ۇشاق بيلەتىنىڭ قۇنى 7،8 ملن تەڭگەگە دەيىن قىمباتتاپ كەتكەن
الەۋمەتتىك جەلىدە ماسكەۋدەن الماتىعا قاتىنايتىن ۇشاق بيلەتىنىڭ قۇنى 7،8 ملن تەڭگەگە دەيىن قىمباتتاپ كەتكەنى تۋرالى اقپارات پايدا بولدى. وسىعان قاتىستى ازاماتتىق اۆياسيا كوميتەتى تۇسىنىكتەمە بەردى، دەپ حابارلايدى Almaty-akshamy.kz.
«الەۋمەتتىك جەلىلەردە ماسكەۋ – الماتى باعىتى بويىنشا بيلەتتەردىڭ باعاسىنا قاتىستى تاراتىلىپ جاتقان اقپاراتتاعى بيلەتتەردىڭ قۇنى دۋباي ارقىلى ماسكەۋ – دۋباي ("Emirates" اۋەكومپانياسى) جانە دۋباي – الماتى ("ەير استانا"اۋەكومپانياسى) مارشرۋتى بويىنشا ترانزيتتىك رەيستەردى ەسكەرە وتىرىپ كورسەتىلگەنىن حابارلايمىز. ال ماسكەۋ – الماتى جانە دۋباي – الماتى باعىتتارى بويىنشا قازاقستاندىق اۋە كومپانيالاردىڭ تىكەلەي رەيستەرىندە تاريفتەر وزگەرمەگەنىن اتاپ ءوتۋ قاجەت»، -دەلىنگەن ق ر ييدم ازاماتتىق اۆياسيا كوميتەتى تاراتقان مالىمەتتە.
مىسالى، 2022 جىلعى 21 قىركۇيەك ساعات 18:00-دەگى جاعداي بويىنشا:
• 2022 جىلعى 24 قىركۇيەكتەگى ماسكەۋ (ۆنۋكوۆو) – الماتى باعىتى بويىنشا "SCAT" قازاقستاندىق اۆياكومپانياسىنىڭ رەيسىنە بيلەت قۇنى 253688 تەڭگەنى جانە اعىمداعى جىلعى 29 قىركۇيەكتەگى باعاسى 208078 تەڭگەنى قۇرايدى.
• 2022 جىلعى 22 قىركۇيەكتەگى دۋباي-الماتى باعىتى بويىنشا "ەير استانا" اۋەكومپانياسىنىڭ رەيسىنە بيلەت قۇنى 334146 تەڭگەنى قۇرايدى.
ايتا كەتسەك، 21 قىركۇيەكتە رف پرەزيدەنتى ۆلاديمير پۋتين ەلدە ءىشىنارا موبيليزاسيا جاريالادى.
رەسەيلىك ادۆوكات گەورگيي مالكوۆ "فەدەرالپرەسس" اگەنتتىگىنە بەرگەن سۇقباتىندا رەسەي زاڭدارىنا سايكەس 18 جاستان 65 جاسقا دەيىنگى بارلىق ەر ادامدار شەتەلگە شىعا المايتىنىن ايتتى.
الايدا رەسەيدە موبيليزاسيا شارالارى قالاي ۇيىمداستىرىلاتىنى، ازىرگە بەلگىسىز. اسكەري مىندەتتىلەردىڭ ەلدەن شىعۋىنا تىيىم سالىنعانى تۋرالى دا ناقتى اقپارات جوق.