الماتىداعى ءابىلحان قاستەيەۆ اتىنداعى ق ر مەملەكەتتىك ونەر مۋزەيىندە قازاق ونەرىندەگى مال شارۋاشىلىعىنىڭ ءسيمۆوليزمىن كورسەتەتىن ەرەكشە كورمە ءوتتى. «Qunart: قازاق ونەرىندەگى قوي بەينەسىنىڭ تاريحى» ەكسپوزيسياسى ءداستۇر مەن زاماناۋيلىقتى شەبەر ۇشتاستىرا وتىرىپ، قازاقستاننىڭ مال شارۋاشىلىعى مەن مادەنيەتىنە نازار اۋدارتاتىن Qunar+ رەاليتي-شوۋىنىڭ لايىقتى جالعاسى ىسپەتتى.
كورمە – قازاق حالقىنىڭ ومىرىندەگى ەڭ ماڭىزدى تاقىرىپتاردىڭ ءبىرى مال شارۋاشىلىعىن ۆيزۋالدى تۇردە بەينەلەيتىن بىرەگەي جوبا. قوي شارۋاشىلىعى كوشپەلى حالىق ءۇشى عاسىرلار بويى باستى كاسىپ بولدى، ال شەكسىز دالا مەن جارتىلاي شولەيت جايىلىمدار قوي وسىرۋگە وتە قولايلى جاعداي جاسادى. بۇل كاسىپ اتا-بابامىزدى ەتپەن، جۇنمەن، سۇتپەن، تەرىمەن قامتاماسىز ەتىپ قانا قويماي، وسى ونىمدەردى كورشىلەس وتىرىقشى حالىقتارمەن ايىرباستاۋعا دا مۇمكىندىك بەرگەن.
كوركەم جوبانىڭ باستى ەرەكشەلىگى – ءا.قاستەيەۆ اتىنداعى ق ر مەملەكەتتىك ونەر مۋزەيىنىڭ قورىنداعى بىرەگەي كوللەكسياسىمەن جۇمىس ىستەۋ بولدى. كورمەنىڭ كۋراتورى وليا ۆەسەلوۆا مۋزەي قورىندا ساقتالعان تۋىندىلاردى مۇقيات زەرتتەدى. ناتيجەسىندە كورمەگە سيرەك قويىلاتىن ءارى كورەرمەن نازارىنا ءجيى ىلىگە بەرمەيتىن شىعارمالار تاڭدالدى. ولاردىڭ قاتارىندا ءابىلحان قاستەيەۆ، اناربەك ناقىسبەكوۆ، كونستانتين پليۋحين، ساحي رومانوۆ،
ءابدىراشيت سىدىحانوۆ، عاني بايانوۆ، باقىت باپيشيەۆ، ايشا عالىمبايەۆا، مولداحمەت كەنبايەۆ، جاناتاي شاردەنوۆ جانە باسقا دا سۋرەتشىلەردىڭ تۋىندىلارى بار.
سونىمەن قاتار، كورمەگە ايجان بەكقۇلوۆا، شاميل گۋلييەۆ، باقىت ءبۇبىقانوۆا، الماگۇل مەڭلىبايەۆا، سايد اتابەكوۆ، ساۋلە ديۋسەنبينا، مۇراتبەك تۇرباي، ءانۋار مۇسىرەپوۆ، ءلايلا جارقىن سىندى قازىرگى زامانعى وتاندىق سۋرەتشىلەر دە قاتىسقان.
«Qunar» جوباسى ارقىلى ءبىز فەرمەرلىك پەن اۋىل تۇرمىسىنا جاڭاشا باعىتتا قاراۋ وتكەننىڭ ەمەس، بولاشاقتىڭ ءىسى ەكەنىن كورسەتكىمىز كەلەدى. Qunar+ رەاليتي-جوباسىن قازاق تىلىندە جاساعانىمىز دا سوندىقتان. اتا-بابامىزدىڭ داۋىسى ءوز تىلىمىزدە شىنايى ەستىلىپ، بۇگىنگى ۇرپاققا كۇش بەرسىن دەيمىز. Qunar رەاليتي-جوباسىنىڭ يدەياسىن قولعا العاندا ءبىزدى ءبىر ستاتيستيكا قاتتى ويلاندىردى: 1990 جىلى قازاقستاندا 9،8 ميلليون ءىرى قارا مەن 36 ميلليون ۇساق مال بولعان. ءقازىر بۇل كورسەتكىش – 8،5 پەن 21 ميلليون عانا. بۇل جاي ساندار ەمەس، بۇل بىزگە وي سالاتىن، ارەكەتكە يتەرمەلەيتىن شىندىق. ءبىز بولاشاقتى ويلاساق، بۇگىننەن باستاۋىمىز كەرەك، – دەيدى «Qunar Creative» قوعامدىق بىرلەستىگىنىڭ نەگىزىن قالاۋشى جانە جوبا جەتەكشىسى اقەركە تاتيشيەۆا.
