بەلسەندى توپ جاستارعا بىردەن بايىپ كەتۋ مۇمكىن ەمەستىگىن ايتتى
قارجىلىق ساۋاتتىلىقتى ارتتىرايىق! الماتىدا پروكۋرورلار، قارجىگەرلەر جانە قوعام بەلسەندىلەرى بىرىگىپ ستۋدەنتتەرگە وسىنداي تاقىرىپتا ءدارىس وقىدى، دەپ حابارلايدى Almaty-akshamy.kz Almaty.tv-گە سىلتەمە جاساپ.
ويتكەنى سوڭعى ۋاقىتتا ايلاكەرلەردىڭ قۇرعان قاقپانىنا جاستار تۇرماق، اقىل توقتاتقان ەرەسەكتەر دە ءتۇسىپ جاتىر. ماسەلەن، بيىل ءبىر عانا بوستاندىق اۋدانىندا الاياقتىق بابى بويىنشا 1300-گە جۋىق قىلمىستىق ءىس قوزعالىپتى. ونىڭ 215 ءىc - ينتەرنەت ارقىلى الدانعاندار.
«بوستاندىق اۋدانىندا ورنالاسقان جوو-نى ارالاپ شىعامىز. ءبىز جاستارعا الاياقتاردىڭ قۇربانى بولماس ءۇشىن نە ىستەۋ كەرەكتىگىن ءتۇسىندىرىپ جاتىرمىز. الدايتىنداردىڭ جاڭا ادىستەرىنەن دە حاباردار ەتتىك. ستۋدەنتتەر ەلىمىزدىڭ تۇكپىر-تۇكپىرىنەن كەلەدى عوي، كوبى بىلە بەرمەيدى، سول ءۇشىن زاڭ بۇزۋشىلىققا جول بەرمەۋ ءۇشىن تۇسىندىرمە جۇمىسىن جۇرگىزدىك»، – دەدى بوستاندىق اۋدانى پروكۋرورىنىڭ ورىنباسارى نۇرجان قازانتايەۆ.
بەلسەندى توپ جاستارعا بىردەن بايىپ كەتۋ مۇمكىن ەمەستىگىن ايتتى. ولار تەك ءبىلىم مەن ەڭبەكتىڭ ارقاسىندا عانا جەتىستىككە جەتۋگە بولاتىنىن ءتۇسىندىردى. سوندىقتان قارجى پيراميدالارى، ميكروكرەديتتىك ۇيىمدارعا جولاماۋعا شاقىردى. ال باستارىنا ءىس تۇسسە ونى جاقىندارىنا ايتىپ، اقىلداسۋ قاجەت.
«بالاعا اتا-انادان جاقىن ادام جوق. قانداي ماسەلەگە تاپ بولسا دا، ولار ەت جاقىندارىمەن بولىسە بىلۋلەرى قاجەت. الاياقتار ءبىر ورىندا تۇرمايدى. كۇن سايىن ارباۋدىڭ سان ءتۇرىن ويلاستىرىپ جاتىر. ول ءۇشىن جاستار ساۋاتتى بولۋ كەرەك. بۇل ءوز بولاشاقتارى ءۇشىن اسا كەرەك»، – دەدى «ىسكەر انا» الەۋمەتتىك جوباسىنىڭ جەتەكشىسى ءبيبىنۇر شەرالييەۆا.