ايگىلى مارال يشاننىڭ كەنەسارى حانعا سىيلاعان قۇرانى تابىلدى.
بۇل وقيعا قازاقستاننىڭ جاڭا ءداۋىرىنىڭ بەرەكەلى باستاۋى بولسىن دەپ تىلەيىك، دەدى پرەزيدەنت. مەملەكەت باسشىسى كەنەسارى حاننىڭ قولىندا بولعان قۇران كىتابىنىڭ ەلگە كەلۋىن جاقسى ىرىمعا بالادى.
بۇل جايىندا تۇركىستاندا وتكەن ۇلتتىق قۇرىلتايدىڭ «ادىلەتتى قازاقستان – ادال ازامات» اتتى ەكىنشى وتىرىسىندا پرەزيدەنت قاسىم-جومارت توقايەۆ ايتتى، دەپ حابارلايدى Almaty-akshamy.kz.
«جيىننىڭ سوڭىندا ەلدىڭ رۋحىن كوتەرەتىن تاعى ءبىر جاقسى جاڭالىقتى سىزدەرمەن بولىسكىم كەلەدى. ايگىلى مارال يشاننىڭ كەنەسارى حانعا سىيلاعان قۇرانى تابىلدى. بۇل – ەلىمىزدىڭ رۋحاني ومىرىندەگى ەلەۋلى وقيعا. مارال يشان بارشا قازاققا تانىمال ادام بولعان. ول – ءتول تاريحىمىزدا ەرەكشە ورنى بار كەنەسارى حاننىڭ ۇزەڭگىلەس سەرىگى. بۇل قۇران ەكى عاسىر بويى قولدان قولعا ءوتىپ، اقىرى شەتەلگە شىعارىلعان ەكەن. ونى جاناشىر ازاماتتاردىڭ، مەسەناتتاردىڭ كومەگىمەن قازاقستانعا قايتارىپ الدىق. قۇراندا مارال يشاننىڭ جانە كەنەسارى حاننىڭ ءمورى بار. جادىگەرگە جان-جاقتى ساراپتاما جاسالدى. وتاندىق جانە شەتەلدىك عالىمدار قۇراندى مۇقيات زەرتتەدى. قۇراننىڭ، راسىندا، مارال يشانعا تيەسىلى بولعانى جانە كەنەسارى حانعا بەرىلگەنى انىقتالدى. كەز كەلگەن وركەنيەتتى ەل ءوزىنىڭ تاريحي مۇرالارىنا زور قۇرمەتپەن قارايدى. ونى قاستەرلەپ، مۇراجايعا نەمەسە باسقا دا ارنايى ورىندارعا قويادى. ءبىز دە بابالاردان ميراس بولعان ءاربىر جادىگەردى قادىرلەپ، ساقتاي ءبىلۋىمىز كەرەك»، - دەدى پرەزيدەنت.