بۇعان دەيىن كىتاپتىڭ تۇساۋكەسەرى قازاقستاندا وتكەن بولاتىن
ماسكەۋدەگى قازاقستان ەلشىلىگىندە رەسەيلىك عالىم، تاريح عىلىمدارىنىڭ دوكتورى، پروفەسسور ۆيكتور كوزودويدىڭ "الاش" پارتياسى كوشباسشىلارىنىڭ ءبىرى، قازاقتىڭ كورنەكتى قوعام جانە مەملەكەت قايراتكەرىنىڭ ءومىرى مەن قىزمەتى تۋرالى "اليحان بۋكەيحانوۆ. چەلوۆەك-ەپوحا" ("ءاليحان بوكەيحانوۆ. اڭىز ادام") كىتابىنىڭ تۇساۋكەسەرى ءوتتى. بۇل تۋرالى Almaty-akshamy.kz قازاقستاننىڭ رەسەي فەدەراسياسىنداعى ەلشىلىگىنە سىلتەمە جاساپ حابارلايدى.
اۆتور ءوز ەڭبەگىندە دەرەككوزدەردى، ماتەريالدار مەن فاكتىلەردى، سونىڭ ىشىندە بۇرىن عىلىمي اينالىمدا پايدالانىلماعان مۇراعات قۇجاتتارىن، ەستەلىكتەردى، سول جىلدارداعى گازەت-جۋرنال بەتتەرىندەگى جاريالانىمداردى پايدالاندى.
بۇعان دەيىن كىتاپتىڭ تۇساۋكەسەرى قازاقستاننىڭ بەس قالاسىندا وتكەن بولاتىن. ەندى، رەسەيلىك عالىمدار مەن ساراپشىلاردىڭ قاتىسۋىمەن ماسكەۋ قالاسىندا ءوتتى.
جيىندى اشقان قازاقستاننىڭ رەسەيدەگى ەلشىسى ەرمەك كوشەربايەۆ بۇل كىتاپتى ءاليحان بوكەيحانوۆ تۇلعاسىنىڭ العاشقى تەرەڭ جانە تۇتاس عىلىمي زەرتتەۋى دەپ اتادى. تاريحي ادىلەتتىلىكتى قالپىنا كەلتىرۋ جانە قالىڭ بۇقاراعا اقپارات بەرۋ اياسىندا الاش قوزعالىسى قىزمەتىنىڭ كوپتەگەن قىرلارى اشىلماعانىن ەسكە سالدى. وسىعان بايلانىستى، بۇل كىتاپ قازاقستاننىڭ تاۋەلسىزدىگىن بولجاعان تاريحي وقيعالاردى زەرتتەۋگە ەلەۋلى ۇلەس قوستى.
شارا بارىسىندا ەرمەك كوشەربايەۆ ۆيكتور كوزودويعا 2-دارەجەلى "دوستىق" وردەنىن جانە قازاقستان رەسپۋبليكاسى پرەزيدەنتىنىڭ العىس حاتىن تابىس ەتتى.
ءوز كەزەگىندە عالىم قازاقستان باسشىلىعىنا جوعارى ماراپاتى ءۇشىن العىس ايتىپ، كىتاپتى ەكى ەل حالىقتارى اراسىنداعى دوستىقتى نىعايتۋعا قوسقان قاراپايىم ۇلەسى دەپ اتادى. ونىڭ پىكىرىنشە، ءاليحان بوكەيحانوۆتى قازاقستاننىڭ عانا ەمەس، رەسەيدىڭ دە تاريحي قايراتكەرى دەپ ساناۋعا بولادى، ويتكەنى ول مەملەكەتتىك دۋماعا سايلاندى، بۇكىلرەسەيلىك ۇيىمداردىڭ جۇمىسىنا جانە بۇكىلرەسەيلىك ماسەلەلەردى شەشۋگە قاتىستى.
ءسوز سوڭىندا ۆيكتور كوزودوي كىتاپتىڭ قازاق تىلىنە اۋدارىلعانىن ايتىپ، جاقىن ارادا ونىڭ جارىق كورۋىنە ءۇمىت ءبىلدىردى.