تۇركىستان قالاسىندا ايگىلى مارال يشاننىڭ كەنەسارى حانعا سىيلاعان قۇران كىتابىن قوجا احمەت ياساۋي كەسەنەسىنە قويۋ ءراسىمى ءوتتى، دەپ حابارلايدى almaty-akshamy.kz
سالتاناتتى ءىس-شاراعا قمدب ءتوراعاسى، باس ءمۇفتي ناۋرىزباي قاجى تاعان ۇلى، تۇركىستان وبلىسىنىڭ اكىمى دارحان ساتىبالدى، ءدىن ىستەرى كوميتەتىنىڭ ءتوراعاسى ەرجان نۇكەجانوۆ، سونداي-اق كەنەسارى حان مەن مارال يشان ۇرپاقتارى قاتىستى. ءراسىم قۇران وقۋمەن باستالىپ، وبلىس اكىمىنىڭ قۇتتىقتاۋىمەن جالعاستى. ايماق باسشىسى مۇنداي جيىننىڭ ءوتۋى مارتەبە دەي كەلە، تۇركى جۇرتىنىڭ تورىنە بالانعان تۇركىستان ءۇشىن تاعىلىم ەكەنىن اتاپ ءوتتى.
ال باس ءمۇفتي ناۋرىزباي قاجى تاعان ۇلى ءوز كەزەگىندە بۇل مەملەكەت باسشىسى قاسىم-جومارت كەمەل ۇلىنىڭ ۇلكەن اماناتى ەكەنىن ايتىپ، ەر تۇرىكتىڭ بەسىگىنە بالانعان تۇركىستان ءۇشىن تاريحي وقيعا دەدى.
«وسى جىلدىڭ ماۋسىم ايىندا بابامىزدان جەتكەن قۇندى جادىگەردى قازاقستان مۇسىلماندارى ءدىني باسقارماسى قابىلداپ الىپ، بۇگىن سول ءبىر بابالارىمىزدىڭ كوزى بولعان قۇندى مۇرا جەتى عاسىرلىق تاريحى بار قوجا احمەت ياساۋي كەسەنەسىنە قويىلعالى تۇر. جاڭا عانا قاريلارىمىز قۇران حاتىم ءتۇسىرىپ، ساۋابىن كەنەسارى حان مەن مارال يشان سىندى بارشا بابالارىمىزعا باعىشتادىق. اللا قابىل ەتسىن!
ءقادىرلى قاسىم-جومارت كەمەل ۇلىنىڭ بىزگە سەنىم ارتىپ تاپسىرعان اماناتى بۇگىن كيەلى تۇركىستان تورىنە جەتتى. قۇندى جادىگەردىڭ قوجا احمەت ياساۋي بابامىزدىڭ كەسەنەسىنە قويىلۋى ءداستۇرلى ءدىنىمىزدىڭ مارتەبەسىنىڭ ارتىپ، حالقىمىزدىڭ ساناسىنىڭ ىزگىلىككە وزگەرۋىنە ىقپال ەتەدى دەگەن ويدامىز. قۇندى مۇرامەن ەلىمىزگە قۇت ورناسىن» قمدب ءتوراعاسى.
سونداي اق جيىندا ءسوز العان ەرجان بولاتقان ۇلى دا جادىگەردىڭ تۇركىستانعا قويىلۋى ءمانى بار ماڭىزدى دۇنيە دەپ اتاپ ءوتتى. رەسمي ءىس-شارا بارىسىندا باس ءمۇفتي قۇراندى «ازىرەت سۇلتان» قورىق-مۇراجايىنىڭ ديرەكتورى جەڭىسبەك ماۋلەنقۇلوۆقا تابىستاپ، كىتاپ كەسەنەدەگى ۇلكەن «اقساراي» بولمەسىنە قويىلدى.