مەملەكەت باسشىسىنىڭ بيىلعى جىلدى «جۇمىسشى ماماندىقتارى جىلى» دەپ جاريالاۋى – ەل دامۋىنىڭ ماڭىزدى كەزەڭدەرىنىڭ ءبىرى. بۇل باستاما قوعامداعى جۇمىسشى ماماندىقتارىنىڭ مارتەبەسىن ارتتىرۋعا، جاستاردى كاسىپتىك بىلىمگە ىنتالاندىرۋعا جانە ەڭبەك نارىعىنىڭ سۇرانىسىنا ساي مامانداردى دايارلاۋعا باعىتتالعان.
ءوندىرىستىڭ سيفرلىق داۋىرگە قادام باسۋى، جاساندى ينتەللەكت پەن اۆتوماتتاندىرۋدىڭ كەڭ تارالۋى كاسىبي داعدىلاردى ۇنەمى جەتىلدىرۋدى تالاپ ەتەدى. ەگەر ءبىز ەلىمىزدى الەمدىك تەحنولوگيالىق كوشباسشىلاردىڭ قاتارىنا قوسۋدى قالاساق، ەڭ الدىمەن، جوعارى بىلىكتى تەحنيكالىق مامانداردى دايارلاۋىمىز كەرەك. سوندىقتان 2025 جىلدىڭ «جۇمىسشى ماماندىقتار جىلى» بولىپ جاريالانۋى – ۋاقىت تالابىنا ساي قابىلدانعان ستراتەگيالىق شەشىم.
الەۋمەتتىك كوزقاراستى وزگەرتۋدىڭ ۋاقىتى جەتتى. قوعامدا «جوعارى ءبىلىم الۋ – تابىستى بولاشاقتىڭ كەپىلى» دەگەن ءبىرجاقتى پىكىر قالىپتاسقان. ءبىراق شىن مانىندە، كاسىپتىك-تەحنيكالىق ءبىلىم العان ماماندار ەلىمىزدىڭ ەكونوميكالىق دامۋىنا تەڭدەي ۇلەس قوسادى، ال كوپتەگەن سالالاردا ولاردىڭ ءرولى ءتىپتى ماڭىزدىراق. ەنەرگەتيكا، قۇرىلىس، ءوندىرىس، كولىك، اقپاراتتىق تەحنولوگيالار جانە باسقا دا سالالار جۇمىسشى ماماندارسىز دامىمايدى. بۇگىندە شەتەلدىك تاجىريبە كورسەتىپ وتىرعانداي، جوعارى بىلىكتى جۇمىسشىلاردىڭ ەڭبەكاقىسى كەيبىر كەڭسە قىزمەتكەرلەرىنەن الدەقايدا جوعارى بولۋى مۇمكىن. بۇل قوعامدا جۇمىسشى ماماندىقتارىنا دەگەن كوزقاراستى تۇبەگەيلى وزگەرتۋ قاجەتتىگىن دالەلدەيدى.
ماڭىزدى كەزەڭ
«الماتى ەنەرگەتيكا جانە ەلەكتروندى تەحنولوگيالار كوللەدجى» – ەلىمىزدىڭ تەحنيكالىق جانە كاسىپتىك ءبىلىم بەرۋ جۇيەسىندەگى الدىڭعى قاتارلى وقۋ ورىندارىنىڭ ءبىرى. ءبىزدىڭ باستى مىندەتىمىز – ونەركاسىپتىك ريەۆوليۋسيا جاعدايىندا باسەكەگە قابىلەتتى مامانداردى دايارلاۋ.
كوللەدجىمىزدە ءبىلىم بەرۋ ءۇردىسى ەڭبەك نارىعىنىڭ زاماناۋي تالاپتارىنا تولىق سايكەس كەلەدى. ءبىز تەك تەوريالىق ءبىلىم بەرىپ قانا قويماي، ستۋدەنتتەرىمىزدى ناقتى وندىرىستىك جاعدايلارعا دايىندايمىز. وسى ماقساتتا كاسىپورىندارمەن سەرىكتەستىكتى كەڭەيتىپ، زاماناۋي زەرتحانالار مەن وندىرىستىك الاڭداردا تاجىريبەلىك ساباقتار ۇيىمداستىرامىز.
كوللەدج ەنەرگەتيكا، ەلەكتروندى تەحنيكا، اۆتوماتتاندىرۋ، اقپاراتتىق تەحنولوگيالار جانە باسقا دا ماڭىزدى سالالار بويىنشا ماماندار دايارلايدى. ءبىزدىڭ تۇلەكتەرىمىز – قازاقستان ەكونوميكاسىنىڭ قوزعاۋشى كۇشى. ءبىز ونەركاسىپتىڭ وزىق كومپانيالارىمەن تىعىز بايلانىس ورناتىپ، ستۋدەنتتەرىمىزگە زاماناۋي جۇمىس ورىندارىندا تاعىلىمدامادان ءوتۋ مۇمكىندىگىن ۇسىنامىز.
ەلىمىزدىڭ بولاشاعى – بىلىكتى، تاجىريبەلى، ەڭبەكقور مامانداردىڭ قولىندا. ءبىز جاستاردىڭ كاسىپتىك-تەحنيكالىق ءبىلىم الۋىن ىنتالاندىرۋ ارقىلى ولاردىڭ بولاشاقتا تۇراقتى جۇمىسقا ورنالاسۋىنا، لايىقتى تابىس تابۋىنا جانە ءوز ماماندىعى بويىنشا دامۋ مۇمكىندىگىنە يە بولۋىنا جول اشامىز.
«الماتى ەنەرگەتيكا جانە ەلەكتروندى تەحنولوگيالار كوللەدجى» جاستارعا سەنىمدى بولاشاق سىيلايتىن ءبىلىم ورداسى رەتىندە بۇل باستامانى تولىقتاي قولدايدى. ءبىز ءوز ستۋدەنتتەرىمىزدىڭ تەك بىلىكتى مامان عانا ەمەس، ەل دامۋىنا ۇلەس قوساتىن كاسىبي شەبەرلەر بولىپ قالىپتاسۋىنا بار كۇشىمىزدى سالامىز. 2025 جىلعى «جۇمىسشى ماماندىقتارى جىلى» – كاسىپتىك ءبىلىم بەرۋ جۇيەسىنىڭ جاڭا دەڭگەيگە كوتەرىلۋىنە مۇمكىندىك بەرەتىن ماڭىزدى كەزەڭ. بۇل جىل تەحنيكالىق جانە كاسىپتىك ءبىلىم بەرۋ مەكەمەلەرى ءۇشىن ۇلكەن جاۋاپكەرشىلىكتى تالاپ ەتەدى. ءبىز بۇل وزگەرىستەردىڭ الدىڭعى قاتارىندا بولۋعا دايىنبىز.