قازاقشا كونتەنتتەرىمەن تانىمال Tynzhy cartoon دەگەن ارنا بار. الماتىلىق جاس رەجيسسەر-انيماتور مارجان جۇبانىشتىڭ جوباسى. ونەر كوگىندە قازاقى تۋىندىلارىمەن، ەرەكشە قولتاڭباسىمەن قانات جايىپ كەلە جاتقان ول از ۋاقىت ىشىندە «ءباس»، «بارىنەن دە سەن سۇلۋ»، «شاڭىراقتىڭ يەسىن ىزدەپ ءجۇرمىن»، «بالالى ءۇي – بازار»، «ساۋعا»، «قوشاقان»، «جالقاۋبەك»، «قۋىرماش» سىندى مۋلتفيلمدەر ءتۇسىردى. جاس انيماتوردىڭ ماقسات-مۇددەسىن بىلمەككە اڭگىمەگە تارتقان بولاتىنبىز.
– مارجان، Tynzhy cartoon ارناڭىزدا قازاقشا بالالار ولەڭدەرىنە ەرەكشە ءمان بەرىپ جۇرسىزدەر. نەگە ءدال وسى باعىتتى تاڭدادىڭىزدار؟
– ءبىز ەڭ الدىمەن بالالارىمىزدىڭ قازاقشا سويلەپ، قازاقشا ويلاعانىن قالايمىز. ويتكەنى بالاعا ءتىل – ويىنشىق سەكىلدى. ەگەر وعان ءتىلدى قىزىقتى مۋلتفيلممەن، انمەن ۇسىنىپ ۇيرەتسەڭ، ول تەز قابىلدايدى. بالانىڭ ءتىلى ءوز انا تىلىندە شىعۋى ءۇشىن كونتەنت قاجەت.
ءبىر قۋانتارلىعى، YouTube ارنامىزدى كورەتىندەردىڭ سانى كۇن سايىن ءوسىپ كەلەدى. ءقازىر جازىلۋشىلارىمىزدىڭ سانى 13 000-عا جۋىقتاپ قالدى. بۇل بىزگە ۇلكەن كۇش بەرەدى.
ءبىزدىڭ ارنامىزدا «قوشاقان»، «باقا-باقا بالپاق»، «جالقاۋبەك»، «قۋىرماش» سياقتى ولەڭدەرگە مۋلتفيلمدەر جاسادىق. بۇلار – قازاقتىڭ داستۇرىندە بالا تاربيەلەۋدىڭ نەگىزگى قۇرالى دەپ بىلەمىن.
– وسى ولەڭدەر تۋرالى قىسقاشا ايتىپ وتسەڭىز. نەگىزگى ماقساتى قانداي؟
– ءبىزدىڭ ارناداعى ولەڭدەردىڭ بارلىعى – قازاقتىڭ ۇمىتىلىپ بارا جاتقان حالىق اندەرى. سولاردى جاڭا زامانعا لايىقتاپ، بالالارىمىزعا جەتكىزۋدى ماقسات ەتتىك.
«قوشاقان» – بالا كەزىمىزدەن جاتتاپ وسكەن ولەڭ. ءبىز بۇل ولەڭدى جاڭا ارانجيروۆكامەن، اۋەنىن تارتىمدى ەتىپ جاساپ، بالالارعا قىزىقتى قىلۋعا تىرىستىق. بالالار قوشاقاننىڭ قيمىلىن كورىپ، قۋانىپ، بىرگە بيلەپ كەتەدى.
«باقا باقا بالپاق» – سۇراق-جاۋاپ ۇلگىسىندەگى ولەڭ. بۇل ولەڭ ارقىلى بالالار ويلانۋدى، جاۋاپ تابۋدى، ءتىل ۇيرەنۋدى مەڭگەرەدى. ءاننىڭ اۋەنىن جەڭىل ءارى ەستە قالاتىنداي ەتىپ ارنايى ستۋديادا جازدىردىق.
«جالقاۋبەك» – تاربيەلىك ماعىناسى زور ولەڭ. وندا جالقاۋ بالا تۋرالى ايتىلادى. ءبىزدىڭ ۆيدەودا جالقاۋبەك ساباق وقىعىسى كەلمەي، ۇيىقتاي بەرەدى. سىنىپتاستارى «ءاي، ءاي، جالقاۋبەك!» دەپ ءان سالىپ، ونى ەڭبەككە شاقىرادى. بۇل ارقىلى بالالارعا ەڭبەكقور بولۋدىڭ ماڭىزىن جەتكىزەمىز.
«قۋىرماش» – قازاقتىڭ ساۋساق ويىنى. انالارىمىز ءبىزدى الدىنا وتىرعىزىپ، الاقانىمىزعا ساۋساقپەن «قۋىر-قۋىر-قۋىرماش!» دەپ ولەڭ ايتىپ بەرەتىن ەدى. ءبىز سول ولەڭدى جاڭارتىپ، بالالاردىڭ ەسىندە قالاتىن، ءداستۇر ۇزىلمەيتىن نۇسقاسىن جاسادىق. ءار ساۋساقتىڭ اتاۋىن، قيمىلىن مۋلتفيلم ارقىلى ۇيرەتەمىز.
– اتا-انالاردىڭ پىكىرى قانداي؟
– شۇكىر، اتا-انالاردان وتە جىلى پىكىرلەر الامىز. كوبى: «ءسىزدىڭ ولەڭدەرىڭىزدەن كەيىن بالالارىمىز كۇنى بويى ايتىپ جۇرەدى، كۇندە «قوشاقاندى» قويشى دەپ سۇرايدى!» – دەپ جازادى. ال كەيبىرى Instagram-داعى جەكە پاراقشاما دا حابارلاسادى. «تاعى دا ولەڭدەر تۇسىرىڭىزدەرشى! ءبىزدىڭ بالالار قايتا-قايتا كورگىسى كەلە بەرەدى. كونتەنت كوپ بولسا كەرەمەت بولار ەدى. ءسىزدىڭ سۋرەتتەرىڭىز سونداي تارتىمدى!» – دەپ پىكىر قالدىرادى.
وسى پىكىرلەر بىزگە قانات بىتىرەدى. دەمەك، ەڭبەگىمىز زايا ەمەس دەگەن ءسوز.
– Tynzhy cartoon-نىڭ تۇپكى ميسسياسى قانداي؟
– Tynzhy cartoon-داعى ەڭ ۇلكەن ماقساتىمىز – قازاق بالاسىنىڭ قۇلاعىن قازاق انىمەن اشۋ. بالا قازاقشا سويلەسىن، قازاقشا كۇلسىن. بۇل – مەنىڭ ەڭ ۇلكەن ارمانىم ءارى ميسسيام.
ارنامىزداعى ءار ۆيدەو ارقىلى ءۇش ماڭىزدى نارسەنى جەتكىزگىمىز كەلەدى. ءبىرىنشىسى، ءتىل ساقتالسا – ۇلت ساقتالادى. ءبىز بالالارعا جەڭىل ءارى تۇسىنىكتى مۋلتفيلمدەر جاساپ، قازاق ءتىلىنىڭ دامۋىنا ۇلەس قوسىپ ءجۇرمىز. ەكىنشىسى، ۇلتتىق كود مۋلتفيلمدە تۇر. «قوشاقا، باقا، جالقاۋبەك، قۋىرماش – ءبارى دە قازاق دۇنيەتانىمىنان الىنعان كەيىپكەرلەر. ءۇشىنشىسى، بالانى تاربيەلەۋ مۋلتفيلمنەن باستالادى.
ءبىزدىڭ ۆيدەولار تەك كوڭىل كوتەرۋ ءۇشىن ەمەس. ولار بالانىڭ مىنەزىن قالىپتاستىرۋعا، ەڭبەكقور، ىزدەنىمپاز بولۋعا باۋليدى.
مەن ءاردايىم قازاق بالاسىنىڭ قۇلاعى قازاق انىمەن اشىلسىن، بالا قازاقشا سويلەسىن، قازاقشا كۇلسىن دەپ جۇرەمىن. بۇل – ءبىزدىڭ ميسسيامىز.
Tynzhy cartoon بالالاردىڭ رۋحاني شىراعىنا اينالىپ كەلەدى. جاس انيماتور، رەجيسسەر مارجان جۇبانىش بۇل ارنانى قازاق تىلىندەگى ساپالى كونتەنتتىڭ ازدىعىن سەزىنىپ، ورەندەردىڭ يگىلىگى ءۇشىن دەپ اشقان بولاتىن. ناتيجەسى جامان ەمەس. قازاقتىڭ قوشاقانى، باقاسى، جالقاۋبەگى مەن قۋىرماشى مۋلتفيلم ارقىلى قايتا ءتىرىلىپ، جاڭا زامان بالاسىنىڭ جۇرەگىنە جول تاپتى. قازاق بالاسى قازاقشا ءان ايتىپ، قازاقشا ويناسىن دەسەك، وسىنداي جوبالاردى قولداۋ – ءبارىمىزدىڭ ورتاق مىندەتىمىز.