12 مامىردا بۇكىل الەمدەگى مەيىرگەرلەر وزدەرىنىڭ كاسىبي مەرەكەسىن – حالىقارالىق مەيىرگەرلەر كۇنىن اتاپ وتەدى. مەديسينالىق ۇيىمداردىڭ قىزمەتىن دارىگەرلەردىڭ عانا ەمەس، پاسيەنتتەردىڭ دە باس كومەكشىسى بولىپ تابىلاتىن مەيىرگەرسىز ەلەستەتۋ مۇمكىن ەمەس.
«كارديولوگيا جانە ىشكى اۋرۋلار عىلىمي-زەرتتەۋ ينستيتۋتىنىڭ بارلىق مەيىرگەرلەرى جىلى لەبىزدەر مەن شىنايى العىس سوزدەرگە لايىق. مەيىرگەرلەردىڭ جۇمىسى دارى-دارمەكتەردى بەرۋ نەمەسە ومىرلىك ماڭىزدى كورسەتكىشتەردى تەكسەرۋ عانا ەمەس، ولار پاسيەنتتىڭ قالپىنا كەلۋ پروسەسىنىڭ ءار كەزەڭىندە دە جانىنان تابىلادى. مەيىرگەرلىك كۇتىم – ساپالى جانە ءقاۋىپسىز مەديسينالىق قىزمەت كورسەتۋدىڭ نەگىزى. مەيىرگەرلەردىڭ دەنساۋلىق ساقتاۋ جۇيەسىندەگى ءرولى كلينيكالىق داعدىلاردى، كوشباسشىلىقتى، بەيىمدەلۋدى جانە ەموسيونالدى تۇراقتىلىقتى قاجەت ەتە وتىرىپ، ودان ءارى ارتىپ وتىر»، – دەيدى كارديولوگيا جانە ىشكى اۋرۋلار عزي باسقارما ءتوراعاسى مارات پاشيموۆ.
اتالمىش ينستيتۋتتاعى مەيىرگەرلەر – ءار پاسيەنتكە ۋاقىتىلى جانە جان-جاقتى كومەك كورسەتەتىن كلينيكالىق توپتىڭ اجىراماس مۇشەلەرى. ولاردىڭ ءوز ىسىنە ادالدىعى كۇندەلىكتى ومىردە عانا ەمەس، سونىمەن قاتار پاسيەنتتەردىڭ قاجەتتىلىگىن قالاي بولجايتىندىعىندا جانە مەديسينالىق كومەكتىڭ ەڭ جوعارى ستاندارتتارىن ساقتاۋىندا كورىنەدى.
مىسالى، 2024 جىلى JCI اككرەديتتەۋدەن قايتا ءوتۋ كەزىندە حالىقارالىق ساراپتاما كوميسسياسىنىڭ اۋديتورلارى كلينيكانىڭ دارىگەرلەرىنىڭ جانە دە مەيىرگەرلەرىنىڭ كاسىبي بىلىكتىلىگىنىڭ جوعارى الەۋەتىن راستادى. JCI ستاندارتتارى بويىنشا ۇيىمداعى بارلىق بولىمشە مەن پروسەستەر باعالاندى: دارىگەر مەن مەيىرگەرلىك كۇتىمنەن باستاپ عيماراتتىڭ قاۋىپسىزدىگىنە، ينفەكسيالىق باقىلاۋعا، دارى-دارمەكپەن جۇمىس ىستەۋگە، پاسيەنتتىڭ قۇقىقتارىن ساقتاۋعا دەيىن. اۋديتورلار مەيىرگەرلەر مەن دارىگەرلەردىڭ ءتيىمدى توپتىق جۇمىسىن اتاپ ءوتتى.
مەيىرگەر – بۇل جاناشىرلىق پەن ادالدىققا نەگىزدەلگەن دەنساۋلىق ساقتاۋ سالاسىنىڭ ەرەكشە نازىك، ءبىراق كۇشتى جاقتارىنىڭ ءبىرى. ول – ادامزاتتى ساۋىعۋعا جەتەلەيتىن اياۋلى جان.
"ءبىزدىڭ ميسسيامىزعا سايكەس، ينستيتۋتتىڭ قىزمەتى دەنساۋلىق ساقتاۋ جۇيەسىنىڭ عىلىم، ءبىلىم مەن پراكتيكاسىنىڭ ءۇشتۇعىرلىعى قاعيداتى شەڭبەرىندە جۇزەگە اسىرىلادى. وسى تۇرعىدا، مەيىرگەر ماماندارىنا ۇزدىكسىز ءبىلىم بەرۋ شەڭبەرىندە ءبىز مەديسيناداعى زاماناۋي ستاندارتتار مەن جاڭا تەحنولوگيالاردى ەسكەرە وتىرىپ، فورمالدى/فورمالدى ەمەس وقىتۋ باعدارلامالارىن ەنگىزۋدەمىز، سونداي-اق ءپانارالىق ءوزارا ءىس-قيمىل جانە كوماندالىق جۇمىس داعدىلارىن دامىتۋدامىز. مەيىرگەر ءىسىنىڭ ءارتۇرلى سالالارىنداعى ساراپشىلاردىڭ قاتىسۋىمەن پاسيەنتتەرگە كۇتىم جاساۋدىڭ جانە زاماناۋي مەديسينالىق قۇرىلعىلاردى پايدالانۋدىڭ جاڭا ادىستەمەلەرى بويىنشا ترەنينگتەر، سەمينارلار مەن شەبەرلىك كلاستارىن وتكىزەمىز. مەيىرگەرلەر كاسىپتىك اۋرۋلاردىڭ الدىن الۋ جانە سوزىلمالى ناۋقاستارعا كۇتىم جاساۋ ماسەلەلەرى بويىنشا ۇزدىكسىز بىلىكتىلىگىن ارتتىرۋدا. ولاردى سيمۋلياسيالىق ترەنينگتەر ارقىلى پراكتيكالىق دايارلاۋ قامتاماسىز ەتىلەدى. مۇنداي شارالار مەيىرگەرلەردىڭ كاسىبي دەڭگەيىن ارتتىرۋعا، دەنساۋلىق ساقتاۋدىڭ قازىرگى زامانعى تالاپتارىنا سايكەس مەديسينالىق قىزمەت كورسەتۋ ساپاسىن جاقسارتۋعا ىقپال ەتەدى"، – دەدى م.پاشيموۆ.
