قازاقستاندا ەسىرتكىگە قارسى كۇرەس اياسىندا سوڭعى ءتورت ايدا شامامەن 3،5 توننا ەسىرتكى زاتى تاركىلەندى. بۇل تۋرالى Aqshamnews.kz سايتى حابارلايدى.
قازاقستان رەسپۋبليكاسى ىشكى ىستەر مينيسترلىگىنىڭ (ءىىم) مالىمەتىنشە، ءتورت اي ىشىندە ەل اۋماعىندا ءۇش مىڭعا جۋىق ەسىرتكى قۇقىق بۇزۋشىلىعى تىركەلگەن. ونىڭ ىشىندە 828 ەسىرتكى ساتۋ فاكتىسى انىقتالدى. زاڭسىز اينالىمنان تاركىلەنگەن ەسىرتكىلەردىڭ جالپى سالماعى شامامەن 3،5 توننانى قۇرايدى، ونىڭ ىشىندە:
-
259 كگ سينتەتيكالىق ەسىرتكى؛
-
ەكى تونناعا جۋىق ماريحۋانا؛
-
303 كگ گاشيش.
سونىمەن قاتار، قۇقىق قورعاۋ ورگاندارى التى تونناعا جۋىق پرەكۋرسوردى تاركىلەپ، 83 ەسىرتكى زەرتحاناسىن جويدى.
ءىىم ەسىرتكى قىلمىسىنا قارسى ءىس-قيمىل كوميتەتى ءتوراعاسىنىڭ مىندەتىن اتقارۋشى دانيار مەيىرحاننىڭ ايتۋىنشا، ەسىرتكى قىلمىسىنا قاتىسى بار 20 ۇيىمداسقان قىلمىستىق توپتىڭ جولى كەسىلگەن. قۇقىق قورعاۋشىلار 1783 ادامدى ۇستادى، ونىڭ ىشىندە 669 ادام قاماۋعا الىندى.
ەسىرتكى تاراتۋدا ينتەرنەتتىڭ بەلسەندى قولدانىلۋى دا نازاردا. ءىىم مالىمەتىنشە، زاڭسىز كونتەنتى بار 11 مىڭنان استام سايت بۇعاتتالدى. سونىمەن قاتار، 1 ملرد تەڭگەدەن استام سوماعا 12 مىڭ بانك كارتاسى مەن شوت توقتاتىلدى. بۇل شارالار ونلاين ەسىرتكى ساۋداسىنىڭ جولىن كەسۋ ماقساتىندا جۇرگىزىلدى.
ءىىم وكىلدەرى ەسىرتكى قىلمىسىنا قارسى كۇرەستى كۇشەيتۋگە نيەتتى. دانيار مەيىرحاننىڭ ايتۋىنشا، ەلدە ەسىرتكىنى ءوندىرۋ جانە تاراتۋعا قارسى اۋقىمدى وپەراسيالار ءالى دە جالعاسىن تابادى. قۇقىق قورعاۋ ورگاندارى ەسىرتكىمەن بايلانىستى قىلمىستاردىڭ الدىن الۋ، زاڭسىز اينالىمدى جويۋ جانە حالىقتىڭ قاۋىپسىزدىگىن قامتاماسىز ەتۋ ماقساتىندا بەلسەندى جۇمىس جۇرگىزۋدە.