2024 جىلى «قتج» ۇك» اق قىزمەتتىڭ نەگىزگى كورسەتكىشتەرى بويىنشا تۇراقتى دامۋ ۇستانىمىن ساقتاپ قالدى.
كومپانيا جۇكتەردى جانە جولاۋشىلاردى تۇراقتى تاسىمالداپ، الەۋمەتتىك مىندەتتەمەلەردى ساقتادى، اۋقىمدى جوبالاردى ىسكە اسىردى، جاڭا لوگيستيكالىق شەشىمدەر تاپتى، دەپ حابارلايدى aqshamnews.kz Rail-news.kz-كە سىلتەمە جاساپ.
جۇك اينالىمىندا وڭ ديناميكا ساقتالدى، ول 272 ملرد توننا-كيلومەتردى قۇرادى. كونتەينەرلىك ترانزيت سەنىمدى قارقىنمەن وسۋدە، ول 1،4 ملن جفە-گە جەتتى. بيىل قحر-مەن تاسىمالداۋ جوسپارى مەرزىمىنەن بۇرىن ورىندالدى. قازاقستان-قىتاي تۇيىسپەلەرى ارقىلى تاسىمالداۋ كولەمى شامامەن 31،8 ملن. تونناعا جەتتى، بۇل 2023 جىلدان 12% ارتىق. ونىڭ ىشىندە، قازاقستاننان ەكسپورت 8،8% ارتىپ، 13،7 ملن توننانى قۇرادى.
قتج قىزمەتىنىڭ نەگىزگى باعىتتارىنىڭ ءبىرى ينفراقۇرىلىمدى جاڭعىرتۋ بولدى. 1400 كم-دەن استام جول جوندەۋدىڭ ءار تۇرلەرىمەن جاڭارتىلدى. 1 مىڭ شاقىرىمنان استام جاڭا تەمىر جول قۇرىلىسى (دوستىق – مويىنتى، داربازا – ماقتاارال، الماتى ستانسياسىنىڭ اينالما جولى) جالعاستى. دوستىق – مويىنتى ۋچاسكەسىندەگى ەكىنشى جولدى جانە الماتىنى اينالىپ وتەتىن تەمىرجول جەلىسىن كەلەسى جىلى اياقتاۋ جوسپارلانۋدا.
ينفراقۇرىلىمدىق جوبالار ىسكە قوسىلعاننان كەيىن ءترانزيتتىڭ ەكى ەسەگە – جىلىنا 55 ملن تونناعا دەيىن ۇلعايۋى بولجانۋدا. قازاقستاندىق دالىزدەرگە جۇك اعىندارىن تارتۋ ءۇشىن كومپانيا تەرمينالدىق جەلىنى كەڭەيتەدى. ءقازىردىڭ وزىندە بار 5 تەرمينال (ليانيۋنگان پورتى، سيان قالاسىنداعى قۇرعاق پورت، دوستىق ستانسياسىنداعى تەرمينال، Khorgos Gateway قۇرعاق پورتى، قۇرىق پورتىنداعى پاروم كەشەنى) الداعى ەكى جىلدا تاعى 9-مەن تولىقتىرادى. اعىمداعى جىلى الماتى قالاسىندا، ءازىربايجاننىڭ اليات تەڭىز پورتىندا، ۆەنگريا استاناسى – بۋداپەشتتە، ماسكەۋ ماڭىنداعى سەلياتينو كەنتىندە تەرمينالدار قۇرىلىسى باستالدى. قىتايلىق سەرىكتەس – ليانيۋنگان پورتىمەن بىرلەسىپ، اقتاۋ پورتىندا كونتەينەرلىك حاب سالۋ باستالدى.
ايتا كەتۋ كەرەك، 2024 جىلى ىسكە قوسىلعان سيان قالاسىنىڭ قۇرعاق پورتىنداعى قازاقستاندىق-قىتايلىق تەرمينال ترانسكاسپيي باعدارى بويىنشا قىتايدان ءترانزيتتى 30 ەسەگە ارتتىرۋعا مۇمكىندىك بەردى.
سينگاپۋرلىق PSA-مەن ىنتىماقتاستىقتا ازىرلەنگەن جىكسىز سيفرلىق ءدالىز مارشرۋتتاعى قازاقستاننىڭ ءرولىن كۇشەيتۋدە. جۇك تاسىمالى سالاسىنداعى كليەنتتىك سەرۆيستى تولىق سيفرلاندىرۋدى «ءبىرىڭعاي سيفرلىق تەرەزە» قامتاماسىز ەتسە، قتج بۇندا كومپانيانىڭ ەنشىلەس كاسىپورىندارىنىڭ بارلىق كوممەرسيالىق فۋنكسيالارىن بىرىكتىردى. جۇيە ۋاقىتتى ۇنەمدەيدى جانە تاسىمالداۋ پروسەسىن مۇمكىندىگىنشە اشىق ەتەدى.
قتج-نىڭ وپەراسيالىق جانە قارجىلىق تۇراقتىلىعىن Fitch، S&P حالىقارالىق رەيتينگتىك اگەنتتىكتەرى تاعى دا راستادى.