سونداي-اق، ەل پرەزيدەنتى «جۇمىستىڭ جامانى جوق، كەز – كەلگەن ەڭبەك قۇرمەتكە يە. ەڭ باستىسى، ءاربىر ازامات ءوز مىندەتتەرىن ادال، تەرەڭ جاۋاپكەرشىلىك سەزىمىمەن ورىنداسا، ءبىزدىڭ ەل پروگرەسس جولىندا بيىكتەرگە جەتەدى» دەپ وتىر. ارينە، قوعامدا ەڭ الدىمەن ادال جانە جاۋاپتى جۇمىس مىندەتتى تۇردە باعالانادى دەگەن تۇسىنىك قالىپتاسۋى كەرەك. بۇرىن ماراپاتتار مۇعالىمدەرگە، دارىگەرلەرگە جانە مادەنيەت قايراتكەرلەرىنە عانا ارنالىپ كەلدى. ەندىگى جەردەمەملەكەت باسشىسى ەلىمىزدىڭ باسەكەگە قابىلەتتى ەكونوميكاسى مەن ۇدەمەلى ىلگەرىلەۋىن قالىپتاستىرۋ ءۇشىن جۇمىسشى كاسىپتەرى مەن ءتۇرلى سالا ماماندارىنىڭ بەدەلىن دايەكتى تۇردە ارتتىرۋ قاجەت، -دەپ تولىقتىردى. مەملەكەت باسشىسىنىڭ العا قويعان مىندەتتەرىن ورىنداۋدىڭ وزەكتىلىگى مەن قاجەتتىلىگىن الماتى اۆتومەحانيكا كوللەدجىنىڭ ينجەنەرلىك-پەداگوگيكالىق ۇجىمى بولاشاق مامانداردى جان-جاقتى وقىتىپ، ساپاسىن ارتتىرۋدى ماقسات ەتىپ، ءوز جۇمىسىن جالعاستىرۋدا، ويتكەنى ەلىمىزدىڭ دامۋ تاريحىندا جۇمىسشى ماماندىقتار جىلى العاش رەت جاريالانىپ وتىر.
كوللەدجدىڭ تاريحى قۇرىلىس سالاسىنىڭ بىلىكتى جۇمىسشى كادرلارىن دايارلاۋ ءۇشىن "مينتياجستروي" جانىنداعى قالالىق كاسىپتىك تەحنيكالىق ۋچيليششەنىڭ اشىلۋىنان باستالادى. بۇل وتكەن عاسىردىڭ جەتپىسىنشى جىلدارىنىڭ سوڭى. سول كەزدىڭ وزىندە مەملەكەت قۇرىلىسىنا اسا قاجەت كرانشى، جۇرگىزۋشى، اۆتوكولىك سلەسارى، اعاش ۇستاسى سياقتى جۇمىسشى مامانداردى دايارلاعان ەكەن. تالاي بەلەستەن وتكەن وقۋ ورنى الماتى قالاسى اكىمدىگىنىڭ شەشىمىمەن 2013 جىلدان باستاپ، «الماتى اۆتومەحانيكا كوللەدجى» كوممۋنالدىق مەملەكەتتىك قازىنالىق كاسىپورنى بولىپ وزگەرتىلدى. بۇگىنگى تاڭدا كوللەدج "اۆتوموبيل كولىگىنە تەحنيكالىق قىزمەت كورسەتۋ، جوندەۋ جانە پايدالانۋ"، "دانەكەرلەۋ ءىسى"؛ "توكارلىق ءىس جانە مەتالل وڭدەۋ" سىندى ماماندىقتاردىڭ ماماندارىن دايارلاپ جاتىر. كوللەدجدە 800-دەن استام ستۋدەنت وقيدى. وقىتۋ مودۋلدىك-قۇزىرەتتىلىك ءتاسىل نەگىزىندە جۇرگىزىلەدى. ءبىز دۋالدى وقىتۋ جۇيەسى نەگىزىندە سەرىكتەس كاسىپورىندارمەن وندىرىستىك جانە كاسىپتىك تاجىريبە بويىنشا ىنتىماقتاستىق نەگىزدە جۇمىس جاساپ جاتىرمىز. كوللەدجدىڭ وقۋ-ماتەريالدىق بازاسى "جاس مامان" باعدارلاماسىنا سايكەس ماشينا جاساۋ باعىتى بويىنشا زاماناۋي جابدىقتارمەن جابدىقتالعان. جىل سايىن الماتى قالاسىنىڭ اكىمدىگى ەڭبەك نارىعى مەن الەۋمەتتىك ارىپتەستەردىڭ تالاپتارىنا سايكەس كوللەدجدىڭ قولدا بار ماتەريالدىق بازاسىن جەتىلدىرۋدى جۇرگىزىپ كەلەدى. كوللەدجدىڭ ۇجىمى ءتيىستى ساناتتارى مەن ءبىلىمى بار مىقتى ينجەنەرلىك-پەداگوگتەردەن تۇرادى. بۇل تۇرعىدا كوللەدج پەداگوگتارى قالالىق جانە رەسپۋبليكالىق دەڭگەيدە بىلىكتىلىكتى ارتتىرۋ كۋرستارىنان ءوتىپ وتىرادى.
الماتى قالاسى اكىمدىگىنىڭ باستاماسىنا سايكەس ارنايى پاندەر وقىتۋشىلارى مەن وندىرىستىك وقىتۋ شەبەرلەرى ءۇشىنشى جىل قاتارىنان ەكونوميكالىق ىنتىماقتاستىق جانە دامۋ ۇيىمى ەلدەرىنىڭ وقۋ ورتالىقتارىندا حالىقارالىق تاعىلىمدامادان ءوتۋدى جالعاستىرىپ جاتىر.