 19:00-دەن 21:00-گە دەيىن بۇركىت، اقبوتا-نۇر، ديانا يسمايل، كەنجەبەك ءجانابىلوۆ جانە باسقا دا ارتيستەر ونەر كورسەتەدى.
استانا الاڭىندا كونسەرت ساعات 21:00-دە باستالىپ، 2025 جىلدىڭ 1 قاڭتارى ساعات 01:00-دە اياقتالادى. ءتۇن جارىمدا وتشاشۋ بولادى. قبتۋ الدىنداعى ساحنادا ەرسەيىت الييەۆ، ەلبول قۋانبەك، ۇلجان اعلاقوۆا، Chingiz Typhoon، Makvin، Orynkhan، 6ellucci، مارحابا ءسابي، Moldanazar جانە RaiM ونەر كورسەتەدى.
مەرەكەلىك ءىس-شاراعا دايىندىق جۇمىستارىنا بايلانىستى 31 جەلتوقساندا ساعات 8:00-دەن باستاپ تولە بي كوشەسىنىڭ نازاربايەۆ داڭعىلىنان ابىلاي حان داڭعىلىنا دەيىنگى بولىگى تولىعىمەن جابىلادى. جول قوزعالىسى 2025 جىلدىڭ 1 قاڭتارىندا ساعات 02:00-دە قايتا اشىلادى. تۇسىنىستىكپەن قاراپ، الدىن الا قوزعالىس باعىتىن جوسپارلاۋدى جانە جول قوزعالىسى ەرەجەلەرىن قاتاڭ ساقتاۋدى سۇرايمىز.