برونحيت - برونحتىڭ قابىنۋىنان تۋىنداعان تىنىس الۋ ورگاندارىنىڭ اۋرۋى.
برونحيت كەزىندەگى قابىنۋ پروسەسى برونحتىڭ شىرىشتى قابىعىنا عانا اسەر ەتۋى نە ونىڭ قابىرعاسىنىڭ بۇكىل قالىڭدىعىنا اسەر ەتۋى ابدەن مۇمكىن دەيدى الماتى No36 قالالىق ەمحانانىڭ دارىگەرى نازىم شوجەيەۆا.
ونىڭ ايتۋىنشا، ءجىتى برونحيت جوتەلمەن، كەۋدەدەگى اۋىرسىنۋمەن جانە ەنتىگۋمەن سيپاتتالادى. برونحيت جاعدايىنىڭ كوپشىلىگى وزدىگىنەن جويىلسا دا، اۋرۋ دۇرىس ەمدەلمەگەندە تۋىنداۋى مۇمكىن بەلگىلى ءبىر اسقىنۋلار بار.
ماسەلەن ءجىتى برونحيت برونحوپنيەۆمونيا تۇرىندەگى اسقىنۋدى تۋدىرۋى مۇمكىن، بۇل وكپەگە اسەر ەتەتىن ينفەكسيالىق جانە قابىنۋ پروسەسى، قىزبا، قۇرعاق جوتەل جانە جالپى السىزدىكتى تۋدىرادى.
سوزىلمالى اۋرۋدىڭ باقىلانبايتىن شىرقاۋى تۇراقتى ءجىتى پنيەۆمونياعا اكەلەدى جانە اقىرىندا وكپەنىڭ وبسترۋكتيۆتى اۋرۋىنا اينالادى. بۇل كەزدە ارنا تارىلىپ، تىنىس الۋ جولدارىنىڭ شىرىشتى قاباتى ىسىنەدى، وكپە تىندەرى ءىشىنارا جويىلادى.
«اۋرۋدىڭ اسقىنۋىنا جول بەرمەۋ وتە ماڭىزدى. جوتەل، قىزبا، السىزدىك سياقتى مۇمكىن برونحيالدى زاقىمدانۋدىڭ العاشقى بەلگىلەرى پايدا بولعان كەزدە-اق دارىگەرگە كورىنۋ كەرەك. دارىگەر دياگنوز قويىپ، قالاي جانە نەمەن ەمدەۋ كەرەك ەكەنىن ايتادى»، - دەپ بولىسەدى مامان.
سوزىلمالى برونحيت وكپە گيپەرتەنزياسىنىڭ، ەمفيزەمانىڭ، برونحوەكتازدىق اۋرۋدىڭ، پنيەۆمونيانىڭ، توتەنشە جاعدايدا جۇرەك جەتكىلىكسىزدىگىنىڭ جانە باسقا دا ءبىرقاتار ءقاۋىپتى اۋرۋدىڭ دامۋىن تۋدىرۋى مۇمكىن.
جوعارىدا اتالعان اسقىنۋدىڭ كەز كەلگەنىنە تاپ بولساڭىز، مۇمكىندىگىنشە تەزىرەك مەديسينالىق كومەككە جۇگىنۋ ماڭىزدى. ۋاقتىلى ەمدەۋ كەزىندە جوعارىدا اتالعان اسقىنۋدىڭ دامۋ ىقتيمالدىعىن ايتارلىقتاي تومەندەتۋگە بولادى.